Башкортстанның иң яхшы тәрбиячесе кем?

Шушы көннәрдә Хөсәен Әхмәтов исемендәге Башкорт дәүләт филармониясендә “Башкортстан Республикасы мәктәпкәчә белем бирү оешмасының ел педагогы” һәм аның кысаларында үткәрелә торган “Туган телдә белем бирүче мәктәпкәчә белем бирү оешмасының ел педагогы” республика һөнәри конкурсларын ябу тантанасы узды.Һөнәри конкурс 2012 елдан башлап ел саен оештырыла. Чара мәктәпкәчә белем бирү оеш­малары педагоглары арасында иң яхшы педагогик хезмәт­кәрләрне ачыклау, аларга ярдәм итү һәм бүләкләү максатыннан үткәрелә. Һөнәри бәйге кысаларында “Туган телдә белем бирүче мәктәпкәчә белем бирү оеш­масының ел педагогы” конкурсын уздыру да аеруча мөһим, ул быел икенче тапкыр үткәрелде. — Конкурс Башкортстанның иң яхшы педагогик кадрларын ел­дан-ел ныграк берләштерә. Аның тарихы — мәктәпкәчә белем бирү оешмалары педагог­ларының казанышлары тарихы, аларның хезмәте иҗат һәм үсеш белән тыгыз бәйләнгән. Республика мәгариф системасын үсте­рүгә һәм модернизацияләүгә һәрвакыт зур игътибар бирде һәм бирәчәк. Соңгы 3-4 елда тө­бәк җитәкчесе Радий Хәбиров, шулай ук Башкортстан Хөкүмәте ярдәме белән мәгариф система­сының тышкы һәм эчке торышы үзгәрә. Шуңа да тәрбия­ләнү­челә­ребездә югары һәм сыйфатлырак нәтиҗәләр күрәбез. Безнең балалар Бөтен­русия һәм халыкара ярышларда, конкурсларда, олимпиадаларда җиңә һәм аларның һәркайсы безнең төбәк мәгариф система­сының амбассадоры була. Конкурста җиңү­челәр һәм лауреатлар мәктәпкәчә белем бирү оешма­сының иң ях­шы педагогы исемен лаеклы йөр­терләр дип ышанам, — дип билге­ләп үтте төбәкнең мәгариф һәм фән министры Айбулат Хаҗин. Бәйгедә республиканың 55 муниципаль районыннан һәм шәһәр округыннан 91 педагог катнашты. Алар — конкурсның муниципаль этапларында җиңү­челәр һәм лауреатлар. Респуб­ликаның төрле район һәм шәһәр­ләрендәге балалар бакчалары тәрбия­челәре чын педагогик осталык марафонында үзләре­нең сәләтен күрсәтте, эш тәҗ­рибәсе белән бүлеште. “Конкурста катнашу­чының интернет-ресурсы” бәйгенең читтән торып үткәрелгән беренче турында конкурсантларның Интернет челтәрендәге шәхси сайтлары, катнашу­чылар­ның белем бирү оешмасының рәсми сайтындагы битләре бәяләнде. Туган телләрне өйрәнү һәм укыту төркемнәрендә эшләүче педагоглар онлайн-форматта “Балалар белән педагогик чара” үткәрде. Бәйгенең беренче һәм икенче туры нәтиҗәләре буенча гомум рейтингта иң күп балл җыйган 15 лидер финалда җиңүче титулы өчен көрәште. “Башкортстан Республикасы мәктәпкәчә мәгариф оешмасы­ның ел педагогы” һөнәри конкур­сында Уфа районы Жуково авы­лының “Карлыгач” балалар бакчасы тәрбиячесе Арина Бакиева җиңү­че исеменә лаек булды. “Туган телдә белем бирүче мәк­тәпкәчә белем бирү оешма­сының ел педагогы” бәйгесендә Уфа шәһә­­ренең 202нче полилингваль балалар бакчасының өлкән тәрбия­чесе Гөлсинә Ишбаева җиңде. “Осталык дәресе”ндә һәр конкурсант үзенең педагогик тәҗри­бәсен тәкъдим итте. Шулай ук, конкурс лауреатлары мәгариф һәм фән министры Айбулат Хаҗин катнашлыгында узган “Педагогик дебатлар”да һөнәри эшчәнлекнең актуаль мәсьәлә­ләре һәм респуб­ликаның мәк­тәпкәчә белем бирү системасын үстерү перспективалары турында фикер алышты. Конкурста җиңүче Арина Бакиева агымдагы елның көзендә Волгоград шәһәрендә узачак “Русиянең ел тәрбиячесе” Бөтен­русия һөнәри конкурсында республика данын яклаячак, ә Гөл­синә Ишбаева агымдагы ел­ның ноябрендә Төньяк Осетия-Алания Республикасында узачак “Туган тел һәм туган әдә­бият укытучысы” Бөтенрусия конкур­сының тиешле номина­циясендә республика исеменнән чыгыш ясаячак. Җиңүчеләрне, призерларны, республика конкурсы лауреатларын лаеклы бүләкләре белән котлыйбыз!