“Яндарында бер сәғәт кенә булһаҡ та, үкенерлек түгел!”

Сочи ҡалаһында йәшәгән милләттәшебеҙ Илүзә Тоҡомбәтова шәхси сәхифәһендә түбәндәге яңылыҡ менән бүлешкән. “Февраль айы Сочи башҡорттары өсөн үтә көсөргәнешле булды: махсус хәрби операцияла ҡатнашҡан яҡташтарыбыҙ өсөн гуманитар ылау йыйыу менән мәшғүл булдыҡ. Милләттәштәребеҙ һәр береһе хәленән килгәнсә ярҙамға килде. Ҡыҫҡа ғына ваҡыт эсендә төрлө бүләктәр, кейем-һалым, оҙаҡ һаҡлана торған аҙыҡ-түлек һатып алдыҡ. Мәктәп уҡыусылары сәләм хаттары яҙҙы. Әүҙемсебеҙ Рәхилә Марат ҡыҙы Тайыпова ҡатын-ҡыҙҙарыбыҙ менән 100 пластик һауытҡа бауырһаҡ, Кинйәбикә Мәжит ҡыҙы Мөхәмәтйәнова – талҡан, беҙ ирем Руслан менән 280 окоп шәме әҙерләнек. 4 мартта ике машина менән яҡташтарыбыҙ янына юл тоттоҡ. Беҙҙе Ҡырым башҡорттары диаспораһы вәкилдәре Алина һәм Гүзәл Симферополь ҡалаһында ҡаршы алып, изге сәфәребеҙҙә оҙатып йөрөнө. Башҡорт тирмәһе формаһындағы данлыҡлы блокпоста Башҡортостаныбыҙҙың флагын күреү беҙҙең өсөн бик ҡыуаныслы булды. Арыу-талыуҙы бер нисә минутҡа онотоп торҙоҡ. Республика егеттәре өсөн дә ҡыуаныслы, көтөлмәгән осрашыу булды был. Бүләктәребеҙҙе тапшырып, хәл белешеп, юлыбыҙҙы артабан дауам иттек. Беҙҙе алдағы блокпост көтә ине. Бында Саҡмағош егеттәрен бүләктәр менән ҡыуандырҙыҡ. Тәғәйенләнгән ергә барып етеп, командир менән танышып, килтергән күстәнәстәребеҙҙе тапшырып, хәлебеҙҙән килгәнсе яҡын тирәләге блокпостарҙа торған яҡташтарыбыҙ менән күрешергә юлландыҡ. Һәр береһендә тулҡынландырғыс осрашыуҙар, күрешеүҙәр булды, сөнки сит тарафтарҙа яҡташтарың да туғаныңдай ҡәҙерле бит ул! Ваҡыт тиҙ арала үтеп тә китте. Херсон менән Запорожьела киске ваҡытта комендант сәғәте бар ине. Бер ай тирәһе әҙерләнеп тә, мобилизацияланған яҡташтарыбыҙ эргәһендә бер сәғәт кенә булһаҡ та, бер ҙә үкенесле түгел, сөнки ошо ваҡыт арауығында яугирҙәребеҙгә өй йылыһы, тыуған яҡ күстәнәстәре, шатлыҡлы минуттар бүләк итә алдыҡ. Беҙ бик шатбыҙ! Ошо изге сәфәребеҙҙе ойошторорға ярҙам иткән Сочи башҡорттарына, һәр яҡташыма, финанс ярҙам күрһәткән халҡым вәкилдәренә, өс көн руль артында булған Руслан менән Павелға, йылы хаттар яҙған мәктәп уҡыусыларына, юлда оҙатып йөрөгән "Музей" позывнойлы замполитка сикһеҙ рәхмәт белдерәбеҙ!” - тип яҙған Илүзә Тоҡомбәтова. Сит ерҙә йәшәүгә ҡарамаҫтан, милли рухты һаҡлаған, берҙәм булған яҡташтарыбыҙға һоҡланабыҙ – афарин! Фото һәм видео: Илүзә Тоҡомбәтова.