Ейәнсура ерендә ике көн дауамында яҙыусы - педагог, " Тормош һабағы" программаһы һәм дәреслектәр авторы, "Йәйләү" балалар ял итеү үҙәге, "Башҡортостан ынйылары", "Урал батыр мәктәбе" проекттары авторы, Салауат Юлаев ордены кавалеры Мәрйәм Бураҡаеваның 80 йәшлек юбилейы уңайынан "Бураҡаева уҡыуҙары" тип исемләнгән төбәк-ара фәнни - ғәмәли конференция ойошторолдо. Халыҡ педагогикаһы нигеҙендә уҡытыу һәм тәрбиәләү йолаларын тергеҙеү, уҡыусыларҙы тикшеренеү, ижади эшмәкәрлеккә йәлеп итеү, туған телгә, тарихҡа, халыҡ фольклорына ҡыҙыҡһыныу уятыуҙы төп маҡсат итеп ҡуйҙы әлеге конференция. Сараның тәүге өлөшө кисә Иҫәнғол ауылындағы М. Бураҡаева исемендәге башҡорт гимназия-интернатында барҙы. Унда асыҡ дәрестәр, секция ултырыштары, оҫталыҡ дәрестәре үткәрелде. Бөгөн иһә район хакимиәтендә конференцияның пленар ултырышы уҙҙы. Уның эшендә республикабыҙҙың төрлө төбәктәренән генә түгел, Силәбе, Ырымбур тарафтарынан да ҡунаҡтар ҡатнашты. Ейәнсура районы хакимиәтенең эштәр менән идара итеүсеһе Йәдҡәр Ханнанов райондың социаль - иҡтисади үҫеше менән таныштырҙы. Конференцияла төп һүҙ Мәрйәм Сабирйән ҡыҙының ижадына, мәғариф мәсьәләләренә арналды. Мәрйәм Бураҡаеваның "Этнопедагогика - халыҡтың тормош һабаҡтары" темаһына арналған сығышы айырыуса ҙур ҡыҙыҡһыныу тыуҙырҙы. "Тәбиғәт һәр йән эйәһенә йәшәү һуты биргән. Тәбиғәтте өйрәнәйек, тәбиғәттән һорайыҡ. Этнопедагогика - йәшәү ҡанундарын өйрәтеү", - тигән һүҙҙәре лә уйға һалырлыҡ ине. Ғөмүмән, ултырыштағы һәр сығыш үҙенсәлекле фекерҙәре менән айырылып торҙо. Мифтахетдин Аҡмулла исемендәге Башҡорт дәүләт педагогия университеты доценты Айһылыу Хөсәйенова 20-21 быуаттар арауығында мәғрифәтселек фәлсәфәһе һәм этнопедагогика темаһын яҡтыртты. Сибай ҡалаһы ҡоролтайы эргәһендәге ата-әсәләр комитеты рәйесе Айбулат Уразбахтиндың "Урал батыр" эпосында йәшерен фекерҙәр - "Туҡланыу сере" тураһындағы сығышы ла ҡатнашыусыларҙы битараф ҡалдырманы. Конференцияла тәҡдимдәр ҙә күп булды. Башҡорт әҙәбиәте дәреслегенә Мәрйәм Бураҡаеваның балалар өсөн яҙылған әҫәрҙәрен индерергә, М. Бураҡаева уҡыуҙарын йыл һайын уҙғарырға, балалар баҡсаһынан уҡ бәләкәстәрҙе халыҡ педагогикаһына таянып тәрбиәләргә һәм башҡа фекерҙәр яңғыраны. Башҡа сығыштарҙа ла балаларыбыҙҙы халыҡ педагогикаһына таянып тәрбиәләйек, Мәрйәм апай башлаған юҫыҡта эште дауам итәйек тигән фекерҙәр яңғыраны. Ултырыш ойоштороусыларға, әүҙем ҡатнашыусыларға Рәхмәт хаттары тапшырыу менән тамамланды. Автор фотоһы.