Алты йылда 806 йәмәғәт биләмәһе төҙөкләндерелгән

2019 йылдан Башҡортостанда “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проекты сиктәрендә дөйөм суммаһы 8,2 миллиард һумға 806 йәмәғәт биләмәһе төҙөкләндерелгән. Был хаҡта торлаҡ-коммуналь хужалыҡ министры Ирина Голованова аҙналыҡ оператив кәңәшмә барышында белдерҙе. 2024 йылда ғына барлыҡ муниципалитеттарҙа 123 йәмәғәт киңлеге тәртипкә килтерелде, уларҙың 73-ө - ҡалаларҙа һәм 50-һе - ауылдарҙа. Был күрһәткес буйынса Башҡортостан Волга буйы федераль округында беренсе һәм Рәсәй Федерацияһы субъекттары араһында дүртенсе урынды биләй. 2025 йылдан йәмәғәт биләмәләрен төҙөкләндереүҙе “Йәшәү өсөн инфраструктура” яңы милли проекты сиктәрендә дауам итәләр. Быйыл пландарҙа – дөйөм суммаһы 1,2 миллиард һумға 94 киңлекте яңыртыу. Бынан тыш, башҡа программалар сиктәрендә лә 70 объект тәртипкә килтереләсәк. Мәҫәлән, Мәләүездә Дан бульвары төҙөкләндереләсәк, Нефтекамала - Йәштәр йорто алдындағы биләмә, ә Белоретта Еңеү паркы тирә-яғы төҙөкләндереләсәк. “Уңайлы ҡала мөхитен булдырыу” программаһы буйынса яңыртылған барлыҡ объекттарҙы тауыш биреү барышында халыҡ үҙе һайлай. 21 апрелдән 12 июнгә тиклем 2026 йылда төҙөкләндереләсәк объекттарҙы билдәләргә мөмкин. Ирина Голованова билдәләүенсә, Башҡортостан бәләкәй ҡалалар һәм тарихи биләмәләрҙә уңайлы ҡала мөхите булдырыу буйынса Бөтә Рәсәй конкурсында ла әүҙем ҡатнаша. 34 проект еңеүсе булды, уларҙың 27-һе тормошҡа ашырылды. Ошо маҡсатҡа 5,5 миллиард һум йүнәлтелгән, шул иҫәптән 2,9 миллиард һумы - федераль бюджеттан. 2024 йылда Ағиҙелдә, Дүртөйлөлә, Ишембайҙа, Мәләүездә, Яңауылда биш еңеүсе проектты ғәмәлгә ашырып бөттөләр һәм Баймаҡта, Ишембай районының Верхотор ауылында проекттарға тотондолар. 2025 йылда Бәләбәйҙә, Благовещенда, Нефтекамала, Салауатта һәм Учалыла проекттар буйынса эштәр башлана. – Яҡшы ойошторолған эш. Ольга Владимировна Сарапуловаға һәм ул етәкләгән Башҡортостандың ҡалаларҙы үҫтереү институтына йәнә рәхмәт әйткем килә. Улар беҙгә ҡыҙыҡлы ҡала төҙөлөшө һәм архитектура ҡарарҙары бирә, - тине Радий Хәбиров. - Ә Торлаҡ-коммуналь хужалыҡ министрлығы иң мөһиме - ваҡытында сауҙа үткәреү, эшкә ваҡытында сығыу һәм уның сифатын тәьмин итеү. Төбәк етәксеһе төҙөкләндереү эштәре тамамланғандан һуң Верхоторҙы туристик маршруттар исемлегенә индерергә ҡушты. Республика халҡы һәм ҡунаҡтары ошо урындың үҙенсәлекле архитектураһы һәм ғәжәйеп матурлығы менән таныша алыр ине. Фото: Башҡортостан Башлығы сайты.