Студент отрядтары – ҙур һәм ҡеүәтле көс ул

Бөгөн, 19 мартта, Республика менән идара итеү үҙәгендә төбәк етәксеһе Радий Хәбиров Башҡортостан Башлығы ҡарамағындағы студенттар отрядтарын үҫтереү мәсьәләләре буйынса ведомство-ара координация советының беренсе ултырышын үткәрҙе. Көн тәртибендә хеҙмәт проекттарын ойоштороу һәм уларға ярҙам итеү өсөн өҫтәмә саралар булдырыу мәсьәләләре ҡаралды. Радий Хәбиров үҙенең сығышында Башҡортостанда студенттар отрядтарын үҫтереүгә айырыуса иғтибар бүленеүен билдәләне. Профилле министрлыҡтар һәм ведомстволар алдында торған төп бурыстар иҫәбендә – проектта ҡатнашыусылар һанын арттырыу, уларҙың хеҙмәте һәм ялы өсөн уңайлы шарттар булдырыу, шулай уҡ студенттарҙың һөнәри әҙерлеген тәьмин итеү. Студент отрядтары – ул аҡса эшләү мөмкинлеге лә, команда рухын һәм шәхси үҫеште үҫтереү өсөн уникаль йәштәр мөхите лә, тип һыҙыҡ өҫтөнә алды төбәк етәксеһе. – Республика Хөкүмәтенә предприятиеларҙың студенттарҙың хеҙмәт ресурстарына ихтыяжы бармы-юҡмы икәнлеген билдәләргә ҡуштым. Миңә бындай ихтыяж бар, тип хәбәр иттеләр, – тип һыҙыҡ өҫтөнә алды Радий Хәбиров. – Шулай уҡ студент берләшмәләренең фекерен анализланыҡ. Йәштәрҙең студент отрядына ҡушылыу теләге барлығын асыҡланыҡ. 2025 йылда республиканың студенттар отрядтары үҙҙәренең тергеҙелеүенә 10 йыл тулыуҙы билдәләй. Был осорҙа ҡатнашыусылар һаны 213-тән 5 987 кешегә тиклем артҡан. Республиканың йәштәр сәйәсәте министры Вито Сабиров әйтеүенсә, Башҡортостан Башлығы ҡушыуы буйынса төбәктә студент отрядтары өсөн яңы эш урындары булдырыу, хеҙмәт шарттарын яҡшыртыу һәм уларҙы дәртләндереү өҫтөндә эшләйҙәр. – Быйыл беҙ хеҙмәт семестры сиктәрендә эшләргә теләүселәр өсөн мөмкинлектәрҙе киңәйтәбеҙ. Оператив штаб 45 предприятиены билдәләне дә инде, унда төҙөлөштән алып медицинаға тиклем алты йүнәлеш буйынса 43 хеҙмәт проекты ойошторола. Дөйөм алғанда, студенттар 1600-ҙән ашыу вакансияны биләй ала, – тине Вито Сабиров. Тағы ла бер мөһим күренеш – хәрәкәттә ҡатнашыусылар һанының артыуы. Мәҫәлән, 2025 йылда төбәктә юғары уҡыу йорттары базаһында – 54, колледждар базаһында 18 яңы студент отряды ойоштороласаҡ. Шулай уҡ мәктәп уҡыусылары өсөн айырым отрядтар булдырырға планлаштыралар, улар унда тәүге хеҙмәт тәжрибәһе аласаҡ. «Рәсәй студенттар отрядтары» дөйөм Рәсәй йәштәр йәмәғәт ойошмаһының Башҡортостан төбәк бүлексәһе идараһы рәйесе Ирина Сухарева республика етәкселегенә хәрәкәткә булышлыҡ иткәне өсөн рәхмәт белдерҙе һәм 10 йыл эсендә 27 меңдән ашыу студентты эшкә урынлаштырыуҙары хаҡында әйтте. Мәҫәлән, 2022 – 2024 йылдарҙа Башҡортостандың студент отрядтарында ҡатнашыусылар 1,2 миллиард һумдан ашыу аҡса эшләгән. Ирина Сухарева республиканың иң яҡшы студент отряды өсөн Башҡортостан Башлығының күсмә байрағын булдырырға тәҡдим итте. Был йәштәр өсөн мөһим дәртләндереү алымы буласаҡ, тине ул. Башҡортостан Башлығы студент отрядтарына ҡағылышлы киң мәғлүмәт-аңлатыу кампанияһын үткәреү кәрәклеген билдәләне. – Күптәр студент отрядтарының әле лә булыуын белмәй. Республикала был хәрәкәткә яҡшы этәргес бирәбеҙ. Йәштәребеҙгә аҡса эшләргә мөмкинлек бирергә кәрәк. Был яҡшы күренеш. Бының өсөн студенттар менән һөйләшергә, предприятие етәкселәренә әлеге эштең мөһим дәүләт бурысы икәнен аңлатырға кәрәк. Бында барыһы ла аныҡ, ябай һәм аңлайышлы булырға тейеш, – тип билдәләне Радий Хәбиров. – Ректорҙарға мөрәжәғәт итәм: әгәр студент отрядтары буйынса һеҙҙең шәхси ҡыҙыҡһыныуығыҙ булмаһа, был проект “ҡалҡынып китә алмаясаҡ”. Шуға күрә ентекле юл картаһын төҙөүҙе һорайым. Сара һуңында Радий Хәбиров студент отрядтары әүҙемселәренә “Башҡортостан Республикаһы ирекмәне” почет билдәләрен тапшырҙы. Сығанаҡ: Башҡортостан Башлығы сайты.