Հայաստանի հունահռոմեական ոճի ըմբշամարտի հավաքականը 5 մեդալ է նվաճել Բուլղարիայի մայրաքաղաք Սոֆիայում անցկացված Դան Կոլովի և Նիկոլա Պետրովի անվան հուշամրցաշարում, հայտնում է ՀՀ ԿԳՄՍՆ-ն։
Մրցաշարի հաղթողի տիտղոսը նվաճել է 67 կգ քաշային Սլավիկ Գալստյանը՝ եզրափակչում 3:1 հաշվով առավելության հասնելով Ճապոնիայի ներկայացուցիչ Կյոտարո Սոգաբեի նկատմամբ և դառնալով ոսկե մեդալակիր:
Հայաստանի մյուս ներկայացուցիչներ Ռուդիկ Մկրտչյանը (55 կգ), Հրաչյա Պողոսյանը (63 կգ) և Մալխաս Ամոյանը (77 կգ) արծաթե, իսկ 87 կգ քաշային Վիգեն Նազարյանը բրոնզե մեդալներ են նվաճել։
82 կգ քաշային կարգում Հայաստանը ներկայացրել է երկու ըմբիշ՝ Եվրոպական խաղերի արծաթե մեդալակիր Կարապետ Չալյանը և Սամվել Գրիգորյանը:
Նրանք միմյանց հետ մրցել են 1/8 եզրափակչում, որտեղ 2-1 հաշվով հաղթել է Գրիգորյանը: Վերջինս, սակայն, հաջորդ գոտեմարտում 2-7 հաշվով զիջել է Բուլղարիայի ներկայացուցչին:
Հավելենք, որ մրցաշարը տեղի է ունեցել մարտի 2-5-ը: Արմեն Բաբալարյանի գլխավորությամբ մրցավայրում են եղել Ռուդիկ Մկրտչյանը (55 կգ), Հրաչյա Պողոսյանը (63 կգ), Սլավիկ Գալստյանը (67 կգ), Մալխաս Ամոյանը (77 կգ), Կարապետ Չալյանը և Սամվել Գրիգորյանը (82 կգ) և Վիգեն Նազարյանը (87 կգ)