Վրաստանի իրավապահ մարմինների աշխատակիցները երկու օրում խորհրդարանի մոտ բողոքի ակցիաների ժամանակ ձերբակալել են 133 մարդու: TASS-ի փոխանցմամբ՝ այս մասին այսօր հայտնել է Վրաստանի ՆԳՆ մամուլի ծառայությունը։
Նշվում է, որ մարտի 7-8-ը Վրաստանի խորհրդարանի տարածքում մարդիկ ձերբակալվել են տարբեր իրավախախտումների փաստերով: Ըստ Վրաստանի ՆԳՆ-ի՝ հարուցվել են քրեական գործեր մանր խուլիգանության, ոստիկանությանն անհնազանդություն հայտնելու, ոստիկանների վրա հարձակվելու հատկանիշների հիման վրա:
Վրաստանի ոստիկանությունը նաև հայտարարել է, որ այսօր գիշերը բողոքի ցույցերի ժամանակ տուժել է ոստիկանության 10 աշխատակից, կան տուժածներ նաև քաղաքացիական անձանց շրջանում:
Հիշեցնենք, որ վերջին օրերին Թբիլիսիում բողոքի ցույցեր էին սկսվել: Մարտի 7-ի երեկոյան ոստիկանությունը նաև ջրցան մեքենա և արցունքաբեր գազ էր կիրառել օտարերկրյա գործակալների մասին օրինագծի առաջին ընթերցմամբ ընդունման դեմ բողոքի ակցիան ցրելու համար:
Մարտի 7-ին Վրաստանի խորհրդարանի պատգամավորներն առաջին ընթերցմամբ ընդունեցին օտարերկրյա ազդեցության գործակալների մասին օրինագիծը: Գաղափարի հեղինակներն են «Ժողովրդի ուժ» հասարակական շարժումը և իշխող «Վրացական երազանք» կուսակցության առաջնորդները։ Նախաձեռնությունը ընդդիմության և Արևմուտքի երկրների քննադատությունն է առաջացրել օրենսդրության մեջ օտարերկրյա գործակալ հասկացություն մտցնելու պատճառով:
Այսօր հայտնի դարձավ, որ Թբիլիսիում իրավիճակը գիշերը թեժացել է: Վրաստանի ՆԳՆ ուժերը ջրցան մեքենաներ և արցունքաբեր գազ էին կիրառել:
Հավելենք, որ ավելի ուշ հայտնի դարձավ, որ Վրաստանի խորհրդարանից հետ են կանչել օտարերկրյա գործակալների մասին օրինագիծը: