Համացանցում կադրեր են հայտնվել «Ջոկերի» երկրորդ մասի նկարահանումներից, հայտնում է «Правил жизни» պարբերականը։
Տեսանյութերից մեկում պատկերված է հետապնդման տեսարանը։ Ըստ երևույթին, այս կադրերում մոխրագույն կոստյումով Ջոկերը (Խոակին Ֆենիքս) փախչում է իր նմանակներից։
Եվս մի քանի տեսանյութ ականատեսից հրապարակել է TMZ տաբլոիդը։ Տեսանյութում ներկայացված է հետապնդման տեսարանը այլ տեսանկյունից։
Մեկ այլ տեսանյութում դերասանն արդեն դուրս է եկել կերպարից և պարզապես քայլում է փողոցով։
Նշվում է, որ ֆիլմի շարունակությունը ստացել է «Ջոկեր. խելագարություն երկուսի համար» (Joker: Folie à Deux) անվանումը։ Ֆիլմը կթողարկվի 2024 թվականի հոկտեմբերի 4-ին։
Լրատվամիջոցների տվյալներով՝ երկրորդ մասը խոստանում է «50 անգամ ավելի ծանր լինել, քան կոմիքսների ցանկացած այլ հայտնի ֆիլմ»։
Բացի Ֆենիքսից, ֆիլմում առանցքային դեր կկատարի Լեդի Գագան։ Փետրվարին Թոդ Ֆիլիպսը կիսվել է Լեդի Գագայի և Ֆենիքսի հետ առաջիկա ֆիլմի կադրով, և այդ կադրն անմիջապես վերածվել է մեմի։