Өткен жылы облыстағы улы химикаттар сақталатын қоймаларда тиісті талаптардың бұзылғаны үшін 2 млн теңгеге жуық айыппұл салынды, деп хабарлайды Qazaqstan Media тілшісі.
СҚО санитариялық-эпидемиологиялық бақылау департаментінің мәліметінше, өткен жылы улы заттар тұратын қоймаларға 11 тексеру жүргізілген. Нәтижесінде, талаптарды сақтамағандарға 2 млн теңгенің айыппұлы салынып, ол толығымен өндіріліп алынған. Тағы 4 нұсқама дайындалып, оның 3-уі уақытылы орындалды.
«Ұйғарымды орындамағаны үшін бір серіктестікке айыппұл салынып, сотқа берілді. Оның шешімімен заңды тұлға 200 АЕК – 612 мың теңге мөлшерінде әкімшілік жауапкершілікке тартылды», – дейді СҚО санитариялық-эпидемиологиялық бақылау департаментінің өнеркәсіптік, радиациялық қауіпті объектілерді бақылау және қадағалау бөлімінің бас маманы Галина Стацюк.