“Түңәрәк өҫтәл”дәге һөйләшеүҙәрҙә тарих та, бөгөнгө лә сағылыш тапты

Евразия ғилми-белем биреү үҙәгендә «МХО-ның хәҙерге ысынбарлығы контексында һәм Бөйөк Ватан һуғышының мемориаль-символик мираҫында милли геройҙар» темаһына халыҡ-ара кимәлдәге ғилми түңәрәк өҫтәл үтте. Уның эшендә абруйлы ҡунаҡтар ҡатнашты. Башҡортостан Башлығы гранты ярҙамында тормошҡа ашырылған проектҡа ярашлы үткәрелгән сара тарихи хәтерҙе һаҡлауға, милли геройҙарға, Башҡортостан һәм бөтә Рәсәй халыҡтарының тарихи яҙмыштары һәм хәрби берҙәмлегенә бәйле мәсьәләләрҙе тикшереүҙе маҡсат итеп ҡуйҙы. – Салауат Юлаев образы башҡорт халҡын ғына түгел, Башҡортостанда йәшәүсе башҡа халыҡтарҙы ла берләштереүсе символ булараҡ ҡабул ителә. Ул күп осраҡта башҡорт халҡының ғына түгел, ә башҡа халыҡтарҙың да яугиры һәм яҡлаусыһы булараҡ ассоциациялаша. Уның образы ғәҙелһеҙлек өсөн көрәштә теләктәшлек символына әүерелде. Быға бер яҡтан ҡәтғи тарихи нигеҙлек булышлыҡ итһә, икенсе яҡтан, Башҡортостандың да, дөйөм Рәсәйҙең дә милли мифик факты ла йоғонто яһай. Шуға күрә радикаль төркөмдәр яғынан был образды кире яҡтан күрһәтергә маташыуҙар халыҡтар дуҫлығына, дәүләтебеҙ – Рәсәй Федерацияһының берҙәмлегенә ҡаршы йүнәлтелгән, - тип билдәләне Башҡортостан Фәндәр академияһының Стратегик тикшеренеүҙәр институты ғилми хеҙмәткәре, социология фәндәре кандидаты Илшат Фәрит улы Йосопов. Фекер алышыуҙа ҡатнашыусылар шулай уҡ республика тарихында Салауат Юлаев шәхесенең әһәмиәтен һәм хәҙерге фәнни һәм сәйәси ысынбарлыҡ контексында башҡорт милли батырының образын тикшерҙе. Шулай уҡ Социомәҙәни моделләү үҙәге тарафынан Башҡортостан Республикаһы Фәндәр академияһы һәм Евразия ғилми-белем биреү үҙәге базаһында «Башҡорт халҡының үҫеш стратегияһын тормошҡа ашырыу контексында тел һәм оҡшашлыҡ» фәнни форумының йомғаҡлау саралары сиктәрендә С.И. Руденко иҫтәлегенә арналған түңәрәк өҫтәл үткәрелде. Был проект та Башҡортостан Башлығы гранты ярҙамында ғәмәлгә ашырыла, проекттың етәксеһе – Азат Бердин. Фекер алышыуҙа Башҡортостан Республикаһының Фәндәр академияһы, Тарих, тел һәм әҙәбиәт институты, Өфө фән һәм технологиялар университеты ғалимдары, шулай уҡ Рәсәйҙең башҡа субъекттарынан һәм Беларусь Республикаһынан саҡырылған эксперттар ҡатнашты. «С.И. Руденко һәм Л.Н. Гумилев Көньяҡ Уралдың күсмә халыҡтары тураһында» доклады менән Санкт-Петербург дәүләт университетының этнология кафедраһы мөдире, тарих фәндәре кандидаты, доцент А.Г. Новожилов сығыш яһаны. Совет һәм унан һуңғы осорҙа Волга буйы башҡорттары һәм татарҙарының этник тормошоноң этноконфессиональ аспекттары тураһында И.Н. Ульянов исемендәге Ульяновск дәүләт педагогия университетының география һәм экология кафедраһы профессоры, тарих фәндәре докторы Азат Иҙиәтуллов һөйләне. Сарала ҡатнашыусылар С.И. Руденко менән Л.Н.Гумилевтың хеҙмәттәшлеген, башҡорттарҙың һәм татарҙарҙың тарихи һәм заманса этноконфессиональ тәжрибәләрен, Башҡортостан халыҡтары тарихында евразиялылыҡты, шулай уҡ Урал-Волга буйы халыҡтарының этник һәм сәйәси тарихының мөһим мәсьәләләрен тикшерҙе. - С.И. Руденко – уҙған быуаттың тәүге яртыһында башҡорттарҙың этнографияһын һәм мәҙәниәтен өйрәнгән ватан гуманитар фәнендә күренекле ғалимдарҙың береһе. Түңәрәк өҫтәлдә уның ижадына арналған айырым тема алыныуы – осраҡлы түгел, был – башҡорттарҙың этнографияһын өйрәнеүгә индергән өлөшө баһалап бөткөһөҙ ҙур булған бөйөк ғалимға хөрмәт күрһәтеү, – тип билдәләне Башҡортостан Республикаһы Фәндәр академияһы Стратегик тикшеренеүҙәр институтының ғилми хеҙмәткәре, социаль фәндәр кандидаты Илшат Фәрит улы Йосопов. Фотолар: БР Фәндәр академияһының Стратегик тикшеренеүҙәр институтынан.