“Башинформ” мәғлүмәт агентлығында яҙғы ташҡынға һәм янғын сығыу йәһәтенән хәүефле миҙгелгә әҙерлеккә арналған матбуғат конференцияһы үтте. Был турала Рәсәй Ғәҙәттән тыш хәлдәр министрлығының Башҡортостан буйынса Баш идаралығы начальнигы Марат Латипов һөйләне. Үҙенең сығышында ул быйыл ташҡын мәлендә күҙалланған зыянды кәметеү маҡсатында былтыр йәйге-көҙгө осорҙа илле миллиондан ашыу һумға иҫкәртеү саралары башҡарылыуын билдәләне, бында ярҙы нығытыу, йылға үҙәндәрен таҙартыу, гидротехник ҡоролмаларҙы капиталь ремонтлау һ.б. инә. Боҙ тығындары фаразланған участкаларҙа шартлатыу эштәре алып барыуға килешеүҙәр төҙөү ҙә яҙғы ташҡынды хәүефһеҙ уҙғарыуға йүнәлтелгән. Күп йыллыҡ күҙәтеүҙәргә ҡарағанда, биләмәлә ташҡын йәһәтенән 200-ҙән ашыу хәүефле йылға иҫәпләнә. Ағиҙел, Өфө, Дим һәм тигеҙ урындарҙағы бәләкәй йылғалар йыш ҡына ярҙарынан сыға. Тупраҡтың туңыу тәрәнлеге, ҡар ҡатламының уртаса күп йыллыҡ күрһәткестәренән тайпылышы ла ташҡын торошона йоғонто яһай. Был күрһәткестәрҙең барыһы ла анализланып, алдан күҙаллауҙар эшләнә, шулай ҙа яҙҙың ҡапыл килеүе ташҡын барышына йоғонто яһамай ҡалмай. Журналистар менән осрашыуҙа шулай уҡ Башҡортостандың урман хужалығы министры Марат Шәрәфетдинов, Башҡортостандың Ғәҙәттән тыш хәлдәр буйынса дәүләт комитеты рәйесе Фәрит Ғүмәров һәм башҡалар булды. Конференция мәлендә яҙғы-йәйге осорҙағы янғын сығыу йәһәтенән хәүефле миҙгелгә әҙерлек тураһында ла һүҙ барҙы. Иҫкәртеү саралары уҙғарыу, урман янғындарын иртә асыҡлау буйынса эш башланған. Үткән йыл тәжрибәһе лә сараларҙың һөҙөмтәлелеген күрһәткән. Урман янғындарын асыҡлауҙа “Урман һаҡлаусы” видеокүҙәтеү камералары ҙур роль уйнай. Былтыр алты муниципаль районда ошондай 12 камера ҡуйылған. Улар ярҙамында 13 урман янғыны тиҙ арала асыҡланып, юҡ ителгән. Ваҡытында күрелгән саралар арҡаһында ут ауылдарға, иҡтисад объекттарына күсмәй ҡалған. Әле дөйөм оҙонлоғо биш мең километрға тиң авиация патрулләүенең туғыҙ маршруты билдәләнгән. Былтыр дөйөм осош ваҡыты 600 сәғәттән ашҡан, был 2021 йыл менән сағыштырғанда өс тапҡырға күберәк. Бындай саралар быйыл да дауам итәсәк. Автор фотолары.