Быйыл “Йыл уҡытыусыһы” исеменә кемдәр лайыҡ булды?

Бөгөн, 14 мартта, Өфөләге “Торатау” конгресс-холында “Башҡортостандың йыл уҡытыусыһы” республика конкурсына һәм "Башҡорт теле һәм әҙәбиәте йыл уҡытыусыһы" төбәк-ара конкурсына тантаналы шарттарҙа йомғаҡ яһалды. Быйылғы конкурстар 200-ҙән ашыу педагогты тупланы. Уларҙың 148-е – “Йыл уҡытыусыһы”, тағы ла 55-е “Башҡорт теле һәм әҙәбиәте йыл уҡытыусыһы” бәйгеһендә ҡатнашты. Шуны ла әйтергә кәрәк, быйыл бәйгеләр түңәрәк даталарын билдәләй: тәүгеһе – 35-се тапҡыр, икенсеһе 30-сы тапҡыр үткәрелә. Әйткәндәй, тәүге тапҡыр туған телдәр, йәғни башҡорт, рус, татар, мари, удмурт һәм сыуаш телдәре уҡытыусылары үҙҙәрен һынап ҡараны. 26 февралдән 12 мартҡа тиклем бәйгелә ҡатнашыусылар асыҡ дәрестән башлап министр менән һөйләшеүгә тиклем төрлө конкурстарҙа үҙҙәрен һынап ҡараны. Һәм бына, ниһайәт, тантаналы минуттар: сәхнәгә бер аҙ тулҡынланып та, ғорур баҫып та финалға үтеүселәр – төрлө номинацияларҙа билдәләнгән лауреаттар, призлы урын яулаусылар һәм еңеүселәр күтәрелә. – Үҙем дә һеҙҙең кеүек тулҡынланам да, шул уҡ ваҡытта ғорурланам. Бөгөн һеҙҙең менән бергә булыу, конкурста ҡатнашыусылар, лауреаттар, призерҙар, еңеүселәр менән ошо шатлыҡты бүлешеү – оло бәхет. Һеҙ – беҙҙең мәғариф системаһының, ҙур республикабыҙҙың ғорурлығы. Бөгөн һеҙ шундай матур, шундай бәхетле! Һеҙ – иң яҡшылары, барығыҙ ҙа үҙ һөнәренең оҫтаһы. Беҙҙең балаларыбыҙ ышаныслы ҡулдарҙа. Башҡортостан Республикаһының мәғариф тармағын етәкләү – минең өсөн оло ғорурлыҡ, - тине үҙ сығышында Башҡортостандың мәғариф һәм фән министры Илдар Мәүлетбирҙин. Төбәк-ара "Башҡорт теле һәм әҙәбиәте йыл уҡытыусыһы" конкурсы йылдағыса рухлы, сәмле, илһөйәр һәм телһөйәр педагогтарҙы бергә йыйҙы. Улар араһында милләттәштәребеҙ күпләп йәшәгән төбәктәрҙә туған телебеҙгә тоғролоҡ һаҡлап, йәш быуында башҡорт теленә һөйөү тәрбиәләгән уҡытыусылар ҙа бар ине. Уларҙың береһе лә иғтибарһыҙ ҡалманы. Ә инде финалға йылдағыса биш педагог сыҡты. Хәйбулла районы Аҡъяр ауылы 1-се урта дөйөм белем биреү мәктәбенән Венера Нөғәмән ҡыҙы Йәрмөхәмәтова, Өфө күп профилле һөнәри белем биреү колледжы уҡытыусыһы Фәнзил Бүләк улы Санъяров, Стәрлетамаҡ ҡалаһы 23-сө полилингваль күп профилле мәктәбенән Айһылыу Насип ҡыҙы Таймаҫова, Өфө ҡалаһының 24-се мәктәбенән Гөлшат Радик ҡыҙы Вәлиуллина лауреаттар һәм призерҙар булып танылды. Ә инде "Башҡорт теле һәм әҙәбиәте йыл уҡытыусыһы-2025" конкурсы еңеүсеһе булып Өфө ҡалаһындағы 2-се "Смарт" күп йүнәлешле гимназияһынан Наҙгөл Исмәғил ҡыҙы Хәбибуллина танылды. – Бөгөн ошо күркәм залда иле, теле өсөн янған ил улдары, ил инәйҙәре алдында ғорурланып та, тулҡынланып та баҫып торам. Туға телемә, остаздарыма рәхмәтлемен! Республика етәкселеге, мәғариф һәм фән министрлығы башҡорт телен һаҡлау һәм үҫтереү өсөн ҙур көс һала, был беҙҙе дәртләнеп эшләргә әйҙәй. Теленә, иленә хеҙ:мәт иткән кеше генә бәхетле була. Туған башҡорт телебеҙ мәңге йәшәһен! – тип ялҡынлы сығышы аша рәхмәтен дә, шатлыҡ хистәрен дә белдерҙе еңеүсе. “Башҡортостандың йыл уҡытыусыһы-2025” республика конкурсының лауреаттары һәм призерҙары булып Ҡариҙел районы Ҡариҙел ауылындағы 1-се урта мәктәп уҡытыусыһы Винер Әлфис улы Кәримов, Өфө ҡалаһындағы 93-сө лицейҙан Ирина Александровна Никитина, Өфө ҡалаһындағы Ә. Фәйзуллин исемендәге 39-сы гимназиянан Яна Анатольевна Майкова танылды. Ә инде “Башҡортостандың йыл уҡытыусыһы-2025” республика конкурсының абсолют еңеүсеһе исемен Стәрлетамаҡ ҡалаһының 5-се гимназияһынан Ренар Мөхтәр улы Хәйбуллин яуланы. Тантанала шулай уҡ “Башҡортостан Республикаһының туған тел буйынса йыл уҡытыусыһы”, “Башҡортостан Республикаһы мәктәпкәсә белем биреү ойошмаһының йыл педагогы”, ошо уҡ йүнәлештәге конкурстың милли телдәрҙә белем һәм тәрбиә биргән педагогтары, “Рәсәй дефектолог-уҡытыусыһы” конкурсының республика этабы еңеүселәре лә билдәләнде. Йылдағыса республика мәктәптәре командалары араһында үткәрелгән “Кәрәҙҙәр” конкурсына йомғаҡ яһалды. Быйыл дүртенсе тапҡыр үткәрелгән ҡыҙыҡлы ярышта Благовещен ҡалаһы уҡытыусылары еңеүсе исеменә лайыҡ булды. Шулай уҡ финалға сығыусылар араһында Белорет, Ҡариҙел, Туймазы райондары, Салауат ҡалаһы командалары бар ине. Баш ҡалабыҙҙа һәм республикала билдәле ижади коллективтар һәм артистар уҡытыусыларға йыр-моңдар, дәртле бейеүҙәр бүләк итте. Финалға сыҡҡан, төрлө номинацияларҙа билдәләнгән, еңеү яулаған педагогтар үҙҙәре лә бүләктәргә, сәскәләргә күмелде. Айрат Нурмөхәмәтов фотолары.