Бында буласаҡ архитекторҙар уҡый

Өфө ҡалаһындағы донъя кимәлендәге вуз-ара студенттар кампусы төрлө юғары уҡыу йорттарының берлектәге һәм үҙаллы проекттарын үҫтереүгә һәм тормошҡа ашырыуға булышлыҡ итә. Мәҫәлән, Өфө дәүләт нефть техник университетының Стартап-студияһы үҙенсәлекле проект – төҙөлөш 3D-баҫмаһы өсөн сеймал ҡатнашмаһы уйлап тапҡан. Уға патент алыуға ғариза ебәреүҙә Өфө фән һәм технологиялар университетының Технологиялар трансферы үҙәге ярҙам иткән. Был ҡатнашма төҙөлөш объекттарын һәм бәләкәй архитектура формаларын баҫыу өсөн тәғәйенләнгән. Уның өҫтөнлөгө – һыуыҡҡа сыҙамлылығы, ныҡлығы һәм хаҡы йәһәтенән отошло булыуы. Индустриаль партнерҙар булараҡ, Өфө гипс компанияһы һәм “Аркон Констракшн” яуаплылығы сикләнгән йәмғиәте сығыш яһай. Олег БАУЛИН, Өфө дәүләт нефть техник университеты ректоры: – Өфө нефть техник университеты – республикала төҙөлөш һәм ошо йүнәлештәге тармаҡтар өсөн кадрҙар әҙерләгән берҙән-бер юғары уҡыу йорто. Университетыбыҙҙы төбәктә архитекторҙар һәм төҙөүселәр әҙерләү буйынса монополист булып тора, тип әйтә алабыҙ. Мәҫәлән, Башҡортостанда нефть-газ йүнәлеше буйынса белгестәрҙең 72 проценты беҙҙә уҡый. Төҙөлөш тармағы өсөн юғары белемле кадрҙар әҙерләү Өфө дәүләт нефть техник университетының Архитектура-төҙөлөш институты тарафынан маҡсатлы рәүештә алып барыла. Институт уҡытыусылары һәм студенттар төрлө сараларҙа әүҙем ҡатнаша. Мәҫәлән, улар “УралСтройИндустрия” халыҡ-ара форум-күргәҙмәһендә төҙөлөштә яңы технологиялар һәм яһалма интеллект тураһында секциялар ойоштороусыларының береһе булды. Шулай уҡ үҙҙәренең эшләнмәләре менән дә таныштырҙы. Ғөмүмән, нефть университеты “УралСтройИндустрия” күргәҙмәһенең бөтә стендтарында ла тиерлек күрһәтелде, сөнки һәр Башҡортостан предприятиеһында уны тамамлаусылар эшләй. Был факт тағы ла бер тапҡыр ӨДНТУ-ның нефть университеты булыуға ҡарағанда, күберәк политехник вуз булыуын раҫлай. Әйтеп үтеүебеҙсә, университетта биналарҙы һәм ҡоролмаларҙы төҙөү өсөн цемент нигеҙендә ҡоро ҡатнашманың тәжрибә өлгөләре эшләнгән. Уға ярашлы, ҡатнашма технологияһы буйынса ике ҡатҡа тиклемге бейеклектәге терәк стеналы биналарҙы 3D-баҫыу технологияһы буйынса һалырға мөмкинлек бирә. - Төрлө компаниялар һәм партнерҙарыбыҙ, шул иҫәптән мәктәптәр Архитектура-төҙөлөш институтына дизайн проекты, макет эшләү йәһәтенән ярҙам итеүҙе һорап йыш мөрәжәғәт итә. Был бурысты уҡытыусылар етәкселегендәге студенттар ҙа атҡара ала. Юғары курс студенттары өлкән коллегаларына көнәркәш була алыуын күрһәтергә һәм университетты тамамлаған һәр йәш кешенең ысын эш тәжрибәһе һәм ҡулында проекттар портфолиоһы булыуын теләйбеҙ, – ти Стратегик башланғыстар агентлығы директорының йәштәр сәйәсәте буйынса урынбаҫары, студенттарҙың проект оҫтаханаһы етәксеһе Рәсүл Насибуллин. Буласаҡ архитекторҙар, Өфө дәүләт нефть техник университетының дүртенсе курс студенттары Ирина Черткоева һәм Ангелина Маленкова ВДНХ-Экспо комплексында үҙҙәренең фельдшер-акушерлыҡ пункты макетын тәҡдим иткән. Ҡыҙҙар бала саҡтан архитектор һөнәре тураһында хыялланыуы хаҡында һөйләне. – Беҙгә айырыуса Өфө нефть университетының профессиональ һәм шәхси үҫеш өсөн сикһеҙ мөмкинлектәр асыуы оҡшай, – тине студенттар. Фото: ӨДНТУ-ның матубғат хеҙмәте.