“Беҙҙе яҡшы ҡаршы алдылар”

2024 йылда Башҡортостанда 129 медицина хеҙмәткәре “Ауыл табибы” программаһы буйынса түләүҙәр алды. Шуларҙың береһе табип-гинеколог Илнура Моратова ғаиләһе менән Татарстандан Үрге Тәтешлегә күсеп килде. Илнура Мәджит ҡыҙы 2014 йылда Башҡорт дәүләт медицина университетын тамамлағас, “Акушерлыҡ һәм гинекология” белгеслеге буйынса ординатурала уҡый. 2017 йылдан Зеленодольск үҙәк район дауаханаһында акушер-гинеколог булып эш башлай. Тормош иптәше – табип-анетезиолог-реаниматолог. Борай районында тыуып үҫкән. 2024 йылда йәш белгестәр тыуған яҡтарына ҡайтырға хәл итә һәм июль айында Үрге Тәтешле дауаханаһына эшкә урынлаша. Илнура Мәджит ҡыҙы “Ауыл табибы” программаһында ҡатнашып, бер миллион һум күләмендә түләү ала. Эш осоронда 2,5 мең пациентты ҡабул итә, меңдән ашыу ультратауыш тикшереүе үткәрә. –Беҙҙе тыуған яҡта яҡшы ҡаршы алдылар. Дауахананың баш табибы һәм остаздар менән тиҙ уртаҡ тел таптыҡ, кешеләр бында ихлас, һәйбәт күңелле. Ирем менән бында килеүебеҙгә бер тамсы ла үкенмәнек. ”Ауыл табибы” программаһы – кадрҙарҙы ауылдарға йәлеп итеү өсөн яҡшы мөмкинлек. Ауыл кшеләре лә, мегаполис халҡы кеүек, медицина ярҙамына мохтаж, – тине табип-акушер-гинеколог Илнура Моратова. Яңы “Оҙайлы һәм әүҙем тормош” проекты ( нацпроект “Продолжительная и активная жизнь”) “Һаулыҡ һаҡлау” милли проектын һәм элекке ҙур ҡоласлы “Демография” проектының ҡайһы бер йүнәлештәрен артабан үҫтерәсәк. Тәү сиратта ярҙам сараларын ғүмер оҙайлығы илдәге уртаса күрһәткестән артта ҡалған төбәктәр һәм ауылдар аласаҡ. Милли проект һаулыҡ һаҡлауҙың тәүге звеноһын артабан яңыртыуға йүнәлтелгән, йөрәк-ҡан тамырҙары, онкология һәм диабет сирҙәре менән көрәш буйынса федераль программалар ҙа дауам итәсәк. Тап ошо мөһим милли проект 2030 йылға көтөлгән ғүмер оҙайлығын 78 йәшкә (артабан 80 йәшкә) тиклем еткереүҙе күҙ уңында тота. Иҫегеҙгә төшөрәбеҙ, яңыртылған милли проекттар Рәсәй Президенты Владимир Путин ҡарары буйынса 2025 йылдың 1 ғинуарынан тормошҡа ашырыла. Фото: Һаулыҡ һаҡлау министрлығының матбуғат хеҙмәте.