Ավելի ու ավելի հրատապ է դառնում ԼՂ և Լաչինի միջանցք փաստահավաք առաքելություն ուղարկելու անհրաժեշտությունը։ Այս մասին կառավարության մարտի 9-ի նիստի ժամանակ ասաց ՀՀ վարչապետ Նիկոլ Փաշինյանը։
Նա նշեց, որ Ադրբեջանի գործողությունները Լաչինի միջանցքի փակ լինելու պայմաններում նոր դիվերսիա և իրավիճակի սրացում սկսելու առումով մի քանի նպատակ են հետապնդում։ Նախ նրանք ցանկություն ունեն վիժեցնել Ստեփականերտի հետ բանակցությունները և հետագա նոր սադրանքի համար անհրաժեշտ ֆոն ստեղծելն է։
«Երեկ ԼՂ ԱԳՆ-ն հանդես է եկել հայտարարությամբ՝ արտահայտելով պատրաստակամություն շարունակելու խոսակցությունը Ադրբեջանի հետ և սա չափազանց կարևոր հայտարարություն է։ Կարծում եմ՝ պետք է հուսալի մեխանիզմ ստեղծել, որ Բաքու-Ստեփանակերտ անխափան և ինստիտուցիոնալ խոսակցություն տեղի ունենա և սա միջազգային պայմանավորվածության իրացման արդյունավետ երաշխիք կարող է դառնալ»,- ասաց վարչապետը։
Սադրանքի հաջորդ նպատակն, ըստ Փաշինյանի, այն է, որ Ադրբեջանն ուզում է կեղծ ապացույցներ ստեղծել, թե Հայաստանից դեպի Ղարաբաղ զենք-զինամթերք է տեղափոխվում։
«Այս թեման Ադրբեջանի համար կարևոր է հատկապես արդարադատության միջազգային դատարանի փետրվարի 22-ի որոշումից հետո, երբ այն միանշանակ և աներկբա մերժեց Հայաստանի նկատմամբ ժամանակավոր միջոց կիրառելու Ադրբեջանի պահանջը, որով Հայաստանին մեղադրում է ականապատում իրականացնելու մեջ»,- շեշտեց Փաշինյանը։
Նա նշեց, որ երեք ոստիկանները, որոնք զոհ գնացին Ադրբեջանի ահաբեկչական ակտին մարտի 5-ին, ծնվել մեծացել են Արցախում, այնտեղ ընտանիքներ կազմել ու երեխաներ ունեցել, մինչդեռ Մյունխենում Ալիևը հայտարարել էր, որ իրենք պատրաստ են Ղարաբաղի հայության հետ քննարկել նրանց իրավունքների հարցը։
Հիշեցնենք, որ մարտի 5-ին՝ ժամը 10։00-ի սահմաններում, ադրբեջանական զինուժի դիվերսիոն խումբը թիրախավորել և կրակ է արձակել ԱՀ ոստիկանության անձնագրային և վիզաների վարչության անձնակազմի հերթափոխի մեքենայի վրա։ Դիվեսիայի հետևանքով զոհվել է ոստիկանության 3 ծառայող, կա մեկ վիրավոր: Զոհված ծառայողներն են փոխգնդապետ Արմեն Մայորի Բաբայանը, մայոր Դավիթ Վալերիի Դանիելյանը, լեյտենանտ Արարատ Թելմանի Գասպարյանը:
Մանրամասները՝ տեսանյութում։