665 ҡатнашыусы бар ҙа

Республикала 665 кеше “Башҡортостан геройҙары” төбәк кадрҙар программаһында ҡатнашыуға заявка биргән дә инде. Был хаҡта Радий Хәбиров рәйеслегендә үткән аҙналыҡ оператив кәңәшмәлә Башҡортостан Башлығы Хакимиәте етәксеһе вазифаһын башҡарыусы Азат Бадранов белдерҙе. Проекттың маҡсаты – махсус хәрби операция хәрби хеҙмәткәрҙәре иҫәбенән яңы быуын идарасыларын әҙерләү. Теркәү этабы 24 февралдә башланды һәм 2025 йылдың 31 мартына тиклем дауам итә. Заявканы урта профессиональ йәки юғары белемле, шулай уҡ етәкселек тәжрибәһенә эйә булған махсус хәрби операция яугирҙәре һәм ветерандары тапшыра ала. Бының өсөн героибашкортостана.рф сайтында шәхси кабинет булдырырға, анкета тултырырға, эссе яҙырға, онлайн-тест үтергә кәрәк. Артабан төп этапта ғариза биреүселәрҙең эшлекле һәм шәхси сифаттарын баһалау өсөн шәхси һәм төркөмгә эштәрҙе башҡарыу ҡаралған. Барлыҡ һынауҙарҙы уңышлы үткәндәр ҡайтанан һөнәри әҙерлек буйынса курстарға саҡырыу аласаҡ. – Программаны һөҙөмтәле тормошҡа ашырыу һәм ҡатнашыусыларҙы һайлап алыу объективлығы өсөн Йәмәғәт советы булдырылды. Проект еңеүселәре власть органдарына, шулай уҡ дәүләт һәм коммерция компанияларына урынлаштырыласаҡ, – тип өҫтәне Азат Бадранов. – Заявкаларҙың дөйөм һанынан 94 проценты – Башҡортостанда йәшәүселәр, 64 проценты – ғәмәлдәге МХО-ла ҡатнашыусылар, 36 проценты – махсус операция ветерандары, биш проценты – ҡатын-ҡыҙҙар. Бөтә һорауҙар буйынса : geroirb@bashkortostan.ru электрон почтаға мөрәжәғәт итеп яҙырға мөмкин. Беренсе аҙнала 80 мөрәжәғәт эшкәртелде лә инде. Радий Хәбиров “Башҡортостан геройҙары” кадрҙар программаһының “Геройҙар ваҡыты” федераль проектының дауамы булыуын билдәләне. – Мин даими рәүештә геройҙар төркөмө менән осрашам. Махсус хәрби операцияла ҡатнашыусыларҙың күбеһен беләм. Улар араһында ысын мәғәнәһендә талантлы кешеләр бар. Яугирҙәр бик ҡатмарлы шарттарҙа сыныҡты, уларҙың дисциплинаһы юғары. Улар яңы энергия, әхлаҡи, кешелек һәм идара итеү сифаттарына эйә кешеләр тип иҫәпләйем. Мин дә уларҙың остазы булырға теләйем, – тип йомғаҡ яһаны Башҡортостан Башлығы. – Был проектҡа формаль ғына ҡарарға ярамай. Бында һөнәри йүнәлеш биреү бурысы ла мөһим – кешегә нимә менән шөғөлләнергә теләгәнен, уның оҫталығын асыҡларға мөмкинлек биреү. Дөрөҫ йүнәлеш бирергә кәрәк - был уның үҫеше өсөн ҙур ярҙам буласаҡ. Егеттәргә хәрби хеҙмәттән гражданлыҡ хеҙмәтенә тыныс күсергә ярҙам итеү мөһим. Фото: Башҡортостан Башлығы сайты.