«Солтүстік» ӘКК» АҚ кәсіпкерге әлеуметтік маңызы бар тауарды қымбатқа сатып келген. Өнім құны тауарды көтерме бағамен саудалайтындардан 30 теңгеге жоғары болған, деп хабарлайды Qazaqstan Media тілшісі.
ҚР Сыбайлас жемқорлыққа қарсы іс-қимыл агенттігі облыстық департаментінің мәліметінше, оларға жеке кәсіпкер шағымданып, тұрақтандыру қорындағы азық-түлікті қымбат бағаға алуға мәжбүр болғанын айтқан. Ауылда дүкен ұстайтын бизнесмен сауда орнында сату үшін тұрақтандыру қорынан әлеуметтік маңызы бар азық-түліктің 5 түрін алмақ болған. Алайда акционерлік қоғам өкілдері оны қосымша әлеуметтік қантты алуға міндеттеген. Бірақ тауардың бағасы ол жердегі өзге көтерме саудамен айналысатындардан 30 теңгеге қымбат болған.
«Осылайша, «Солтүстік» әлеуметтік-кәсіпкерлік корпорациясы» АҚ тарапынан әкімшілік кедергі жасалған. Олар шағын бизнес субъектілері есебінен бұрын қымбат бағаға алынған азық-түліктен құтылмақ болған. Ведомствоның араласуынан кейін барлық тараптардың қатысуымен кездесу өтіп, мәселе оң шешілді. Яғни, кәсіпкерлер қажетті азық-түлікті еш шектеусіз сатып ала алады», – делінген СҚО Сыбайлас жемқорлыққа қарсы қызметінің хабарламасында.