Мәҙәниәт тармағына ҙур ярҙам булды

2017 йылдан Башҡортостанда “Берҙәм Рәсәй” партияһының “Кесе Ватан мәҙәниәте” федераль проектын ғәмәлгә ашырыуға 800 миллион һум самаһы, шул иҫәптән федераль ҡаҙнанан 667 миллион һум йүнәлтелгән. Был республиканың 301 мәҙәни-ял итеү учреждениеһының матди базаһын яҡшыртырға мөмкинлек бирҙе. 3 мартта Башҡортостан Башлығы Радий Хәбиров уҙғарған оператив кәңәшмәлә проектты тормошҡа ашырыу тураһында республиканың мәҙәниәт министры Әминә Шафиҡова һөйләне. – 2017 йылдан учреждениелар өсөн бөтәһе 301 комплект тауыш һәм яҡтыртыу ҡорамалдары, 2 880 сәхнә костюмы, оркестрҙар, шулай уҡ хореография һәм фольклор ансамблдәре өсөн 236 музыка ҡоралы һатып алынды, – тине Әминә Шафиҡова. - 24 мәҙәниәт учреждениеһында театр креслолары алмаштырылды, 123-өндә - мебель, ә 10-һында - диодлы экрандар ҡуйылды. Мәҙәниәт министры театр постановкаларының репертуарын киңәйтеү тураһында ла хәбәр итте. Федераль проект тормошҡа ашырыла башлағандан алып 101 яңы спектакль, шул иҫәптән 45 балалар спектакле ҡуйылды. Ошо ваҡыт эсендә театрҙарға 3,5 миллион кеше килгән. 2025 йылға тағы ла 100 мәҙәниәт учреждениеһын яңыртыу планлаштырыла. Ошо маҡсатҡа 85,5 миллион һум йүнәлтелә, шул иҫәптән 72,9 миллион һум – федераль бюджеттан. Тамашасыларҙы яңы постановкалар ҙа көтә. Әйтәйек, Арыҫлан Мөбәрәков исемендәге Сибай дәүләт башҡорт драма театрында Советтар Союзы Геройы, генерал-майор Таһир Күсимовҡа арналған “Ҡанатлы генерал” спектакле ҡуйыла. Мостай Кәрим исемендәге Милли йәштәр театры башҡорт халыҡ эпосы буйынса “Аҡбуҙат” спектаклен әҙерләй. Стәрлетамаҡ башҡорт драма театры иһә Сыңғыҙ Айытматовтың повесы буйынса “Аҡ пароход” спектаклен сәхнәләштерә. Башҡортостан Башлығы республиканың Мәҙәниәт министрлығына һәм учреждениеларҙың ижади коллективтарына “Кесе Ватан мәҙәниәте” партия проектын тормошҡа ашырыу барышында әүҙем эшләгәндәре өсөн рәхмәт белдерҙе. Фото: Башҡортостан Башлығы сайты.