Мәсетле районының Яңы Яуыш ауылында "Айыҡ ауыл" конкурсы сиктәрендә "Пар мендәрҙәр" тип исемләнгән бик матур, үҙенсәлекле байрам-конкурс үтте. Байрамға күрше Салауат, Балаҡатай, Ҡыйғы райондарынан, үҙебеҙҙең Мәсетле районының ауылдарынан оҫталар йыйылды. Ҡунаҡтарҙы ҡурай моңо, сәк-сәк, ҡымыҙ, буҙа менән ҡаршы алдылар.Тамаша залына инеү менән матур биҙәлгән сәхнә, күҙҙең яуын алып торған оҫталарҙың ҡул эштәре күргәҙмәһе бөтә халыҡты һоҡландырҙы. Ә байрамға килгән фольклор коллективтарының, беҙҙең төньяҡ-көнсығыш ҡатын-ҡыҙҙарына ғына хас булған, сағыу биҙәкле милли кейемдәре! Сәхнәлә Яңы Яуыш, Иҫке Мишәр ауылдарының үҙешмәкәр артистары ҡаҙ мамығынан мендәр тултырыу йолаһын күрһәтте. Оло быуын ҡатын-ҡыҙҙары йәштәргә нисек итеп ҡауырһынды таҙаларға, мамыҡтың ниндәйен һайларға, ҡауырһындарҙың ҡалдыҡтарын изге теләктәр теләп һыу буйҙарына ағыҙырға кәрәк булыуын өйрәттеләр. Йәш ғаиләләргә иһә, өйләнешкәс бер яҫтыҡта ятыу ғаиләнең ныҡлы һәм бер уйлы булыуы тураһында ырымдарҙы аңлаттылар. Ҡунаҡҡа килгән фольклор коллективтары ла тамашасыларҙы үҙҙәренең йырҙары, бейеүҙәре, шиғырҙары менән ҡыуандырҙы. Һәр сығышты ауыл халҡы ҡайнар алҡыштарға күмде. Ә жюри оҫталарҙың ҡул эштәрен баһалап сыҡты. Бер эш тә иғтибарһыҙ ҡалманы. Оҫталар төрлө номинацияларҙа грамоталар, дипломдар, рәхмәт хаттары менән бүләкләнде. Шундай сағыу, йөкмәткеле байрам ойошторған, ауылдаштарын ҡыуандырған мәҙәниәт хеҙмәткәренә ауыл халҡы ҙур рәхмәтен белдерә. Фәилә Нәбиуллина яҙмаһы. Фотолар: vk.com/club20916055, vk.com/id45309041, vk.com/club156689222