Хыялыңдан ҡурҡырға ярамай

Мөләйем, ихлас был йәш ханымға тәүге ҡараштан шул тиклем тәүәккәллек хастыр тип уйламайһың да. Ләкин йәш кенә булһа ла, уның бөгөнгө уңыштары нигеҙендә үҙенең тырышлығы һалынған булыуын аңлайһың. “Ҡала ипотека үҙәге” яуаплылығы сикләнгән йәмғиәтенең хужаһы, Ейәнсура ҡыҙы Рүзилә Мостафина бөгөн Мәскәүҙә йәшәһә лә, был ҡаланан тыш, Өфө, Ҡазан, Стәрлетамаҡ, Сорғот, Солнечногорск ҡалаларында ла эшен йәйелдергән, унда ла хеҙмәткәрҙәре бар. Шулай уҡ сит илдәрҙә лә партнерҙар булдырған. Эшҡыуарлыҡҡа ынтылышы уның бала сағынан һалынған. Гимназияла уҡыған сағында яҙған иншаһында ла киләсәктә ниндәй һөнәр эйәһе булыуы асыҡ сағыла. Быны йылдар үткәс, мәктәптәге бер осрашыу мәлендә уҡып хәтеренә төшөрәләр. Рүзилә яҙмаһында үҙен киләсәктә эшлекле, талапсан эшҡыуар итеп күрә, ҡулы аҫтында хеҙмәткәрҙәр буласағын тасуирлай. Ысынлап та, бала саҡтағы хыялы йылдар үткәс тормошҡа аша – ул аяғында ныҡлы баҫып торған, белемле, үҙ эшенә яуаплы ҡараған етди эшҡыуарға әүерелә. Хыялына ваҡ аҙымдар менән бара ул. Тәүҙә Башҡорт дәүләт университетында “Иҡтисад һәм идара итеү” белгеслеге буйынса белем ала. Был уға инвестициялар тураһында белергә, аҡсаны нисек отошло итеп эшкә һалырға һәм тиҙ арала хаҡын ҡаплау ысулдарын асыҡларға булышлыҡ итә. Юриспруденция буйынса магистратураға инеп, “Эшҡыуарлыҡ хоҡуғы” йүнәлешендә белем алыуы ла киләсәктә ярҙам итә. Студент сағында банкта эшләргә лә өлгөрә, был иһә артабанғы эшендә файҙаға була. Шул ваҡыттағы тәжрибәһе ҡатмарлы хәлдәрҙә ипотека юллағанда ярҙам итә. 2019 йылда үҙенең эшен асып, бөгөнгәсә ошо йүнәлештә ныҡлы эшләй йәш эшҡыуар. – Минең юридик белемле булыуым проблемаларҙы законлы рәүештә хәл итергә булышлыҡ итә. Ни өсөн фатир һатып алғанда риелтор менән эшләү кәрәк? Сөнки мутлашыу осраҡтары бик күп. Ошолай килеп сыҡмаһын өсөн милек документтарын төрлө яҡлап тикшереү мөһим. Аҙаҡ ниндәйҙер күңелһеҙ осраҡ килеп сыҡһа, намыҫлы һатып алыусы булыуҙы иҫбатлау өсөн байтаҡ мәшәҡәттәр тыуа, сығымдар китә. Һигеҙ йыл күсемһеҙ милек өлкәһендә эшләү дәүеремдә уңышһыҙлыҡҡа тарыған, күңелһеҙ хәлдәргә юлыҡҡан бер осраҡ та булманы. Миңә бер мөрәжәғәт иткән клиенттар ҡабат килә. Улар араһында танылған кешеләр ҙә байтаҡ. Мәҫәлән, билдәле башҡорт блогерҙары ла, “Руки Вверх!” төркөмөнән дә, Кристина Орбакайте командаһынан да мөрәжәғәт итеүселәр бар. Тәүҙә фатир һатып алып, аҙаҡ торлаҡтарын киңәйтеп йортло булған клиенттарыбыҙға ҡарап һөйөнәбеҙ. Эшҡыуарлыҡта уңышҡа өлгәшәм тиһәң, иң беренсе белемле булыуың, алға ҡуйған маҡсатың булыуы мөһим. Шулай уҡ хыяллана белергә һәм уны тормошҡа ашырыуҙан ҡурҡмаҫҡа ла кәрәк, – ти Рүзилә Мостафина. Уңышлы эшҡыуар булыуҙың сере нәҫелдән дә киләлер. Әңгәмәсемдең атаһының ике юғары белем алыуы, етәкселек өлкәһендә тәжрибәһе, эште ойоштора белеү сифаттары ҡыҙына ла күскәндер, тигән уй тыуа. Рүзилә Мостафина үҙ эшен асҡас та иң беренсе атаһынан хуплау һүҙен ишетә. “Афарин, ҡыҙым! Дөрөҫ эшләгәнһең! Мин һиңә ҡулдан килгәнсә ярҙам итермен!” – тиеүе эшенә этәргес бирә. “Тормош ябай түгел. Ҡатмарлы, ауыр мәлдәре лә һорап тормай. Шул ваҡытта төшөнкөлөккә бирелергә ярамай, һәр хәлдән дә сығыу юлы бар”, – тигән кәңәштәрен еткерә үҙе лә ауыр һынауҙар алдында юғалып ҡалмаған әңгәмәсем. Тормош һуҡмағында яңғыҙы тороп ҡалғанда ла аяғына баҫырға көс таба Рүзилә Илдар ҡыҙы. Үҙенең ныҡышмалығы, тәүәккәллеге, тырышлығы менән ул бөгөн илебеҙҙең баш ҡалаһында төпләнеп, үҙ эшен уңышлы алып бара. Һынауҙарға һынмаған, киреһенсә, нығынған, үҫеш алған Ейәнсура ҡыҙына киләсәктә лә эшенең һәм тормошоноң уң барыуын теләйбеҙ. Рүзилә Мостафина ярҙамы менән фатирлы йәки йортло булырға теләгәндәр уға түбәндәге телефон буйынса мөрәжәғәт итә ала: 8-927-347-18-86. Гөлсирә СӘХИЕВА