Башҡортостанда Йәйге сурдлимпия уйындары үтә

15 мартта Республикаға идара итеү үҙәгендә Башҡортостан Башлығы Радий Хәбиров һәм Рәсәйҙең спорт министры урынбаҫары Одес Байсолтанов «Беҙ бергә. Спорт» Йәйге сурдлимпия уйындарына әҙерлек һәм үткәреү буйынса ойоштороу комитетының ултырышын уҙғарҙы. Был сара 2023 йылдың 23 июленән 2 авгусына тиклем Өфөлә үтә. Ярыштарҙа 2,3 меңдән ашыу атлеттың ҡатнашыуы көтөлә. Ултырышты асып, Башҡортостан Башлығы Рәсәйҙең Спорт министрлығына 2023 йылғы уйындарҙы Өфөлә уҙғарыу йәһәтенән ышаныс белдергәне өсөн рәхмәт һүҙҙәрен еткерҙе. - Илебеҙҙең бөтә төбәктәренән һәм дуҫ дәүләттәрҙән спортсылар 21 дисциплинала миҙалдар өсөн көрәшәсәк, - тине Радий Хәбиров. - Ярыштар юғары кимәлдә үтһен, ә ҡунаҡтар Башҡортостан менән яҡындан таныша алһын өсөн беҙ үҙебеҙҙең яҡтан бөтә кәрәкле шарттар булдырасаҡбыҙ. Рәсәйҙең спорт министры урынбаҫары Одес Байсолтанов республика етәкселегенә уйындарға әҙерлек буйынса алып барылған ойоштороу эше өсөн рәхмәт әйтте. - Спортсыларыбыҙ өсөн ярыш тәжрибәһен һаҡлау маҡсатында әлеге күләмле ярыштарҙы үткәреү тәҡдимен индерҙек. Башҡортостан яғынан яуаплы ҡараш уларҙы мөмкин тиклем яҡшыраҡ үткәрергә мөмкинлек бирер тип ышанам. Быға бер шик тә юҡ, - тип һыҙыҡ өҫтөнә алды Одес Байсолтанов. Төбәктең спорт министры Руслан Хәбибов әҙерлек саралары планын ғәмәлгә ашырыу тураһында ентекле һөйләне. «Беҙ бергә. Спорт» Йәйге сурдлимпия уйындары алты майҙансыҡта үтә, улар араһында иң ҙурҙары – Рима Баталова исемендәге Спорт әҙерлеге үҙәге, «Динамо» спорт комплексы һәм Спорт һарайы. Уйындарҙы асыу тантанаһын «Өфө-Арена»ла уҙғарыу күҙаллана. - Барлыҡ спорт объекттары ярыштарҙы үткәреүгә әҙер, ойоштороу эштәре планға ярашлы алып барыла, - тип хәбәр итте Руслан Хәбибов. Ултырыш аҙағында Башҡортостан Башлығы республика Хөкүмәтенә уйындарға әҙерлек буйынса ентекле юл картаһын әҙерләргә һәм уның үтәлешен аныҡ контролдә тоторға ҡушты. Сығанаҡ һәм фото: glavarb.ru