Өфө циркына иғтибар арта

Өфөлә "АРТ-Ҡоролтай" V Халыҡ-ара мәҙәни форумы сиктәрендә "Росгосцирк" федераль концерт филиалы Өфө дәүләт циркын реконструкциялау һәм реставрациялау буйынса эш кәңәшмәһе үтте. Фекер алышыуҙа Башҡортостан Республикаһы Хөкүмәте Премьер-министрының беренсе урынбаҫары Урал Килсенбаев, мәҙәниәт министры Әминә Шафиҡова, Ҙур Мәскәү дәүләт циркының генераль директоры Эдгард Запашный һәм башҡалар ҡатнашты. Республика әһәмиәтендәге архитектура ҡомартҡыһы һәм федераль милек булған Өфө дәүләт циркы 1968 йылда төҙөлгән. Әммә төҙөлгәндән алып бер ҡасан да ремонт һәм реконструкция үткәрелмәгән. Авария хәлендәге бинаны Өфөнөң Октябрь районы суды 2017 йылда файҙаланыуҙан тыя. 2021 йылда республика Башлығы Радий Хәбировтың ҡушыуы буйынса проект-смета документацияһы әҙерләнде, ул бюджеттан тыш средстволар иҫәбенә "Рәсәйҙең баш дәүләт экспертизаһы" федераль агентлығының дәүләт экспертизаһы һығымтаһын алды. Эдгард Запашный төбәк властарының яуаплы ҡарашын билдәләне. Уның һүҙҙәренсә, күп кенә төбәктәр федераль объекттарға битараф. Ә Башҡортостан етәкселәренең үҙ өҫтөнә яуаплылыҡ алыуы, аҡса бүлеүе халыҡты хәстәрләп мәҙәниәтте үҫтереүгә ынтылышы маҡтауға лайыҡ, ти ул. Ул тағы ла ҡыйыҡты ремонтлау һәм йәнлектәрҙе тотоуҙы заманса нормаларға яраҡлаштырыу кәрәклегенә ҡарамаҫтан, бинаның ҡәнәғәтләнерлек хәлдә булыуын билдәләне. – Цирк иғтибарға мохтаж, сөнки ул оҙаҡ ваҡыт эшләмәне. Әммә мин уны ныҡ насар хәлдә тип уйлағайным. Күренеп тора, уға һаҡсыл ҡарашталар, хәстәрлек күрәләр, – тине ул һүҙенең аҙағында. Башҡортостан Хөкүмәтенән хәбәр итеүҙәренсә, Өфө циркын реконструкциялауға федераль бюджеттан 2 миллиард һум аҡса бүленгән. Ҡыйыҡты ремонтлауҙы һәм хайуандар өсөн биналарҙы заманса талаптарға ярашлы яңыртыуҙы үҙ эсенә алған эштәр 2028 йылда тамамланырға тейеш. Цирк манежы нормаларға тап килә һәм киңәйтеүҙе талап итмәй. – Өфө циркы - республикабыҙҙың мөһим урындарының береһе. Ул оҙаҡ йылдар Башҡортостан халҡының күп быуындарын ҡыуандырҙы. Тап шуға күрә бинаға уның тәүге ҡиәфәтен ҡайтарыу бик мөһим, сөнки был - беҙҙең тарихыбыҙ, баш ҡала мәҙәниәтенең бер өлөшө. 2026 йыл башынан тергеҙеү эштәре башланыуын көтәбеҙ, – тип аңлатма бирҙе Премьер-министр урынбаҫары Урал Килсенбаев Реконструкциянан һуң бинаның майҙаны хәҙерге 9810 квадрат метрҙан 13 611,79 квадрат метрға тиклем, шул уҡ ваҡытта хайуандарҙы аҫрау өсөн майҙан хәҙерге 334,8 квадрат метрҙан 2089,10 квадрат метрға тиклем артасаҡ, тип көтөлә. Фото: Башҡортостан Республикаһы Хөкүмәтенең матбуғат хеҙмәте.