2023 елның сентябрендә Башкортстанда полилингваль белем бирүгә багышланган халыкара форум уздыру планлаштырыла. Форумга Русия субъектларында һәм дус чит илләрдә бу төр мәгарифне гамәлгә кертә торган оешмалар чакырылачак. Бу хакта мәгариф һәм фән министры урынбасары Әлфия Галиева сөйләде.Билгеле булуынча, Уфа, Стәрлетамак һәм Нефтекама шәһәрләрендә дүрт полилингваль уку йорты булдырылды.Башкортстан Хөкүмәте боерыгы белән Уфа шәһәренең 44нче һәм 162нче мәктәпләре 2022 елның 1 гыйнварыннан 1нче һәм 2нче “СМАРТ” республика полилингваль күппрофильле гимназияләре итеп үзгәртелде. Агымдагы елда Хәйбулла һәм Учалы районнарында ике яңа полилингваль мәктәп ачу, Мишкә районында һәм Сибай шәһәрендә капиталь ремонттан соң, гамәлдәге ике гомуми белем бирү оешмасын полилингваль мәктәпләр итеп үзгәртеп кору планлаштырыла. Киләсе елда Әбҗәлил районы Әскар авылының “Восточный-1” бистәсендә балалар бакчасы булган полилингваль интернат-мәктәп ачылу һәм Тәтешле районының Яңа Тәтешле урта мәктәбен удмурт теле укытыла торган күппрофильле полилингваль мәктәп статусына күчерү каралган. Ведомство белгече әйтүенчә, Белорет районы Инҗәр авылының 2нче урта мәктәбенең Усмангали филиалы базасында “Республика 1нче полилингваль күппрофильле гимназиясе” филиалының Республика полилингваль белем бирү үзәген төзү буенча эш алып барыла. Аның киләсе елда файдалануга тапшырылуы көтелә. Әлеге учреждениедә ел әйләнәсендә полилингваль сменалар, слетлар, укыту-тренировка җыеннары, семинарлар үткәреләчәк. Әйтергә кирәк, 2024 елга кадәр Башкортстанда мондый мәктәпләр челтәре 10 шәһәрне һәм биш район үзәген колачлаячак, аларда урыс, туган һәм берничә чит телне тирәнтен өйрәнәләр, берничә телдә белем алалар, берничә фән билингваль нигездә укытыла. Укучылар Башкортстан Республикасы, Русия Федерациясе һәм дөнья халыкларының мәдәни байлыгын өйрәнә. Аскын, Баймак, Бишбүләк, Дүртөйле, Туймазы, Салават, Ишембай, Иглин районнарында полилингваль мәктәпләр ачу проектлары 2025-26 елларда тормышка ашырылачак. Әлфия Галиева билгеләп үтүенчә, быел мари телендә белем бирүче полилингваль мәктәп барлыкка киләчәк, чуваш һәм удмурт телләрен өйрәтүче полилингваль мәктәпләр проектлана. Бу республика өчен генә түгел, тулаем ил өчен дә яңа тәҗрибә. Моннан тыш, инновацион гомуми белем бирү оешмаларында полилингваль сыйныфлар ачыла. Мәсәлән, Уфа, Межгорье шәһәрләрендә, Тәтешле районында үрнәк булырлык сыйныфлар бар. Чуваш телендә белем бирүче күппрофильле полилингваль мәктәпкә үзгәртеләчәк Бишбүләк районының Бишбүләк 2нче урта мәктәбендә 2023-24 уку елында беренче полилингваль сыйныф эшли башлаячак. Шунысы мөһим, республика Русия субъектларында, БДБ илләрендә полилингваль һәм полимәдәни белем бирүнең төп үсеш тенденцияләрен өйрәнә. Бу өлкәдә Төньяк Осетия, Татарстан, Удмуртия, Пермь крае белән тыгыз хезмәттәшлек алып барыла. Бу уңайдан, агымдагы елның сентябрендә Мәгариф һәм фән министрлыгы М. Акмулла исемендәге БДПУ белән берлектә, Русия Федерациясе субъектларында һәм дустанә чит илләрдә полилингваль белем бирүне гамәлгә кертүче оешмалар катнашлыгында халыкара форум үткәрүне күз уңында тота.Полилингваль мәктәпләр республиканың югары уку йортлары белән актив хезмәттәшлек итә, мәктәпләр базасында полилингваль белем бирүне фәнни-методик яктан тәэмин итү буенча инновацион мәйданчыклар булдырылды һәм эшләп килә. Полилингваль мәктәпләрдә 5 489 укучы белем ала, 274 педагог эшли. Әлеге уку йортларында укырга теләүчеләр саны ел саен арта, бу белем бирү сыйфатына бәйле. Мәктәп укучылары БДИ һәм Бөтенрусия мәктәп укучылары олимпиадасы буенча яхшы нәтиҗәләр күрсәтә. Күп телле мәктәпләрдә “Уңышка юл”, “Агыйдел” укучыларның төбәкара полилингваль олимпиадасы, “GeoLing – Илгизәр”, “Әти, әни, мин – полилингваль гаилә” уен проекты, “Мәктәп археологиясе”, “АтайсалSchool”, инглиз теле буенча “I can speak” олимпиадасы кебек кызыклы проектлар тормышка ашырыла.Республикада шулай ук полилингваль мәктәпкәчә белем бирү челтәре дә үсә. Сибай, Стәрлетамак, Уфа, Салават, Нефтекама шәһәрләрендә, Хәйбулла, Баймак, Учалы, Дүртөйле, Салават, Уфа, Яңавыл районнарының 44 мәктәпкәчә белем бирү оешмаларында урыс, башкорт һәм инглиз телләрен өйрәнүче күп телле төркемнәр эшләп килә. Мәгарифне үстерү институты тарафыннан 8 балалар бакчасы (Уфа, Стәрлетамак, Баймак һәм Яңавыл шәһәрләре) базасында инновацион мәйданчыклар челтәре оештырылган.“Безнең республикада полилингваль белем бирүне үстерү концепциясе киңәйтеләчәк һәм үсеш алачак. Безнең алда төбәкнең милли һәм этномәдәни үзенчәлекләрен исәпкә алып, белем бирүнең инновацион системасын төзү бурычы куелган”, — ди Мәгариф һәм фән министрлыгы белгече. Фото: eng.ufacity.info