“Альтернатива” җәмгыятенең чит илләрдәге партнерлары арасында Кытай Халык Республикасы фирмалары иң ышанычлылардан санала. Хәзерге чорда заводта уңышлы эшләүче технологик җиһазлардан пресс-формаларның һәм автоматлаштырылган станокларның күпчелеге элегрәк Кытайдан кайтартылган иде. Ковид пандемиясенә бәйле, “Альтернатива”ның Кытай фирмалары белән бәйләнешендә өзеклек барлыкка килде. Ниһаять, өч елдан соң эшлекле хезмәттәшлекнең тергезелүенә өмет бар. Шушы көннәрдә “Альтернатива”да Кытайның төрү материалы – полиолефин пленкасы җитештерү һәм реализацияләү белән шөгыльләнүче халыкара предприятие җитәкчеләре эш сәфәрендә Октябрьскийда булып китте. - Безнең заводта полиолефин чималы 300 төр эшләнмәдә кулланыла, - ди “Альтернатива”ның генеральный директоры Раил Фәхретдинов. – Элекрәк без аны Русия дистрибьютерларыннан сатып ала идек. Үткән елның сентябрендә Кытайның Сучжоу шәһәрендә полиолефин җитештерүче завод барлыгы ачыкланды, кичекмәстән аның белән турыга бәйләнешкә чыктык. Октябрьдә исә 12 тонна пленкага заказ бирелде. Белүебезчә, пандемия чорында Кытай икътисадында тоткарлыклар туды, әмма безнең партнерлар килешүне вакытында үтәү өчен зур тырышлык салды. Нәтиҗәдә, быел гыйнварда заказыбыз “Альтернатива”га килеп җитте. Мондый ышанычлы партнерлар безнең өчен бик кадерле. Кытай фирмасы вәкилләре Русиянең берничә регионында башка партнерлары белән дә очрашулар оештырган, шул ук вакытта, “Альтернатива”да булырга да форсат тапкан. Кунаклар өчен завод цехлары буенча экскурсия үткәрелде, алар җитештерү мәйданчыкларының эш процесслары белән җентекле танышты. - Партнерларыбыз - югары дәрәҗәдәге белгечләр, моңа өстәп, бик тә ачык күңелле кешеләр булып чыкты, - дип тәссоратлары белән уртаклашты Раил Камил улы. - Иң мөһиме - завод аларга нык ошаган. Иң беренче чиратта, зурлыгы, цехларның иркенлеге һәм технологик коралланышы белән. Кунакларга полиолефин пленкасының җитештерү процессында ничек кулланылуын да күрсәттек. Әйтергә кирәк, алар чыгарылучы продукциянең сыйфатын яхшырту буенча эшлекле киңәшләре белән дә уртаклашты. Тәкъдимнәр бик тә урынлы булды, без яңалыкларны нәтиҗәле файдалану максатында кичекмәстән чаралар күрәчәкбез. Очрашу барышында партнерлар белән эшлекле бәйләнешләрне озайлы дәрәҗәдә үстерү юнәлешендә махсус килешүләр кабул ителде. Кунак ашы - кара-каршы, дигәндәй фирма вәкилләре “Альтернатива” җитәкчесен Кытайга эшлекле очрашуга чакырды. Моннан тыш, игелекле партнерлар эш сәфәрен югары дәрәҗәдә оештырган өчен рәхмәт йөзеннән “Альтернатива”га чимал сатып алу буенча киләсе заказга 3 процент күләмендә ташлама ясады. Автор фотосы.