Кампустың икенсе сиратын төҙөүгә старт бирелде

Бөгөн, 8 мартта, Өфөлә Башҡортостан Башлығы Радий Хәбиров Рәсәйҙең фән һәм юғары белем министры урынбаҫары Айрат Ғәтиәтов менән бергә донъя кимәлендәге Евразия ғилми-белем биреү үҙәге вуз-ара кампусының икенсе сиратын төҙөүгә старт бирҙе. Объект «Йәштәр һәм балалар» милли проектының «Заманса кампустар селтәрен булдырыу» федераль проектына ярашлы төҙөлә. 10-29 ҡатлы административ һәм торлаҡ биналар комплексының майҙаны 99,7 мең квадрат метр тәшкил итәсәк. Силобат менән берләштерелгән ете башня буласаҡ. Студенттар һәм уҡытыусылар йәшәйәсәк корпустарҙан тыш, бында уҡыу һәм лаборатория бүлмәләре, спорт объекттары, дөйөм туҡланыу урындары, ял биләмәләре һәм ер аҫты паркингы буласаҡ. Радий Хәбиров менән Айрат Ғәтиәтов «Альфа» башняһының нигеҙенә бетон ҡойҙо, шулай уҡ ошо ваҡиға уңайынан гранит плитәгә иҫтәлекле таҡтаташ беркетте. – Кампус төҙөлөшө – ул республика юғары мәктәбе инфраструктураһын фундаменталь үҙгәртеү. 4,5 мең студентҡа иҫәпләнгән урын барлыҡҡа киләсәк. Унан да бигерәк, ул беҙ күҙ алдына килтергән ябай ятаҡ ҡына түгел. Бында студенттар өсөн уңайлы шарттар булдырыла. Эргәлә театр ҙа, стадион да бар, – тине Радий Хәбиров. – Ошонда уҡ кампустың беренсе сираты урынлашҡан, унда коворкингтар, стартаптар, лабораториялар бар. Йәғни йәш кеше юғары уҡыу йортона ингәндә сифатлы белем алыу өсөн кәрәкле бөтә нимәгә эйә була. 2027 йылдың декабрендә беҙ был объектты тапшырырға тейешбеҙ. – Тәү сиратта өс йыл элек буласаҡ кампус өсөн майҙансыҡ һайлау тураһында ҡарар ҡабул иткән Башҡортостан етәкселегенә һәм Радий Фәрит улына оло рәхмәтемде белдерәм. Республика конкурс һайлап алыуында тәүге еңеүселәр иҫәбендә булды һәм беренселәрҙән булып кампустың бер этабын төҙөп бөттө. Бына бер йыл инде IQ-парк уңышлы эшләп килә, – тине Айрат Ғәтиәтов. – Буласаҡ кампустың нисегерәк буласағы, ысынлап та, бөтә ҡала өсөн мөһим. Етмәһә, ул ынйы һымаҡ Өфөнөң үҙәгендә урынлашҡан. Студенттар бик уңайлы шарттарҙа йәшәйәсәк, йылы үткәүел дөйөм ятаҡтарҙы IQ-парк менән тоташтырасаҡ, бында улар уҡыясаҡ һәм буласаҡ эш биреүселәр менән осрашасаҡ. Был – яңы белем биреү стандарты. Төҙөлөштө алып барыу ваҡыты бик ҡыҫынҡы. Республикала ҙур проекттарҙы ғәмәлгә ашырған төҙөүселәр командаһы барыһын да тейешле ваҡытта файҙаланыуға тапшырыр, тип ышанам. Уңыштар теләйем! Вуз-ара кампустың тағы ла бер объектын – геном үҙәген асырға әҙерләнәләр. Унда шулай уҡ Биоинформатика үҙәге һәм IT-белгестәр әҙерләү өсөн илдәге иң ҙур “Мәктәп 21” эшләйәсәк. Сығанаҡ: Башҡортостан Башлығы сайты.