Йәштәр фатиха алды

Учалы районы башҡорттары ҡоролтайы хәбәр итеүенсә, ошо көндәрҙә Илсеғол ауылында “Айыҡ ауыл” республика конкурсы сиктәрендә ҙур фольклор байрамы – ҡышҡы һабантуй гөрләп үткән. “Сарала ҡатнашыусыларға һәм ҡунаҡтарға сағыу йөкмәткеле программа әҙерләнгән ине. Райондың ижади коллективтары әҙерләгән бай концерт, ат сабыштары, уҡтан атыу, тәмле аш-һыуҙар рәттәре һәм башҡа төрлө халыҡ уйындары бер кемде лә битараф ҡалдырманы. Байрамға мәртәбәле ҡунаҡтар ҙа килгән ине. Бөтә донъя башҡорттары ҡоролтайы Президиумы рәйесе, Рәсәй Дәүләт Думаһы депутаты Эльвира Айытҡолова, Бөтә донъя башҡорттары ҡоролтайының Башҡарма комитет ағзаһы Морат Лоҡманов, Башҡортостандың халыҡ артисы Вилдан Яруллин, район хакимиәте башлығының ауыл хужалығы буйынса урынбаҫары Айҙар Заһиров, Учалы районы башҡорттары ҡоролтайы рәйесе Мозафар Ҡадиров ҡатнашыусыларҙы сәләмләне. Ҡышҡы һабантуйҙы юғары кимәлдә ойоштороусыларға, башҡорт халҡының милли йолаларын һаҡлау һәм үҫтереү һағында торғандарға рәхмәт һүҙҙәре әйтелде, “Айыҡ ауыл” конкурсында уңышлы сығыш яһауҙарына өмөт белдерелде. Был көндө Илсеғол ауылының иң көслө, иң сос батыры билдәләнде. Спорт уйындары өлкәндәр өсөн дә, балалар өсөн дә ойошторолдо. Ат сабыштарында егерменән ашыу ат ҡатнашты. Хатта Силәбе өлкәһенән дә килгәндәр ине”, – тип яҙа учалылар. Атап әйткәндә, "Ауҙарыш" бәйгеһендә Динар Фәтҡуллин еңгән, икенсе урында – Тимур Ураҙов, өсөнсөлә – Айтуған Ғәниев. Ат сабышында ла һынатмаған учалылар. Район хакимиәте башлығы призына ойошторолған сабышта беренселекте Радик Фазлетдинов бирмәгән. Юрий Ғәтиәтуллин менән Фәнис Хәмиҙуллин икенсе һәм өсөнсө урындарҙы бүлешкән. “Авангард” яуаплылығы сикләнгән йәмғиәте призына (етәксеһе – С.В. Гисыч) үткән бәйгелә беренсе урынды Зәүер Рамаҙанов, икенсене – Илшат Ихсанов, өсөнсөнө Владислав Смирнов яулаған. Илсеғол ауыл Советы башлығы призына булған ярышта иҙә Радиик Фазлетдинов, Илнур Хисамов, Вәрис Сафиуллин тәүге өс урынды алған. Шулай уҡ, “Әлимов” шәхси предприятиеһы, “Алтын Яр” ойошмаһы ла үҙ приздарын уйнатҡан. “Ауҙарыш” уйыны иһә Учалы районы башҡорттары ҡоролтайы призына ойошторолған. Бер төркөм әүҙемдәргә рәхмәт хаттары тапшырылған. Күркәм сараның аҙағында мосолман ҡанундарына ярашлы никахлашыу йолаһы үткәрелгән. “Айбулат Абшаһитов һәм Гөлнур Мөхәмәтйәрова ғаилә ҡороу өсөн Аллаһ Раббыбыҙҙың фатихаһын алдылар. Уларҙы район советы сәркәтибе Зариф Ғарипов, социаль сәйәсәт буйынса ҡала хакимиәте башлығы урынбаҫары Гүзәлиә Шәғәлина ҡотлап ките”, – тип яҙалар Учалы районы башҡорттары ҡоролтайы төркөмөндә. Беҙ, үҙ сиратыбыҙҙа, йәштәргә бәхет, уңыштар һәм тиң-тигеҙ ғүмер теләйбеҙ! Фото: Учалы раойны башҡорттары ҡоролтайы. Видео: Учалы телерадиостудияһы.