Баймаҡ районының Темәс ауылынан Шәфҡәт Юнысов "Һаҡмар" һәм "Йәшлек" гәзиттәренә яҙылып, ҡар таҙартыу машинаһын алды.
Шәфҡәт Морат улы үҙенең бүләк отоуын Башҡортостан юлдаш телевидениеһында эшләгән Наил Юнысов атаһына шылтыратҡандан һуң белгән, тип хәбәр итә "Молодежная газета" баҫмаһы. Был көтөлмәгән бүләк хужаға бик шәп сюрприз булды. Ул был уйынды ойошторған һәр кемгә рәхмәт белдерҙе.
Баймаҡ мәғлүмәт үҙәге бухгалтеры Эльвира Ҡыҙрасова "Һаҡмарға яҙылығыҙ һәм бүләк отоғоҙ!" акцияһында ҡатнашырға квитанция килтергәндә, Юнысовтар ғаиләһенән ниндәй баҫмалар алдырыуҙары менән ҡыҙыҡһына. Яуап итеп улар башҡорт телендә район гәзитен һәм "Йәшлек"те уҡырға яратыуҙарын, һәр ваҡыт ошо баҫмаларға яҙылыуҙарын әйтте.
Ойоштороусылар нәшриәт ярты йыл һайын ҡиммәтле бүләктәр уйнатыуын, ә ул үҙе тура эфирҙа үтеүен иҫкә төшөрҙө. Был районда йәшәүселәр яулаған өсөнсө ҡар таҙартыу машинаһы. Бынан тыш, бүләктәр араһында ноутбук һәм башҡа ҙур приздар ҙа була.
Ғүмер буйы совхозда намыҫлы эшләгән һәм хәҙер хаҡлы ялға сыҡҡан Шәфҡәт Юнысов, техника уға оҙаҡ йылдар хеҙмәт итер, тигән өмөт белдерҙе. Ул шулай уҡ, ҡайтҡас, йәнә ярты йылға яҙылырға һәм ойоштороусыларға эшендә уңыштар теләп, редакцияға һәм "Башҡортостан Республикаһы" нәшриәт йортона квитанциялар ебәрәсәген белдерҙе.
Акцияны ойоштороусылар бүләк алыуҙың сере ябай булыуын иҫкә төшөрә: район гәзитенә һәм бер республика баҫмаһына яҙылырға, һуңынан "Башҡортостан Республикаһы" нәшриәт йортона квитанциялар ебәрергә кәрәк. Уйындар һәм баҫмалар тураһында мәғлүмәтте сайтта rbsmi.ru табырға мөмкин.
Фото: "Молодежная газета".