Ҡәһүәне ҡасан эсеү файҙалыраҡ – ашағанға тиклемме, ашағандамы, әллә табындан һуңмы? Был турала бәхәс күптән бара. Күптәр был эсемлекте йоҡонан уяныу, көс-ҡеүәт туплау өсөн иртән эсә. Ҡайһы берәүҙәргә ул иртәнге ашты ла алмаштыра. Нутрициолог, Социаль технологиялар академияһының “Оҙон ғүмер һәм тормош сифаты” кафедраһының Юғары эксперттар советы ағзаһы Анна Макарова әйтеүенсә, һаулығы яҡшы кешегә ҡәһүәне ҡасан эсһә лә була, йәғни сикләүҙәр юҡ. “Шул уҡ ваҡытта ашҡаҙандың сей яраһынан, ашҡаҙан һутының саманан тыш әселегенән, эсәктәрҙең елһенеү синдромынан яфаланған кешеләргә был эсемлектән баш тартырға кәрәк”, – тип кәңәш бирә белгес. Ҡәһүә зыян килтермәһен тиһәгеҙ, уны: * көнөнә өс порциянан күберәк эсмәгеҙ; * ас ҡарынға эсмәгеҙ, сөнки ашҡаҙан-эсәк юлының гастрит, сей яра, панкреатит кеүек хроник сирҙәре ҡуҙғып китеүе ихтимал; * ҡәһүә менән алкоголде бергә эсмәгеҙ, йөрәккә, ҡан тамырҙарына, бөйөргә көсөргәнеш килеүе мөмкин; * кис йоҡларға ятҡанға тиклем дүрт сәғәт алдан эсегеҙ, сөнки ул нервы системаһын әүҙемләштерә, йоҡоноң сифатына йоғонто яһай; * ҡәһүә йөрәк тибеше йышлығын арттырыуы, артериаль ҡан баҫымын күтәреүе ихтимал, шуға сама белеү кәрәк. “Иң яҡшыһы – ҡәһүәне иртәнге йәки төшкө аш ваҡытында эсеү”, – ти Анна Макарова. Лилиә ДӘҮЛӘТБӘКОВА