Башкортстанның социаль-икътисади үсеше буенча киңәшмә узды

Фикер алышуда Федерация Советының Фән, мәгариф һәм мәдәният комитеты рәисе Лилия Гомәрова, Русия Президентының Идел буе федераль округындагы Вәкаләтле вәкиле урынбасары Алексей Кузьмицкий, Русия Хөкүмәте каршындагы Аналитик үзәк җитәкчесенең беренче урынбасары Дмитрий Годунов, Башкортстан Хөкүмәте әгъзалары, республика министрлыклары һәм ведомстволары җитәкчеләре катнашты.Киңәшмәне ачып, Русия Хөкүмәте вице-премьеры төбәкнең илдәге төп социаль-икътисади күрсәткечләр буенча югары позицияләрен билгеләп үтте.- Башкортстан сөт җитештерү буенча беренче урында тора. Авыл хуҗалыгы продукциясен җитештерү индексы бик нык үскән, - диде Дмитрий Чернышенко. - Сез тотрыклы рәвештә инвестицион җәлеп итүчәнлекнең милли рейтингы лидерларының беренче бишлегенә керәсез. Бу - шул исәптән, шәхсән Радий Фәритович үзе үткәргән “Инвестсәгать” форматында республика Инвестиция комитетының эшчәнлеге нәтиҗәсе. Эшсезлек тарихи минимумда, Башкортстанда ул Русия буенча уртача күрсәткечләрдән түбәнрәк - 2,8 процент.Төбәк казанышлары арасында ил Хөкүмәте Рәисе урынбасары Евразия НОЦы төзелә башлавын, шулай ук туристлык тармагы үсешенең яхшы темпларын билгеләп үтте.- Киләсе елда Башкортстан башкаласы Уфаның 450 еллыгын билгеләп үтәчәген беләм. Юбилей төбәкнең социаль-икътисади һәм туристлык үсешенең өстәмә драйверы булачак. Ышанам, сез үз мөмкинлекләрегезне тулысынча файдаланырсыз, - дип өстәде Дмитрий Чернышенко.Башкортстан Башлыгы үз чыгышында 2022 елның төп нәтиҗәләре һәм төбәкнең социаль-икътисади өлкәсен ныгыту буенча алдагы адымнар турында сөйләде.- Ике ел рәттән Башкортстан - илдә сәнәгать сәясәтен тормышка ашыру буенча иң яхшысы. Беренче Милли фәнни-технологик үсеш рейтингында югары дүртенче урынны яуладык, - дип билгеләде Радий Хәбиров. - Кластерлы модельне уңышлы гамәлгә ашырабыз. Русия Сәнәгать һәм сәүдә министрлыгы безне кластерларны үстерүдә яңа алымнар кертү буенча сынау төбәге итеп билгеләде. Федераль реестрга илдә беренче җиһаз кластеры, шулай ук республиканың авиация һәм сәнәгать кластерлары кертелде. Теркәлү стадиясендә - җиңел сәнәгать һәм форма киеме кластеры. Узган ел йомгаклары буенча Башкортстан кластерлар саны буенча лидерлар рәтендә.Киңәшмә азагында Радий Хәбиров Дмитрий Чернышенкога һәм Русия Хөкүмәтенә республика инициативаларына ярдәм күрсәткәннәре һәм уртак нәтиҗәле эшчәнлек өчен рәхмәт белдерде.Фото: glavarb.ru