Фәттәховтарҙың хәҙерге ҡатмарлы заманда ла биш бала тәрбиәләй алыуын күреп һоҡланмау мөмкин түгел. Ә бит йәштәр хәҙер үҙҙәре өсөн генә йәшәй, тип уйларға күнеккәнбеҙ. Күгәрсен районының Бикбулат ауылында бындай ишле ғаиләләр аҙ түгел, әммә улар, нигеҙҙә, бала-сағаһын күптән аяҡҡа баҫтырған ветерандар. Ә Ғәлиә менән Даяндың йәш быуын вәкилдәре булыуы иғтибарҙы йәлеп итте. Ғәлиә сабыйҙары менән таныштыра: иң олоһо Ленар V класта уҡый, Илфатҡа туғыҙ йәш, өсөнсө класта белем ала, Райфат былтыр көҙ беренсе класҡа барған, бер бөртөк ҡыҙыҡай Диана әле балалар баҡсаһына йөрөй, иң кинйәһе Динарға – йәш ярым. Даян Рим улы мәктәптәге ҡаҙанлыҡта оператор булып эшләй. Тәбиғи, бындағы эш көҙ башлана ла яҙ тамамлана, йәғни йылытыу миҙгеленә бәйле. Ә йәй? Бына ошо мәлдә уның уңғанлығы күренә лә инде: ул йәй буйы бура бурап һата. Донъяларының етеш булыуына ҡарағанда, был кәсептән төшөмө аҙ түгел, ахыры. Бынан тыш, хужа ҡышҡылыҡҡа үгеҙҙәр алып, уларҙы үҫтереп, шунан ит комбинатына тапшыра икән. Бер ҡышта дүрт-биш үгеҙ ала икән, ғәҙәттә. “Ә бер ҡышта, хәтерләйем, ете үгеҙ үҫтереп һаттым”, – ти Даян. Йүнсел ғаиләнең үҙ тракторы ла бар. Тимәк, бесән сабыу, ағас килтереү һәм башҡа эштәр ырамлы, тиҙ, күләмле башҡарыла. Техникаһы булғас, башҡаларға ла булышырға өлгөрә Даян. Бындай саҡта: “Күп бала тәрбиәләүе бик ауырға төшмәйме? Ата-әсәйҙәр, ағай-эне нимә ти?” – тигән һорау үҙенән-үҙе тыуа кеүек. Мин дә Ғәлиәгә шул һорауҙы бирмәй булдыра алманым. Ул былай тине: – Ата-әсәләр улай тип әйтмәй ҙә ул. Ә иптәш ҡыҙҙарҙың: “Нисек өлгөрәһең һуң?” – тип аптырағаны булды. Юҡ, һис тә ауыр түгел. Беренсе һәм икенсе баланан һуң ҡыйын да кеүек, ә өсөнсөһөнән һуң өйрәнеп китәһең, ғаилә тормошо бер юлға төшөп ала, өлкәнерәк балалар кеселәрен ҡарарға ярҙамлаша башлай. Дәүләттең ярҙамы ла һиҙелерлек, ул балаларға ғына түгел, көнкүрешкә лә ҡағыла – былтыр газ үткәреүҙә, мәҫәлән, ташламалы хаҡ булды. Фәттәховтарҙың балаларының да йүнсел, аҡыллы, маҡсатҡа ынтылышлы булып үҫеренә шик юҡ. “Шундай ғаиләләр күберәк булһа ине, был бит милләттең сифаты тигән һүҙ”, – ошо уйҙар менән сыҡтыҡ был яҡты һәм бәхет ташып торған йорттан. - Рәшит КӘЛИМУЛЛИН