Дьэ, Украинаҕа буола турар Аналлаах байыаннай операция сотору тохтуон сөп диэн эрэҥкэдийии барда. Оннук буоллар бэрт буолуо этэ.
Аҕыйах ый анараа өттүгэр Арассыыйа уонна Америка Холбоһуктаах штаттарын икки ардыларыгар кэскиллээх кэпсэтии тахсыа диэн түһээтэххэ да суоҕа. Бүгүн кэпсэтии күүскэ барар курдук эрээри, икки өттүттэн сэрэнсии баара саарбахтаммат.
АХШ государственнай сэкиритээрэ Марко Рубио Украинаҕа АХШ уонна Арассыыйа икки ардыларыгар прокси-сэрии бара турар диэтэ. Ол аата, АХШ куомуннаахтарын кытта Арассыыйаны Украина нөҥүө сэриилииллэр диэн билиннэ.
Мантан “үҥкүүлээтэххэ”, маннык хартыына тахсар.
АХШ президенэ Дональд Трамп Аан дойду иккис сэриитин түмүгүнэн олохтоммут Норуоттар икки ардыларынааҕы куттал суох буолуутун Ялта-Потсдамнааҕы систиэмэтигэр төннө сатыырга дылы. Оччолорго сэрии кыайыылаахтара Холбоһуктаах нациялар тэрилтэлэрин (ХНТ) тэрийбиттэрэ уонна бэйэлэрэ аан дойду үрдүнэн сэрии аны буолбатын мэктиэлиэхтээх ХНТ Куттал суох буолуутун сэбиэтэ (Совет безопасности) диэн ааттаан ураты статустаммыттара.
Оннук ураты балаһыанньалаах биэс судаарыстыба баар — Арассыыйа, АХШ, Великобритания, Франция уонна Кытай.
ХНТ атын чилиэннэрэ-судаарыстыбалар тугу баҕарар дойҕохтуохтарын сөп, Генеральнай ассамблея быһаарыыта “рекомендация” эрэ курдук. Барытын бу биэс судаарыстыба быһаарар.
Ялта-Потсдам систиэмэтин билиҥҥитэ ким да “көтүллүбүтэ” дии илик.
Бу биэс судаарыстыба, дьиҥ иһигэр, ыаһах аайы ыстал буолбут “мировой правительство” буолуохтааҕа сатаммакка сылдьар.
Өйдөөтүгүт дуо, тоҕо “право наций на самоопределение” уонна “неприкосновенность государственных границ” диэн утарыта турар балаһыанньалар баалларын? Бу иккиттэн хайатын талары бу биэс судаарыстыба быһаарар, ол эбэтэр, манипуляциялыыр үнүстүрүмүөннэрэ.
Өйдөөтүгүт дуо, тоҕо ХНТ Норуоттар икки ардыларынааҕы суута Арассыыйаны агрессор-судаарыстыбанан билиммэтэҕин? Суут мунньаҕын быһаарыыта 2024 с. тохсунньу 31 күнүгэр тахсыбыта.
Тоҕо диэтэххэ, Арассыыйа “норуоттар икки ардыларынааҕы быраабы” төрүт кэспэтэҕэ.
Манна диэн эттэххэ, "норуоттар икки ардыларынааҕы суут-сокуон" диэн суох, дуогабардар уонна сөбүлэһиилэр эрэ бааллар. Холобур, Украина мэлдьи сигэнэр Будапештааҕы меморандума мэктиэлиир дуогабар буолбатах. Меморандум диэн, судургутук эттэххэ, "памятка" буоллаҕа. Туох эрэ куһаҕан таҕыстаҕына, "өрүттэр мустан консультациялаһаллар". Бүттэ!
Аан дойду үрдүнэн, былыр былыргыттан судаарыстыбалар сыһыаннарыгар биир эрэ сокуон баар — "право сильного"!
Бу биэс судаарыстыба (Совет безопасности) аан дойдутааҕы бэрээдэги көрөр бырааптаахтарын ааһан, эбээһинэстээхтэр. Куттал суох буолуутун сэбиэтэ фашизмы кыайыы кэнниттэн үөскээбитин быһыытынан, бу биэс судаарыстыба кыраныыссаларын кыйа ханнык эрэ судаарыстыбаҕа фашизм “төбөтүн өрө көтөҕөр” сибикитэ билиннэ да, тутатына уодьуганныыр бырааптаахтар. Ол иһин Совет безопасности диэн ааттаналлар. Украина фашизмы өрө тутарын, эсэсовецтары героизациялыырын ХНТ Куттал суох буолуутун сэбиэтигэр, этэргэ дылы, Арассыыйа ааһан иһэн дакаастыыр кыахтаах. Били, аҥаар харахтаах саахымаччыт эппитигэр дылы, “у меня все ходы записаны”. Аҥаардас “СС-Галичина” өлөрүөхсүттэрин өрө туталлара баар — СС бары сэриилэрин өссө Нюрнберг суута киһи-аймах өстөөҕүнэн биллэрэн турар. Этэргэ дылы, “без срока давности”.
Онон Аналлаах байыаннай дьайыы (СВО) норуоттар икки ардыларынааҕы суут-сокуон ирдэбилинэн саҕаламмыт быһыы.
Ону үчүгэй да диэххитин сөп, куһаҕан да диэххитин сөп — бэйэҕит дьыалаҕыт. Мин баар быһыыны-майгыны этэбин.
Дьэ, ол иһин АХШ президенэ Дональд Трамп Арассыыйа президенэ Владимир Путины кытта туох да кыһалҕата суох атах тэпсэн олорон кэпсэтэр кыахтаах. Тэҥ дьон быһыытынан.
Арассыыйа “бэрээдэги олохтуур” сыаллаах Аналлаах байыаннай операцияны саҕалаабыта. Украинаны сэриилээн ылаары буолбатах, сэриилиирдии киирбитэ буоллар арыый атын быһыы буолуо этэ.
Стамбулга Украина, көнөтүнэн эттэххэ, бэриммитэ, капитуляцияҕа тэҥнээх “Стамбуллааҕы коммюникены” бэйэтинэн киллэрбитэ: ханнык да байыаннай блокка киирбэппин, ядернай сэрии сэбинэн иирбэппин, нейтралитеты тутуһабын, Крым боппуруоһун 10-15 сыл устата дипломатия нөҥүө быһаарсабыт диэн. Ону баара Великобритания уонна Байден баһылыктаах АХШ, кинилэри саппай уопсан Арҕааҥы дойдулар бука бары Арассыыйаны утары туруммуттара.
Судаарыстыба диэн тугуй?
Туспа судаарыстыба буоларга баҕатыйар дьоҥҥо Алампаны санатабын: "Ордугу булаары олоҕун алдьаппыт" айымньыны.
Тоҕо диэ!
Бу Орто дойдуга судаарыстыба икки эрэ көрүҥэ баар: монархия уонна стейт, чэ, республикалар диэххэ.
Монархия, ол эбэтэр, ыраахтааҕылаах судаарыстыба киһи-аймах “хаспахха олорор, таас сүгэнэн былааһы ылар” эрдэҕиттэн эллэнэн үөскээбит тэрээһин буолар. Таҥараттан анаммыт диэн ааттаан.
Күн судаар (государь) норуотун туһугар кыһаннаҕына эрэ сатанар, норуота суох буоллаҕына кини кимиэхэ да наадата суох. Эппиэтинэс — барыта киниэхэ!
Бэрт тутул буолуо этэ да, нэһилиэнньиктэрэ хайдах дьон буолуохтара биллибэт. Историяҕа биллэринэн, нэһилиэнньик мөлтөх (акаары, дьалаҕай эбэтэр эр санаата суох “уу ньамаан”) буоллаҕына, судаарыстыба өрүһүлтэтэ суох эстэр аакка барар.
Арассыыйа илиҥҥи дойду быһыытынан монархияҕа тартарыылаах. Кытай эмиэ. Сүүрбэлии-отуттуу сыл салайар генсектэр, президеннэр, альтернативата суох баһылыыр-көһүлүүр баартыйалар — бу монархия аныгылыы утума буолар.
Оттон “стейт” букатын атын тутул. Бу латынныы “статус”, ол эбэтэр “баар быһыы-майгы” диэнтэн тахсыбыт тыл. Быһата, “судаарыстыба бүгүҥҥү туруга” диэн өйдүөххэ сөп.
Бу кистэлэҥ былаастаах судаарыстыба (обезличенное государство). Тоҕо диэтэххэ, публичнай былаас — президент уонна парламент букатын да дьиҥнээх былаас буолбатах буолуохтарын сөп. Нуучча улуу бөлөһүөгэ, АХШ-гар уһун кэмҥэ диссидент быһыытынан олорбут, кэлин Арассыыйаҕа төннүбүт суруйааччы, социолог, логик-математик Александр Зиновьев Арҕааҥы дойдуларга “сверхвласть” диэн баар диир. Баай дьоннор былаастара. Ардыгар “дип-стейт” (deep state), ол эбэтэр “глубинное государство” диэн ааттыыллар. “Глубинный коллективный государь” диэххэ сөп.
Бу — баай дьоннор былаастара. Холобур, “мировой валютаны” бэчээттиир ФРС хаһаайыттара. Транснациональнай бааннар, хампаанньалар хаһаайыттара. Диктатура буржуазии — финансовый интернационал. Эппиэтинэс — мэлиһээй! "Кыра-хара тойоттору" уган биэрэллэрэ аахсыллыбат.
Өйдөөтүгүт дуо, аныгы үйэҕэ судаарыстыба буола сатыыр хайдах да кыаллыбатын. Тутулуга суох стейт буолуоххун баҕарар буоллаххына, туох да сүрдээх күүстээх “глубиннай судаарыстыбалаах” буолуоххун наада. Ол суох буоллаҕына, аан дойдутааҕы хапытаал филиала эрэ буолаҕын. Ол аата, прокси-государство.
"Х" чаас тирээтэҕинэ хаһаайыттар “уокка түс” диэтэхтэринэ уокка түһэҕин, ууга ыстан диэтэхтэринэ ууга ыстанаҕын. Хайдах оруолу аныахтара биллибэт. “Суверенитет” үһү дуо ол?
Ол эбэтэр, аан дойду үрдүнэн дьиҥнээх “стейт” АХШ эрэ баар. Киитэрэй Великобритания монархиятын да, стейт да “статуһун” иккиэннэрин тутан олорор.
Атыттар бары “проксилар”. Урукку империялар уонна түҥ былыргы цивилизациялар кииннэриттэн уратылар — БУКА БАРЫ!
Холобур, Иран тоҕо глобализацияны утарсыы киинигэр киирдэ? Тоҕо диэтэххэ, Орто дойдуга саамай кырдьаҕас судаарыстыба буолар. “Кырдьаҕастар” суолларыттан туораабаттар. Кытай буоллун, Индия буоллун, Турция эбэтэр Евразия цивилизациятын билиҥҥи киинэ Арассыыйа буоллун.
Арба, исламы ылыныаххытын баҕарар буоллаххытына Улуу Туран туһугар турунуоххутун сөп. Ислам экспанциятын сөбүлүүр буоллаххытына, баһаалыста!
Сэбиэскэй сойуус урукку өрөспүүбүлүкэлэрэ, бу барыта аатыгар эрэ судаарыстыбалар. Балартан саамай табыллыбыт бырайыактарынан Белоруссия уонна Казахстан буолаллар. Белоруссия Арассыыйа “проксита”, оттон Казахстан сирин баайын барытын англосактар уонна кытайдар ылбыттара быданнаата. Ол харчыта бастаан өрө тэбэн баран, сыыйа оннун булан, сотору кэминэн тиийбэт тирии, тарпат тараһа буолар дьылҕалаах. Атын, саҥа суолу тобулбатахтарына. Ол туспа кэпсэтии.
Онон Өксөкүлээх Өлөксөй өтө көрүүтэ өтөрүнэн суолтатын сүтэрэр кыаҕа суох — Арассыыйабытын тутуһабыт. Боростуой дьоҥҥо, дьиҥ иһигэр киирдэххэ, ханна баҕарар ыарахан: “Хорошо там, где нас нет”.
Кырдьаҕас тугу бэрэлиирэ буолла...
Дональд Трамп уонна АХШ туһунан эттэххэ, маннык.
Аатырбыт фантаст Александр Беляев “Продавец воздуха” диэн кинигэтин аҕам саастаах дьон аахпыт буолуохтааххыт. Саха сиригэр Дьааҥы сис хайаларыгар дугуйдана сытар мистер Бейли салгыны састааптарынан араартаан атыылыыр. Онтон экологическай алдьархай тахсар сибикитэ биллэр. Ньукуола диэн сирдьит саханы өйдүүгүт дуо? Мистер Бейли салгыны марсианнарга “иль” диэн уматыкка атастаһар, ол уматыгынан Дьааҥы хайаларыгар кистэммит лабораториятын энергиянан хааччыйар. Оттон анарааҥҥылар биһиги салгыммытын Марс тула атмосфера оҥорорго туһаналлар...
Трамп хампаанньата, чуолаан, Марс планетаҕа космическай холуонньа тэринэр мөккүөрдээх Маск миллиардер, билиҥҥитэ мистер Бейли уобараһыгар майгынныыллар. Биһиги “салгыммытын тууйа” сатыыллар дуу, хайдах дуу...
Трамп кырдьаҕас тугу бэрэлиирин ким да билбэт. Путин да оҕочоос буолбатах. Дьэ, хайдах буолар...
Судургутутан суруйда — СУР.