Был тормошта һөнәр һайлауҙа һәр кемдең үҙ юлы. Кемдер бала саҡтан буласаҡ һөнәренә ғашиҡ була, икенселәр эшләй-эшләй һөнәренең үҙенеке икәнлеген аңлай. Нуриман районының күлдәргә бай Нимесләр ауылында тыуып үҫкән Зилә Фәттәхова бала саҡта уҡытыусы йәки табип булыу хыялы менән яна. Ауылда урта мәктәпте тамамлағас, Башҡорт дәүләт медицина университетына юллана, ләкин ҙур конкурс арҡаһында был уҡыу йортона инә алмай. Үҙенә яҙған икенсе бер юлы асыла уға. Яҡшы уҡыған ҡыҙҙы туған мәктәбенә пионервожатый итеп эшкә саҡыралар. Йәш кенә булһа ла икеләнеүһеҙ яңы эшкә тотона. – Бала саҡта староста, дружина советы председателе, комсорг булғас, был эш ҡурҡытманы, 17 йәшемдә мәктәптә хеҙмәт юлымды башланым. Белем алыу тураһында ла онотманым, ситтән тороп Башҡорт дәүләт университетына уҡырға индем, –тип башланып китте бөгөнгө көндә Яңы Күл урта мәктәбенең Нимесләр ауылындағы филиалы етәксеһе Зилә Фәттәхова менән һөйләшеүебеҙ. Һуңынан татар теле һәм әҙәбиәте дәрестәрен дә алып бара. Ваҡыт үтеү менән дипломлы белгескә эштең тағы ла яуаплырағы йөкмәтелә – мәктәп директоры урынбаҫары, директор вазифалары уға ышанып тапшырыла. – Татар теле һәм әҙәбиәте фәненән уҡытҡан йылдарымды, уҡыусыларым менән район, республика кимәлендәге олимпиадаларҙа ҡатнашҡан мәлдәрҙе айырыуса һағынам. Уҡыусыларым араһында мин уҡытҡан фән буйынса Башҡорт дәүләт педагогия институтын, Башҡорт дәүләт университетын тамамлаусылар булыуы минең өсөн дә ғорурлыҡ, – ти ул. Уҡыусыларына белем биреп кенә ҡалмай, үҙе лә туҡтауһыҙ камиллашыуға ынтыла Зилә Заһит ҡыҙы. Мәҫәлән, 2013 йылда республиканың татар теле һәм әҙәбиәте уҡытыусылары араһындағы конкурста үҙен һынай. “Тыуған яғым – гөлдәр иле” , “Халыҡ педагогикаһы традициялары нигеҙендә уҡытыу һәм тәрбиә эше” кластан тыш өлгөләре, сценарий китабы сығыуы ла уның һөнәри оҫталығын күрһәтә. Нимесләр мәктәбенең 90 йыллығына Ришат Исмәғилев менән берлектә уҡыу йорто тураһында китап әҙерләй. 2014 йылда белем һәм тәрбиә усағының башланғыс мәктәпкә әйләнеүе Зилә Заһит ҡыҙы өсөн яңы мөмкинлек аса. Ул башланғыс класс уҡытыусыһы һөнәренә әҙерлек үтеп, үҙен ошо өлкәлә һынай башлай. – Бәләкәй балалар менән эшләүе тағы ла яуаплыраҡ булыуын аңланым. Уларҙың һәр береһе иғтибарға мохтаж, һәр ҡайһыһының күңеленә юл таба белергә кәрәк. Башланғыс мәктәп кенә булыуға ҡарамаҫтан, район һәм республика кимәлендәге төрлө конкурстарҙа ла ҡатнашабыҙ. Мәктәп янындағы участкала баҡса үҫтереүме, яңы уҡыу йылына әҙерлек булһынмы – филиал һәр ваҡыт районда алдынғы урындарҙы биләй, – тип уңыштары тураһында ла бәйән итте Зилә Заһит ҡыҙы. 1978 йылда урта мәктәп булып асылып, әлеге көндә башланғыс белем биреүгә ҡалдырылған уҡыу йортонда 30 уҡыусы шөғөлләнә. Тап башланғыс кластарҙа баланың белемгә ынтылышы, тәрбиә нигеҙе һалыныуын аңлап, бәләкәй коллектив бөгөн дә тырышып хеҙмәт итә. Башланғыс мәктәп кенә булһа ла ҙур тарих һаҡлаған музейы булыуы менән дә һоҡландыра уҡыу йорто. Бында ауылдың геройҙары тураһында бай мәғлүмәт һаҡлана. Музейҙа батырлыҡ дәрестәре, класс сәғәттәре, осрашыуҙар үтә. Ошо рәүешле балаларға илһөйәрлек тәрбиәһе биреү күҙ уңынан ысҡынмай. Был тойғолар көндәлек тормошта ла сағыла. Махсус хәрби операцияла ҡатнашҡан егеттәргә ярҙам итеп, ойоҡбаш, бирсәткәләр бәйләүҙәре, башҡа кәрәк-яраҡтар алыуҙары ла ауылдаштарҙың берҙәмлеге һөҙөмтәһе. Уҡытыусы һәр заманда ла абруйлы һөнәр. Шуға матур итеп донъяһын да көтөргә, эште лә алып барырға өлгөрөргә кәрәк. Зилә Фәттәхова йәмәғәт эштәрендә ҡатнашырға ла ваҡыт таба. Ауыл советы депутаты булараҡ та ул халыҡ араһында. Мәктәп бинаһында райондың татар мәҙәниәте үҙәген булдырып, йолаларҙы һаҡлау йүнәлешендә эшләйҙәр. Ветеран уҡытыусылар, бөгөнгө хеҙмәт коллективы хеҙмәткәрҙәре менән түбәтәй, алъяпҡыстар, ҡалпаҡ сигеү буйынса матур башланғыстары бар. Башҡортостандың мәғариф отличнигы, 38 йыл ошо өлкәлә хеҙмәт итеүсе педагог эшендәге ҡаҙаныштары өсөн һәр саҡ үҙен аңлап ҡабул иткән тормош иптәшенә һәм балаларына ла рәхмәтле булыуын белдерҙе. Йөрәгеңә ятҡан һөнәр буйынса хеҙмәт итеүҙең ҡаҙаныштар ғына түгел, күңел кинәнесе биреүен дә күрәбеҙ Нуриман районының Нимесләр ауылы уҡытыусыһы өлгөһөндә. - Резеда ШӘҢГӘРӘЕВА Нуриман районы