Бишкекте Кыргыз Республикасы менен Словениянын ортосундагы кызматташтыкты өнүктүрүү боюнча сүйлөшүүлөр болуп өттү. Соода-экономикалык байланыштарды чыңдоо жана тоо демилгелерин илгерилетүү маселелери талкууланды.
🌍 Бишкекте 4-март күнү Кыргыз Республикасынын тышкы иштер министринин орун басары Медер Абакиров жана Словениянын Тышкы иштер министрлигинин мамлекеттик катчысы Марко Штуцин саясий консультациялардын үчүнчү айлампасын өткөрүштү.
🤝 Жолугушууда тараптар Кыргыз Республикасы менен Словениянын ортосундагы эки тараптуу кызматташуунун негизги маселелерин талкуулашты. Өзгөчө көңүл өз ара пайдалуу соода-экономикалык мамилелерди тереңдетүүгө жана ар түрдүү тармактарда тажрыйба алмашууга бурулду.
📜 Эки мамлекеттин ортосундагы келишимдик-укуктук базаны кеңейтүү жана жогорку деңгээлдеги өз ара сапарларды уюштуруу маселелери да каралды.
⛰️ Жолугушууда тоо демилгелери өзгөчө көңүл борборунда болду. Атап айтканда, туруктуу өнүгүү үчүн «Глобалдык тоо диалогу» эл аралык конференциясы, Дүйнөлүк тоо жаштар фестивалы жана «Тоо беш жылдыгы» программасын ишке ашыруу маселелери талкууланды. Бул программаны 2027-жылы «Бишкек+25» Экинчи Глобалдык тоо саммитинин алкагында жыйынтыктоо пландалууда.