Башҡортостанда махсус хәрби операцияла ҡатнашыу өсөн яңы ирекле батальондар булдырыу республикала битараф булмаған, көслө ир-егеттәрҙең тыуған илде яҡларға һәр саҡ әҙер булыуы хаҡында һөйләй. Был турала Рәсәй Геройы Александр Доставалов исемендәге батальон хәрбиҙәре үҙҙәре лә аралашҡан саҡта әйтеп тора. Доставалов батальонында хеҙмәт иткән бер төркөм яугирҙәрҙең ялдары тамамланып, бөгөн, 9 мартта, махсус хәрби операция биләмәһенә юлландылар. “Терех” саҡырыу аҫтында йөрөгән яугир билдәләүенсә, башҡорт һалдаттары үҙҙәренә йөкмәтелгән хәрби бурыстарҙы лайыҡлы үтәй. Шуға ҡарамаҫтан, ул, “фронт һыҙығындағы өҫтәмә көс артыҡ булмаясаҡ”, ти. – Башҡортостанда үҙ ирке менән сафҡа баҫҡан һәм Ватанды яҡларға әҙер ир-егеттәр барлығын күреү бик ҡыуаныслы. Яҡташтары хәҡиҡәт өсөн көрәшкәндә ысын егет ситтә ҡалырға тейеш түгел. Минең ике балам бар, беҙ уларҙың тыныс киләсәген, шулай уҡ өлкән йәштәге граждандарыбыҙҙың тыныслығын һаҡлайбыҙ. Беҙҙең батальонда уртаса йәш - 40 самаһы, йәғни беҙ барыбыҙ ҙа өлгөрөп еткән ир-ат, шуға күрә нимә өсөн махсус хәрби операцияға барырға ҡарар иткәнебеҙҙе яҡшы аңлайбыҙ. Яңы батальондарҙағы иптәштәребеҙ ҙә был юлды аңлы рәүештә һайланы, тип уйлайым. Әлбиттә, уларҙың "ҡыҙыу нөктә"ләрҙә хеҙмәт итеү тәжрибәһе барҙыр. Шулай ҙа беренсе тапҡыр еңел булмаясағын иҫкә төшөрөп үтәйем. Әммә һуңынан барыһы ла эш ритмына ҡушыла. Буласаҡ яугирҙәргә сәләмәтлек теләйем, беҙ көслө һәм үҙ бурысыбыҙҙы үтәргә әҙер булырға тейеш. Барыбыҙ бергәләп еңеүгә өлгәшәсәкбеҙ, — тине “Терех”. Ул иптәштәренә батарейкалар алырға тип магазинға ингән, әммә магазин хужаһы бер ҡап батерейканы бушлай тотторған. – Батарейканан тыш, тағы ла минең иптәштәремә газ баллондары, аяҡ кейеме бауҙары, олтораҡ һәм башҡа хәрбиҙәргә кәрәкле әйберҙәр бирҙе һәм: “Яугирҙәребеҙгә алып бар, кәрәге тейер”, – тине, тип уртаҡлашты “Терех”. Башҡа яугирҙәр ҙә Башҡортостанда яңы батальондар булдырыуға ҡарата фекерҙәрен белдерҙе. “Тима” һәм “Ралли” саҡырыуы аҫтында йөрөгән егеттәр башҡорт ирекмәндәр берләшмәләренең татыулығы менән көслө булыуын, яугирҙәренең һуғыш яланында күп тапҡыр ҡаһарманлыҡ күрһәтеүе һәм батыр булыуын әйтеп китте. Улар яңы батальондар сафына инергә ҡарар иткән ир-егеттәр ҙә үҙҙәрен ҡаһармандар итеп күрһәтер, тип ышана. – Беҙ – көс, бергәләп тағы ла көслөрәк булып, еңеүгә өлгәшербеҙ, — тине ир-егеттәр. Мәғлүм булыуынса, Башҡортостанда махсус хәрби операцияла ҡатнашыу өсөн ике яңы ирекмәндәр батальоны ойошторола. Уларҙың береһе Даян Мурзин исемен йөрөтәсәк, икенсеһе — “Төньяҡ амурҙары”. Әле республикала төҙөлгән өс батальон Донбасс ерен яҡлай, уларға республика бар яҡлап ярҙам итә. “Республика экипировка, кәрәкле техника, яугирҙәргә һәм уларҙың ғаиләләренә ярҙам итеү буйынса өҫтәмә саралар менән бәйле бөтә нәмә менән хәстәрләүҙе үҙ өҫтөнә ала. Егеттәр бик мөһим эш башҡара һәм илгә ныҡ ярҙам итә. Яугирҙәребеҙ һаҡлаулы һәм үҙ бурыстарын үтәүгә әҙер булһын өсөн барыһын да эшләйәсәкбеҙ, – тине республика Башлығы Радий Хәбиров. Фото һәм мәғлүмәт сығанағы: Башинформ.