Արաբական Միացյալ Էմիրությունների նախագահի դիվանագիտության հարցերով խորհրդական Անվար Գարգաշը Իրանի արտաքին գործերի նախարար Աբբաս Արաղչիին է փոխանցել ԱՄՆ նախագահ Դոնալդ Թրամփի նամակը՝ ուղղված Իսլամական Հանրապետության գերագույն առաջնորդ այաթոլլա Ալի Խամենեիին, տեղեկացնում է ՏԱՍՍ-ը:
Թեհրանում կայացած հանդիպման ընթացքում կողմերը մտքեր են փոխանակել երկկողմ հարաբերությունների, տարածաշրջանային և միջազգային բնույթի հարցերի շուրջ: Անվար Գարգաշը փոխանցել է ԱՄՆ նախագահի նամակը», - ասվում է Իրանի արտաքին քաղաքական գերատեսչության հայտարարության մեջ:
Ինչպես նշվում է փաստաթղթում՝ Արաղչին ընդգծել է տարածաշրջանի երկրների միջև համագործակցության ամրապնդման կարևորությունը՝ Մերձավոր Արևելքի երկրների շահերի ապահովման նպատակով, Գարգաշը հայտարարել է, որ ԱՄԷ-ն պատրաստ է զարգացնել հարաբերություններն Իրանի հետ:
Թրամփը բազմիցս սպառնացել Է Իրանին ռազմական ուժ կիրառել այն դեպքում, եթե Թեհրանը Վաշինգտոնի հետ գործարքի չգնա իրանական միջուկային ծրագրի շուրջ: Ամերիկացի առաջնորդը հրամանագիր է ստորագրել առավելագույն ճնշման քաղաքականությանը վերադառնալու մասին՝ հայտարարելով, որ թույլ չի տա Իրանին միջուկային զենք ստանալ: Խամենեին ընդգծել է, որ Թեհրանը ճնշման տակ բանակցություններ չի վարի:
ԱՄՆ նախագահը փետրվարի 4-ին հրամանագիր էր ստորագրել Իրանի նկատմամբ առավելագույն ճնշման քաղաքականությունը վերսկսելու մասին, այդ թվում՝ իրանական նավթի արտահանման կրճատմանն ուղղված միջոցառումները։ Միաժամանակ՝ նա հայտնել էր բանակցությունների և Թեհրանի հետ «հիանալի գործարք» կնքելու պատրաստակամության մասին։
Փետրվարի 7-ին Իրանի գերագույն առաջնորդ այաթոլլա Ալի Խամենեին հայտարարել էր, որ Իրանը պատրաստ է պատասխանել ԱՄՆ-ի ցանկացած ագրեսիվ գործողության և բացառել էր բանակցությունները։ Փետրվարի 9-ին ԱՄՆ նախագահը հայտարարել էր, որ նախընտրում է գործարք կնքել Իրանի հետ, քան հարվածել երկրին:
Մարտի 7-ին Թրամփը հայտնել էր, որ նամակ է հղել Խամենեիին՝ առաջարկելով քննարկել միջուկային ծրագիրը։ Թրամփը, գործարք չկնքելու դեպքում, Իրանին սպառնացել էր«հետևանքներով»։ Իրանի գերագույն առաջնորդ այաթոլլա Ալի Խամենեին հայտարարել է, որ Թեհրանը չի բանակցի «ահաբեկման» ներքո:
Նորություններին հետևեք մեր կայքում, ինչպես նաև Telegram-ում և YouTube-ում