Ауылдарға яңы һулыш өрөлөр!

Ошо көндәрҙә хоҡуҡи мәғлүмәт порталында яңы указ баҫылды. Унда әйтелеүенсә, Башҡортостан Башлығы Радий Хәбиров республиканың дәүләт һәм муниципаль мәҙәниәт учреждениелары хеҙмәткәрҙәренә дәүләт ярҙамы саралары тураһындағы указға ҡул ҡуйҙы. Документҡа ярашлы, быйыл 30 мәҙәниәт хеҙмәткәренә 1-әр миллион һум күләмендә бер тапҡыр бирелә торған түләү билдәләнә. Һүҙ һөнәри белемле дәүләт һәм муниципаль мәҙәниәт учреждениелары белгестәре, шулай уҡ профилле өҫтәмә белем биреү учрежде­ниеларының хеҙ­мәткәрҙәре – балалар музыка, художество, хореография һәм сәнғәт мәктәптәренең педагогтары хаҡында бара. Аҡсаға 2021 йылдан Башҡорт­остандың ауылдарына йәки 50 меңгә тиклем кеше йәшәгән ҡалаларға эшкә килгән белгестәр дәғүә итә ала. Түләүҙәр тәртибен һәм шарттарын, шул иҫәптән белгестәрҙе һайлап алыу критерийҙарын 30 көн эсендә республика Хөкүмәте әҙерләй. Ошо указ Башҡортостан мәҙәниәте тармағында эшләгәндәрҙе ни тиклем ҡыуандырғанын һәм дәртләндергәнен белһәгеҙ! Билдәле булыуынса, республикала “Ауыл мәҙәниәт хеҙмәткәре” программаһы пилот проекты булараҡ Радий Хәбиров башланғысы менән 2021 йылдан ғәмәлгә ингәйне. Ул саҡта йәш белгестәргә 500 мең һум күләмендә күтәрмә аҡса бирелә ине. Быйылдан уның кимәле ике тапҡырға артты. Ә ауыл өсөн бер миллион һум һәйбәт аҡса, уға йорт йәки ер алырға һәм донъя көтә башларға була. Ғөмүмән, Башҡортостанда төрлө тармаҡ белгестәре өсөн ошоноң ише ярҙам төрҙәре күп. Мәҫәлән, ауылдарға ҡайтып эшләгән медицина хеҙмәт­кәрҙәре, уҡытыусылар, тренерҙар шулай уҡ ҙур ғына күләмдә аҡса ала. Был уларға ауылда төпләнергә, йорт һалырға йәки һатып алырға мөмкинлек бирә. Дөйөм алғанда, ауылға ҡайтып эш башлар өсөн яҡшы стимул. Указ тураһында уҙған аҙнала Өфөлә үткән “Арт-Ҡоролтай” форумы барышында Рәсәй Федерация Советының Фән, мәғариф һәм мәҙәниәт комитеты рәйесе Лилиә Ғүмәрова ла үҙ фекерен бел­дергәйне. – “Ауыл мәҙәниәт хеҙмәткәре” программаһын финанслау менән бәйле күп тапҡыр күтәрелгән мәсьәлә әлегә бөтә ил кимәлендә хәл ителмәгән. Беҙҙең комитет был мәсьәләне Рәсәй Хөкүмәте, Рәсәйҙең Мәҙәниәт һәм Финанс министр­лыҡтары менән өйрәнә. Ҡасан да булһа “Ауыл мәҙәниәт хеҙмәткәре” программаһы федераль кимәлдә эшләй башлар, тип өмөтләнәбеҙ. Беҙҙә, Башҡортостанда, Радий Фәрит улының ярҙамы менән ошондай программа эшләп килә. Был хаҡта Федерация Советында Валентина Матвиенконың ауыл эшсәндәре менән осрашыуында республика вәкиле һөйләне. Әлеге мәсьәләлә беҙ – алдын­ғылар. Башҡортостан тәжрибәһе бөтә илгә таратылыр, тип ышанам, – тине ул. Гөлиә КӨМӨШБАЕВА, Ишембай район­ының Маҡар мәҙәниәт йорто мөдире: – Белеүемсә, “Ауыл мәҙәниәт хеҙ­мәткәре” программаһы буйынса ра­йоныбыҙҙан ике йәш белгес 500 меңешәр һум күләмендә күтәрмә алды һәм бөгөн дәртләнеп эшләп йөрөй. Ә хәҙер был һан 1 миллион һумға етте. Әлбиттә, яңылыҡты ҡыуанып ҡабул иттек. Ауылдарға йәш белгестәр килһә, ауыл да йәшәреп китә бит ул. Беҙҙең Маҡар йырсыларға бай төбәк, ә бейеүселәр әҙерәк. Ошо программа буйынса берәй бейеүсе килһә, хатта шатланыр инек. Ауыл өсөн 1 миллион һум ҙур аҡса, йорт йәки ер алырға, донъя көтөп алып китергә мөмкин. Мин мәҙәниәт тармағында 35 йыл самаһы эшләйем, элегерәк эшләүе еңелерәк ине, хәҙер был ярҙам булғас, йәштәргә лә һәйбәт булыр тип уйлайым. Рита ӘБДРӘХИМОВА, Учалы райо­нының Иҫке Байрамғол ауылы мәҙәниәт йорто мөдире: – Радий Хәбировтың был указы тураһында ишеткәс, бик ҡыуандыҡ. Нисек кенә булмаһын, ауыл клубтарына йәш, дәртле белгестәр, яңы һулыш кәрәк. Тик хеҙмәт хаҡы әллә ни ҙур булмағас, уҡыу йорттарын яңы тамамлаған белгестәр ауылдарға бик ашҡынмай, ҡалаларҙа ҡалыу яғын ҡарайҙар. Ә хәҙер уларға 1 миллион һум аҡса бирһәләр, хәл ыңғай яҡҡа төҙәлер тип уйлайым. Ауыл ерендә был аҡсаға бына тигән йорт алырға мөмкин. Ғөмүмән, йәштәр ауыл тормошонан ҡурҡмаһындар ине, хәҙер бында ла матур итеп йәшәргә, бар уңайлыҡтары булған йорт һалырға була бит. Был указ арҡаһында ауылдарға яңы һулыш өрөлөр тип көтәбеҙ! Әлфиә МИНҒӘЛИЕВА