Служба св. муч. Инне, Пинне, Римме
Служба святым мученикам инне, пинне, римме.
Месяца января в 20-й день, июня 20-й день.
На велицей вечерни
На Господи, воззвах: стихиры, глас 4.
Подобен: Яко добля:
Тричисленнии мученицы,/ Инна, Пинна, Римма,/ добре пострадавше за Троицу Всесвятую/ и жесточайшие болезни верою претерпевше,/ высшее Царство получисте./ Тем же молитеся даровать душам нашим// мир и велию милость.
Инну славного,/ Пинну твердого/ и Римму богомудрого,/ песни духовными восхвалим./ Страдание доблественно претерпевше,/ друг ко другу глаголаху:/ люта зима, но сладок рай,/ болезнен лед, но сладко восприятие,/ не уклонимся, о, братие,/ мало претерпим, да венцы победным увяземся от Христа Бога// и Спаса душ наших.
Яко велико дарование Крымской Земле,/ яко богатство небесное,/ принесошася в ню нетленные мощи ваша,/ святии мученицы Инно, Пинно, Риммо,/ на облегчение всяких скорбей и исцеление болезней,/ на отгнание всякой вражией силы./ Вы бо скории наши помощницы// и молитвенницы о душах наших.
А́нгелов собесе́дницы,/ праведных соприча́стницы/ и священному́чеников равностоя́тели,/ святии мученицы Инно, Пинно, Риммо,/ проще́ние испроси́ певце́м вашим, свя́тии,/ мир, здра́вие, спасе́ние// и велию милость.
Слава, глас 6:
Подобен: Все отложше:
Днесь светло празднуем священную память святых мучеников и чудотворцев,/ Инны, Пинны, Риммы,/ проповедников Христа и наших просветителей./ Тии бо смерть прияли от мучителей неповину,/ муки и мраз претерпевая доблествено,/ и ныне водворяются с лики мучеников,/ славословля Христа непрестанно./ Его же и молят усердно,/ даровати стране нашей на враги победу// и душам нашим велию милость.
И ныне, Богородичен:Кто Тебе не ублажит:
Таже вход. Прокимен дне. Чтения три.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог/ и по Мне не бу́дет./ Аз есмь Бог, и несть, ра́зве Мене́, спаса́яй./ Аз возвести́х и спасо́х,/ уничижи́х, и не бе в вас чужди́й./ Вы Мне свиде́тели, и Аз Госпо́дь Бог./ И еще от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас, Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На литии стихиры, глас 2
Подобен: Егда от древа:
Андрея Первозванного плод благоцветущий/ явистеся святии мученицы Инно, Пинно, Риммо./ Учителю вашему последуя,/ телеса в жертву непорочную Христу принесосте./ О муках нерадивше,/ Небесное Царствие восприяли есте./ И ныне со апостолом Троице Святей предстоите,/ моляся о душах наших.
Слава, и ныне, глас тойже.
Сытость твоих похвал, Дево Богородице,/ благочестивым отнюдь не бывает,/ к Тебе с любовью притекаем благодарение приносяще./ Сие милостивно приими,/ и к Сыну Твоему и Богу Нашему принеси,/ молитвенники имуще святых страстотерпцев Инну, Пинну, Римму,/ и спасение душам нашим испроси.
На стиховне стихиры, глас 8.
Подобен: О, преславнаго чудесе:
Ни глад, ни же беда,/ ни живот, ни смерть/ ни муки, ни раны/ возмогоша вас разлучити от любви Христовы,/ тричисленные мученицы./ Тем же наследовасте Царство Небесное/ и сладости наслаждающейся неизреченныя,/ помяните нас, всеблаженнии,// да и мы не лишимся Рая вожделенного.
Веры истинные проповедники,/ благочестия поборницы,/ Церкви Русския звезды многосветлии,/ Земли Крымстей теплии предстатели,/ восхваляем вас священными песни,/ благодарение по силе приносяще,// божественные и мудрые страдальцы, приснопамятнии.
Муки пачеестественные претерпевая,/ радовалися есте, всеблажении,/ святии мученицы Инно, Пинно, Риммо,/ змиеву главу идолослужения отсекая./ Сего ради подвигоположник Христос Бог венец победный вам дарова./ Его же молите прилежно,/ о сродницах ваших, празднующих всечестную память вашу,// да обрящем милость в день Судный
Слава, глас 6:
Подобен: Все отложше:
Я́ко многоце́нное сокро́вище,/ принесе́ны бы́сть от Скифии во град Алушту,/ пречестная телеса ваша,/ му́ченицы славнии Инно, Пинно, Риммо,/ подающе всем чту́щим пресла́вную па́мять вашу/ оби́лие исцеле́ний./ И ныне предстоя́ на Небеси́ Христу́ Бо́гу/ и молитеся усердно/ о спасе́нии душ на́ших.
И ныне, Богородичен, глас той же:
Тропарь, глас 2 (тропарь из Интернет)
Я́коже Первозва́ннаго ученицы́/ первозва́ннии яви́стеся от слове́н,/ и бра́тию ва́шу/ све́том И́стины просвеща́юще,/ от безбо́жнаго свире́паго кня́зя/ лю́тую кончи́ну прия́ли есте́,/ мра́зом окова́ннии и ледом удавле́ннии,/ на Дуна́е реце́ в Ски́фстей стране́./ Но я́ко ду́ши за дру́ги поло́жшии,/ святи́и И́нно, Пи́нно и Ри́ммо,/ и о на́с всемо́щныя моли́твы приноси́те,/ вся́ язы́ки слове́нския/ па́ки ко Христу́ обраща́юще.
Тропарь, глас 4, на перенесение мощей.
Приспе днесь всечестный праздник/ принесение честных и многоцелебных мощей ваших,/ святии мученицы Инна, Пинна, Римма,/ веселяще всеизрядно ваше стадо,/ стратотерпцы всехвальные/ и теплии наши молитвенницы,/ веси Крымской украшение,/ и всея Земли Русския// похвало и утверждение.
НА УТРЕНИ
По 1-м стихословии седален, глас 4:
Ра́дуйтеся, исто́чницы, точа́щие струи́ исцелений,/ святии мученицы Инно, Пинно, Риммо./ От них же почерпа́ем целе́б благода́ть,/ прегреше́ний избавля́емся,/ любо́вию приходя́щии к вам, многострадальцы.
Слава, и ныне, Богородичен, глас тойже:
Радость Ангелов, Небесная Царица, / покрый Твоим честным омофором Землю нашу Русскую, / победы на враги верным людям Твоим даруй/ и велию милость.
По 2-м стихословии седален, глас 4:
Ве́лия сла́ва на́ша и похвала́,/ вы страстоте́рпцы честнии Инно, Пинно, Риммо:/ вели́ку бо ве́ру во Христа́ Иису́са имущи,/ мраз велий претерпели есте/ и дости́гли есте́ Небе́снаго жительства,/ его́же улучи́ти нас сподобите моли́твами вашими, святии.
Слава, и ныне, Богородичен, глас тойже:
Сердца моего болезни и гноение души моея исцели Твоим предстательством, Дево,/ сомолитвенники имущи святых тричисленных мучеников./ Яко да во здравии пребывая,/ прославлю помощь Твою, Богоневесто.
По полиелеи величание:
Величаем вас,/ святии славнии мученицы Христовы Инно, Пинно и Риммо, / и чтим честная страдания ваша,/ яже за Христа / претерпели есте.
Псалом избранный:
Бог нам прибе́жище и си́ла, / Помо́щник в скорбе́х, обре́тших ны зело́. / Сего́ ра́ди не убои́мся, внегда́ смуща́ется земля́. / Бо́же, кто уподо́бится Тебе́? Да не премолчи́ши, ниже́ укроти́ши, Бо́же. / Я́ко Тебе́ ра́ди умерщвля́еми есмы́ весь день. / Вмени́хомся, я́ко о́вцы заколе́ния. / Положи́л еси́ нас в при́тчу во язы́цех. / И бых язве́н весь день. / Разже́гл еси́ ны, я́коже разжиза́ется сребро́. / Проидо́хом сквозе́ огнь и во́ду, и изве́л еси́ нас в поко́й. / Весели́теся о Го́споде и ра́дуйтеся, пра́веднии. / Я́ко Госпо́дь в ро́де пра́ведных, / и насле́дие их в век бу́дет. / Воззва́ша пра́веднии, и Госпо́дь услы́ша их.
Седален, глас 8:
Андрея Первозванного верные ученицы,/ доблестные мученицы,/ вас ни муки, ни ласкание льстивное разлучите от Христа возмогоша,/ тем же дерзновение к нему стяжавше,/ простите душам наши грехов оставление// и велия милости.
Слава, и ныне, Богородичен, глас тойже:
Радость миру рождшая,/ радости сердце мое исполни, Дево,/ в светлый день праздника тричисленных страстоперпцев,/ Инны, Пинны, Риммы достахвальных./ Яко да славлю Тя, Многопетая.
Степе́нна, 1-й антифо́н 4-го гла́са. Проки́мен, глас 4: Воззва́ша пра́веднии,/ и Госпо́дь услы́ша их. Стих: Мно́ги ско́рби пра́ведным, и от всех их изба́вит я Госпо́дь. Вся́кое дыха́ние: Ева́нгелие от Матфе́я, зача́ло 36.
По 50-м псалме стихира, глас 6:
Страстотерпцы дивнии,/ Троице равночислении,/ цветы благоухании,/ мученицы Инна, Пинна, Римма преблаженнии./ Хлад претерпесте и мук не убоявшеся,/ венцы нетленные от Христа прияли есте./ И ныне Троице во славе предстояще,/ молятся со дерзновением// о душах наших
Канон, глас 4.
Песнь 1
Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама// Амаликову силу в пустыни победил есть.
Святии мученицы Инно, Пинно, Риммо, молите Бога о нас.
Просвети́ ми ум и озари́ моя́ чу́вства,/ согреше́ний мрак души́ моея́ отгна́в, Христе́ Бо́же,/ да чи́стою со́вестию возмогу́ песнь соста́вити и возвели́чити страстотерпцев Твоих добропобедных,/ Инну славного, Римму богомудрого и Пинну чудного.
Мно́гое исцеле́ние источа́ете, му́ченицы,/ и град, в не́мже хранятся нетле́нные те́леса ваша,/ от вся́ких бед покрыва́ете,/ сего́ ра́ди любо́вию па́мять вашу, страстоте́рпцы, пра́зднуем.
Страстьми́ мя омраче́нна,/ све́тлыми моли́твами вашими озари́те, святи Инно, Пинно, Риммо славнии,/ да вас воспою́ пе́сньми.
Богородичен: Отверзи уста моя, Всепетая Богоневесто,/ да возмогу воспети радостно тричисленных мучеников приславную память,/Тя величающе.
Песнь 3:
Ирмос: Веселится о Тебе Церковь Твоя, Христе, зовущи:/ Ты моя крепость. Господи,/ и прибежище и утверждение.
Христа подвигоположника имуще в сердце своем,/ ласка́ния мучителей попра́ли есте дерзновенно,/ и венцы нетленными увязостеся, преслании страдальцы.
Восхва́лим Инну славного/ и ве́рою почти́м Римму и Пинну велему́дрыя,/ ве́рою пострада́вшия за Тро́ицу Всесвяту́ю/ и па́че со́лнца просия́вшия.
Зи́му безбо́жия, му́ченицы тричисленнии, прете́кли есте,/ во благоче́стии ве́сну достигше,/ и Трисиятельную Троицу созерцаете во свете непреступнем.
Богородичен: Одержим многими страстьми,/ не могу воззрети на высоту небесную и петь Тебе чисто, Многопетая./ Но Сама воздвигни мя к Твоему славословию, Пренепорочная.
Седален, глас 6:
Покрови́тели жи́зни на́шея и моли́твенницы к Бо́гу/ почита́ем вас, страстоте́рпцы Инно, Пинно, Риммо:/ на стезю́ нас покая́ния напра́вите,/ му́чеников соприча́стницы, А́нгелов сограждани́не пресла́внии.
Слава, и ныне, глас той же:
Радость миру,/ мучеников укрепление,/ христиан Предстательнице,/ моли Сына Твоего и Бога Нашего, Богородительнице,/ подати нам грехов оставление в день судный.
Песнь 4:
Ирмос: Вознесена Тя видевши Церковь на Кресте,/ Солнце праведное,/ ста в чине своем,/ достойно взывающи:// слава силе Твоей, Господи.
Дне́сь град Алушта ва́шу па́мять пра́зднует:/ сему́ бо яви́стеся столпи́, и Боже́ственное забра́ло, и утвержде́ние,/ па́стырие, и учи́телие, и моли́твенницы, Богоблаже́ннии.
Красе́н еси́, Влады́ко, и в след Тебе́ тече́м чи́стыми душа́ми, Женише́,/ – тро́ица му́ченик вопия́ше, ра́дующеся,–/ Твое́ю любо́вию, я́коже зри́ши, связа́хомся и Боже́ственным Ти раче́нием.
Предстяще ныне Христу с Безпло́тными си́лами,/ тричисленнии страстотерпцы Инно, Пинно, Риммо,/ подви́гнити проро́ки и апо́столы прему́дры, с му́ченики святы́я/ приле́жно за ны моли́тися Бо́гу,/ да обрящем милость в день судный.
Богородичен: Крепость страдальцев,/ боримых Помоще,/ обидимых Заступнице, Всепетая,/ Твоя рабы укрепи и сохрани.
Песнь 5:
Ирмос: Ты, Господи мой, Свет/ в мир пришел еси,/ Свет Святый, обращаяй из мрачна неведения,// верою воспевающыя Тя.
Ра́дующеся тричисленнии Христо́вы му́ченицы,/ боле́зненный претерпе́вше лед, во е́зеро погружаемы,/ наде́ждею Боже́ственных венце́в укрепля́еми.
Иска́пающи ра́дость и духо́вное весе́лие,/ яви́ся нам честна́я ва́ша па́мять, блаже́ннии страстоносцы,/ сердца́ услажда́я и исполня́ющи ра́дости премно́гия.
С Го́рними си́лами предсто́яще все́ми Владе́ющему,/ му́ченицы до́блии Инно, Пинно, Риммо,/ вас почита́ющих напа́стей изба́вите и ве́чнаго муче́ния.
Богородичен: Славных мучеников память совершающе,/ прославим Бога и Его Пречистую Матерь,/ всех страстотерпцев Похвалу и Укрепление.
Песнь 6:
Ирмос: Пожру Ти со гласом хваления, Господи,/ Церковь вопиет Ти,/ от бесовский крове очищшися,/ ради милости от ребр Твоих// истекшею Кровию.
Укре́пльшеся любо́вию Влады́ки, вражию низложи́сте гордыню/ и венцы победы приимши,/ в Небе́сных, му́ченицы Госпо́дни, живете́ поко́ищах.
Глаго́л лю́таго мучи́теля попра́сте, святи́и му́ченицы Инно, Пинно и Риммо,/ и Христа́ славнии воини явилися есте,/ полки́ де́монския погуби́сте.
Я́ко боле́знен у́бо лед, я́коже зело́ безме́рна лю́тость,/ ю́же претерпе́сте, мра́за, но сла́док рай,/ Авраа́мова бо не́дра патриа́рха гре́ют вас в се́лех ве́чных, му́ченицы тричисленнии.
Богородичен: Необоримая стена, Едина Приснодево,/ вся советы вражия разруши,/ воинство наше укрепи/ и Победы на на сопротивныя даруй.
Кондак, глас 2
Андрея Первозванного отрасли многоплодныя,/ страдальцы Христовы непобедимые,/ святии мученицы Инна, Пинна, Римма./ Крымской Земли заступницы и хранители,/ и всех христиан благодетели и председатели,// и теплии молитвенницы о душах наших.
Или ин кондак, глас 2 (из Интернет)
Ве́лия ве́ры исправле́ния:/ ледом окова́нни, я́ко на воде́ упокое́ния,/ святи́и И́нна, Пи́нна и Ри́мма ра́довахуся,/ мучи́тель же несмы́сленно яря́щеся,/ плоды́ и́х виногра́да тща́ся погуби́ти,/ но оба́че доны́не от слове́нских язы́к/ святы́я гро́здия Христо́с прие́млет,/ и первому́ченик слове́нских венча́ет венцы́./ Сего́ ра́ди и мы́,/ взращенных ва́ми ве́рных отроча́та,/ благодари́м и мо́лим вы́, святи́и:/ испроси́те те́плыми моли́твами и на́м/ в Ду́се и́стины по Бо́зе ревнова́ти.
Икос
Тричисленных мучеников подвиг видяще,/ мужеству их достойно почудимся,/ и со бесплотными радующеся сих ублажим глаголя:/ радуйтеся, земные радости призревшии,/ радуйся, веры непоколебимии столпи,/ радуйтесь, страны нашей похваление,/ радуйтеся, благоуханые цвети райстии,/ радуйтеся, души свои любовию за Христа положившии,/ радуйтеся, души наша светом христовой веры просвещающии,/ радуйтеся, во светлостех святых пребывающии,/ радуйтеся, со Ангелы песнь победную Троице воспевающии.// Радуйтеся, святии мученицы Инно, Пинно, Риммо,// теплии молитвенницы о душах наших.
Песнь 7:
Ирмос: В пещи Авраамстии отроцы персидстей,/ любовию благочестия паче,/ нежели пламенем опаляеми, взываху:// благословен еси в храме славы Твоея, Господи.
Сокруши́л еси́ терпе́нием всю си́лу вра́жию, Инно добропобе́дный,/ и, муче́ния пу́ть до́блестно проше́д,/ дости́гл еси́ в несконча́емый поко́й Небе́сный,/ иде́же со А́нгелы лику́еши во све́те всех Творца́.
Лик духо́вный соста́вльше,/ песнопе́ние прино́сим ти, Риммо славный,/ хода́тая тя о нас к Бо́гу предлага́юще и Богома́тери.
Ма́слина вои́стинну Бо́жия плодови́та был еси, Пинно многострадальче,/ моли́ся, мучениче прилежно,/ за всех ве́рно тя на по́мощь призыва́ющих.
Богородичен: Мучеников святая память/ всех созывает верных на Святую Трапезу,/ Ея же достойными причастниками быти и нас сотвори,/ Всеблаженная.
Песнь 8:
Ирмос: Руце распростер Даниил,/ львов зияния в рове затче,/ огненную же силу угасиша,/ добродетелию препоясавшеся,/ благочестия рачителие отроцы, взывающе:// благословите, вся дела Господня, Господа.
Вене́ц нетле́ния, святи́и, от Христа́ прие́мше,/ мученичения лютая претерпевше радостно,/ предстоите́ Царю́ веко́в, осия́еми све́тлыми светоли́тии/ и всебога́тными раздая́нии.
Земля́ соде́ржит честна́я телеса́ ва́ша, Богоно́снии, Не́бо же – ду́ши,/ тем весели́теся, му́ченицы Инно, Пинно, Риммо, со А́нгелы,/ Го́сподеви трисвяту́ю песнь пою́ще:/ благослови́те, вся дела́ Госпо́дня, Го́спода.
О, ва́шея к Бо́гу те́плыя любве́!/ Ея́же ра́ди себе́ са́мых отверго́стеся до конца́/ и ну́жднейшую смерть подъе́мше безсме́ртия сподо́бистеся.
Богородичен: Многими грехи одержим и непокоянен пребываю, окаянный,/ но Ты, Милостивая, даждь мне руку помощи/ и спаси мя.
Песнь 9:
Ирмос: Камень нерукосечный/ от несекомыя горы Тебе, Дево,/ краеугольный отсечеся,/ Христос, совокупивый разстоящаяся естества.// Тем веселящеся Тя, Богородице, величаем.
Страстотерпцы тричисленнии,/ сохранити певцы́ своя́ неви́димою си́лою от находя́щих бед и скорбе́й,/ наста́ви на путь покая́ния,/ я́ко да получи́м у Го́спода ве́лию ми́лость/ и вас непреста́нно велича́ем.
О нас, ве́рою вашу па́мять соверша́ющих,/ Христа́ молите приле́жно, не преста́йте,/ спасти́ся нам напа́стей, и треволне́ния, и бу́ри, и бед, и страсте́й/ и мир ми́ру дарова́ти, преблаже́ннии.
Страстоте́рпцы святии Инно, Пинно, Риммо,/ не возгнуша́йтеся нас, греха́ми оскверне́нных,/ и не отри́ните сего́ вам от нас ма́лаго хвале́ния,/ но приими́те е и о всех, воспева́ющих вас, Го́споду моли́ся,/ да вси па́мять вашу, ра́дующеся, пра́зднуем.
Богородичен: Чистая Богородительница,/ яже Бога нам родившая несказанно,/ того моли с тричисленными мучениками/ получите нам помилование в день Судный.
Светилен
Мучения добротами осияваемы,/ святии мученицы Инно, Пинно, Риммо,/ от Бога прияли трудов воздаяние,/ и ныне во славе Христу предстояще,/ просите просвещения душам нашим и велия милости.
Слава, и ныне.
Дева Чистая и неискусобрачная,/ всех Ангелов святейшая,/ тричисленных мучеников похваление и крепость,/ моли Сына Твоего, Христа Бога Нашего,/ подати просвещение душам нашим и велию милость.
На хвалитех стихиры, глас 1.
Подобен: Небесных чинов:
По пренесе́нии святы́х моще́й ваших во град Алушту,/ му́ченицы тричисленнии,/ людие веси сей, па́мять вашу усе́рдно всегда́ творя́ху, / зна́юще вас теплых заступников на Небесе́х ко Христу́ Богу./ И ныне покрыва́йте почита́ющих вас от всех бед и напастей/ теплыми вашими к Богу молитвами.
Имуще, блажении,/ Христову Божию силу,/ яко оружием непобедимым,/ отразили всю силу вражию,/ победы венцы приясте./ Темже предстояще Христу со дерзновением,/ о всех молитеся,/ совершаюших вашу память светло,// даровати нам велию милость.
Инно всеблаженный,/ Христов проповедник и мученик,/ Риммо чудный и Пинно многострадальный,/ вы бо дерзновенно Троицу Всесвяту́ю пропове́давше,/ язы́ки скифские просветиша/ и от вражия рабо́ты изба́виша,/ темже верою вас вси ублажаем.
Слава, и ныне, глас 6.
Тричисленнии страстотерпцы,/ боже́ственныя любве́ испо́лнении/ телеса ваша́ в же́ртву непоро́чну Христу́ прине́сли есте,/ и страданий украша́еми добро́тою,/ вошли есте в небесную ограду./ И ныне, помяните у престола Святыя Троицы сродницы ваша,/ совершающих вашу память светло,/ мученицы преблаже́ннии.
Слава, и ныне, глас 6.
Подобен: Все отложше:
Никто́же, притека́яй к Тебе́, / посра́млен от Тебе́ исхо́дит,/ Пречи́стая Богоро́дице Де́во, / но про́сит благода́ти и прие́млет дарова́ние / к поле́зному проше́нию.
Литургия
Прокимен, глас 4: Святым, иже суть на земли Его, / удиви Господь вся хотения Своя в них. Стих: Предзрех Господа предо мною выну, яко одесную мене есть, да не подвижуся.
Апостол к римляном, зачало 99, или ко евреем, зачало 330.
Аллилуиа, глас 4: Воззваша праведнии, и Господь услыша их, и от всех скорбей их избави их. Стих: Многи скорби праведным, и от всех их избавит я Господь.
Тропарь, глас 2
Я́коже Первозва́ннаго ученицы́/ первозва́ннии яви́стеся от слове́н,/ и бра́тию ва́шу/ све́том И́стины просвеща́юще,/ от безбо́жнаго свире́паго кня́зя/ лю́тую кончи́ну прия́ли есте́,/ мра́зом окова́ннии и ледом удавле́ннии,/ на Дуна́е реце́ в Ски́фстей стране́./ Но я́ко ду́ши за дру́ги поло́жшии,/ святи́и И́нно, Пи́нно и Ри́ммо,/ и о на́с всемо́щныя моли́твы приноси́те,/ вся́ язы́ки слове́нския/ па́ки ко Христу́ обраща́юще.
Тропарь 4
Приспе днесь всечестный праздник/ принесение честных и многоцелебных мощей ваших/ святии мученицы Инна, Пинна, Римма,/ веселяще всеизрядно ваше стадо,/ стратотерпцы всехвальные/ и теплии наши молитвенницы,/ веси Крымской украшение,/ и всея Земли Русския// похвало и утверждение.
Кондак, глас 2
Ве́лия ве́ры исправле́ния:/ ледом окова́нни, я́ко на воде́ упокое́ния,/ святи́и И́нна, Пи́нна и Ри́мма ра́довахуся,/ мучи́тель же несмы́сленно яря́щеся,/ плоды́ и́х виногра́да тща́ся погуби́ти,/ но оба́че доны́не от слове́нских язы́к/ святы́я гро́здия Христо́с прие́млет,/ и первому́ченик слове́нских венча́ет венцы́./ Сего́ ра́ди и мы́,/ взращенных ва́ми ве́рных отроча́та,/ благодари́м и мо́лим вы́, святи́и:/ испроси́те те́плыми моли́твами и на́м/ в Ду́се и́стины по Бо́зе ревнова́ти.
Кондак, глас 2
Андрея Первозванного отрасли многоплодныя,/ страдальцы Христовы непобедимые,/ святии мученицы Инна, Пинна, Римма./ Крымской Земли заступницы и хранители,/ и всех христиан благодетели и председатели,// и теплии молитвенницы о душах наших.
Молитва
О велиции угодницы Божии и страстотерпцы, святии хвальнии мученицы Инно, Пинно и Риммо! Вы бо веру непорочну до конца сохранили есте, о телесе небрегше, лютые раны за Христа радостно претерпели есте. И ныне, яко теплии о нас молитвенницы, предстояще Святей Троице, молитеся за ны, грешные и унылыя, во многи грехи падшия и в лености все житие иждивающии. Помозите нам вашими молитвами: веру непорочну соблюсти, заповеди Божии неленостно исполняти, покаяние о гресех приносити. Супруги в мире и согласии сохраните, старость поддержите, юность уцеломудрите, младенцы воспитайте и светом святого крещения озарите, монашествующим подвигом добрым подвизатися укрепите, пастырем ревность и попечение о пастве даруйте, стране нашей победы на сопротивныя исходатайствуйте, мир умирите, грешные восставите, всем нам христианскую кончину живота безболезнену, мирну, святых Таин причастну испросите и вечное Царство улучите сподобите, идеже вы в незаходимой пребывающе славе славите Пресвятую Троицу, Отца, Сына и Святаго Духа. Аминь.