Ауыл хужалығы кооперативында - иген киптереү комплексы

Ишембай районында “Передовик” ауыл хужалығы кооперативы “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проектын (национальный проект "Малый и средний бизнес и поддержка индивидуальной предпринимательской деятельности") тормошҡа ашырыу барышында алынған грант аҡсаһына иген киптереү комплексы төҙөнө, тип хәбәр иттеләр республиканың Ауыл хужалығы министрлығынан. "Көҙгө ямғырлы осорҙа иген культураларын һәм көнбағышты киптереү айырыуса ауыр. Был проблемаға менән күп кенә фермерҙар тап була. Дәүләт яғынан финанс ярҙамы менән грант программаһы сиктәрендә беҙ иген киптереү комплексы өсөн техника һәм ҡорамалдар, телескоп тейәгес, тағылмалы ике самосвал һатып алдыҡ. Был үҙебеҙҙең продукцияның сифатын һәм күләмен арттырырға мөмкинлек бирҙе. Ауыл хужалығы кооперативтарына ярҙам итеү буйынса бындай программаларҙа беренсе тапҡыр ғына ҡатнашмайбыҙ, 2018 йылда төбәк килем килтереүсе проекттар программаһында ҡатнаштыҡ. Ул саҡта өс миллион һум күләмендәге грант аҡсаһына "КамАЗ" базаһында һөт ташыу машинаһы һатып алынды”, — тип һөйләне ауыл хужалығы кооперативы рәйесе Евгений Едих. Шулай уҡ иген киптереү комплексын һатып алыу иген һәм көнбағыш эшкәртеү, таҙартыу, киптереү буйынса көнүҙәк мәсьәләне хәл итергә мөмкинлек бирҙе. 2021 йылда ауыл хужалығы кооперативының матди-техник базаһын үҫтереү программаһында ҡатнашыусы булараҡ кооператив 25 миллион һум күләмендә грант алды. Билдәләп үтергә кәрәк, учреждение 2017 йылдан эшләп килә. Кооператив составында 11 пайсы. Уның эшмәкәрлегенең төп йүнәлеше — һыйыр малы үрсетеү һәм һөт, һөт продукцияһы етештереү. Былтыр кооператив ағзалары 3857,5 тонна һөт, 2021 йылда 3953,5 тонна һөт, 266,7 тонна бойҙай, 1458 тонна көнбағыш һатҡан. “Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проектының маҡсаты — башланғыс идеянан алып экспортҡа сығыуға тиклем бөтә үҫеш этаптарында бизнесҡа ярҙам итеү. Рәсәй Президенты Владимир Путин тәҡдим иткән милли проекттар 2019 йылда тормошҡа ашырыла башланы. Фото: agriculture.bashkortostan.ru