Радий Хәбиров: "Zа самбо" проекты алга таба да киңәйтеләчәк"

Радий Хәбиров белдерүенчә, "Бердәм Русия" гамәлгә ашыра торган "Zа самбо" проекты ярдәмендә республика сәламәт яшәү рәвеше идеяләрен актив алга сөрә, чын патриотлар һәм көрәшчеләр тәрбияли. Мәсәлән, «Мәктәпләргә Самбо» программасында инде Башкортстанның 19 мәктәбе катнаша. Ә агымдагы ел ахырына тагын 10 мәктәп теркәләчәк. Шулай ук яңа уку елыннан Башкортстан физик культура институты базасында самбо буенча тренер-укытучылар әзерли башлаячаклар. "Форумда мин "Бердәм Русия"нең Генеральный советы секретаре Андрей Турчакка Уфада яңа Көрәш сарае базасында самбо буенча халыкара турнир уздырырга тәкъдим иттем. Ярышлар "Самбо көне"ндә - 2024 елның 16 ноябрендә узачак, дип килештек. Тагын бер инициатива - без самбочылар өчен сыйфатлы һәм уңайлы экипировка җитештерүне башларга әзер. Республика мондый мөмкинлекләргә ия. Гомумән алганда, "Zа самбо" проекты алга таба да киңәйтеләчәк, балаларыбызны физик һәм әхлакый яктан нык булырга өйрәтәчәк, дип ышанам. Бу бик файдалы", - дип яза төбәк җитәкчесе. Башкортстан Башлыгы Радий Хәбировның чыгышын тулысынча түбәндәге видеода карый аласыз: Пленар утырышта, шулай ук, "Бердәм Русия"нең Генераль советы секретаре Андрей Турчак чыгыш ясады. Ул белдергәнчә, илдә самбоны алга этәрүнең мөһим бурычы - һәркем файдалана алырлык спорт дисциплинасын эшләү. Моның өчен ел саен самбо белән шөгыльләнү өчен 500 зал ачарга планлаштырыла. - Иң мөһиме, самбо нәрсәгә өйрәтә - ул җиңәргә. Бу спорт төренә кешеләрне никадәр күбрәк җәлеп итсәң, җәмгыятебез һәм илебез шулкадәр көчлерәк һәм ныклырак булыр, - диде Андрей Турчак. Русия мәгариф министры Сергей Кравцов форумда билгеләп үткәнчә, министрлык "Бердәм Русия" һәм Бөтенрусия самбо федерациясе белән берлектә балаларны әлеге спорт төренә җәлеп итү эшен дәвам итәчәк. - Мәктәп спорт клубларының бердәм Бөтенрусия исемлеге формалаштырыла. Алар инде - 33 859. Бу - гомуми белем бирү учреждениеләренең 85 проценты. Киләсе елга һәр мәктәптә спорт клубы төзеләчәк. Әлегә самбо буенча уку төркемнәре саны - 1 743. Аларда 27 мең укучы шөгыльләнә, - диде Сергей Кравцов. Ә “Za самбо” федераль партия проекты координаторы Сергей Елисеев самбоны дәүләт дәрәҗәсендә популярлаштыруны кирәк дип саный. - Хөкүмәткә самбоны хуплау һәм популярлаштыру буенча дәүләт сәясәтен үткәрергә тәкъдим итәбез. Самбо инфраструктурасын үстерү буенча «Демография» гомумдәүләт проектының «Спорт - яшәү нормасы» федераль проекты кысаларында эш алып барыла, - дип белдерде Сергей Елисеев. Чыгышының ахырында Радий Хәбиров “Бердәм Русия” партиясенә һәм “Za самбо” проектын гамәлгә ашырган өчен Бөтенрусия самбо федерациясенә рәхмәт белдерде. Фото: gtrk.tv/b24