Иммунитетты нисек нығытырға?

Рәсәй Һаулыҡ һаҡлау министрлығы 4 февралдән 2 мартҡа тиклем Иммунитетты нығытыу һәм уға ярҙам итеү аҙнаһы үткәреүҙе иғлан итте. Был сараның маҡсаты – халыҡҡа сирҙәрҙе иҫкәртеүҙә иммунитетты нығытыуҙың һәм вакцина яһатыуҙың мөһимлеген аңлатыу. Организмдың иммун системаһы тәғәйенләнеше – организмды сир таратыусы вирустарҙан һәм микроорганизмдарҙан,микроб һәм паразиттарҙан ғына һаҡлау түгел, организмдың контролдән сыҡҡан күҙәнәктәренән дә аралау ул. Иммунитетҡа нимә кире тәьҫир итә? Дөрөҫ булмаған йәшәү рәүеше – алкоголь ҡулланыу, тәмәке тартыу, аҙ хәрәкәтләнеү. Стрестар – төшөнкөлөккә бирелеү, ҡуҙғыусанлыҡ, арыу, йоҡоһоҙлоҡ. Тирә-яҡ мөхиттең кире тәьҫире һәм насар туҡланыу. Беҙҙең нимә ашауыбыҙҙан иммунитеттың нисек булыуы тора. Аҡһымлы аҙыҡ антиесемдәр барлыҡҡа килтереү өсөн организмды тейешле аминокислоталар менән тәьмин итә. Майҙар иммун күҙәнәктәрен төҙөү өсөн кәрәк, ә углеводтар иммун системаһы эшмәкәрлеге өсөн энергия бирә. Организмдың һаҡлаусы функцияларын нығытырға һәләтле аҙыҡтарҙы һанап үтәйек: лимон, имбир, йәшел сәй, еләк-емеш, бутҡалар, һөт аҙыҡтары, сәтләүектәр. 65 йәштән өлкәнерәк кешеләргә пневмококктан вакцина яһатырға тәҡдим итәбеҙ. Табиптарҙың әйтеүенсә, организмдың ҡайһы бер системаларының эшмәкәрлеге насарланыуы мөһим матдәләр – А витамины, В, С, D төркөмө витаминдары етешмәүенән дә килеп сыға. А витамины кишерҙә, ҡабаҡта, һыйыр ите бауырында, треска балығы бауырында бар. А витаминының етешмәүе тәү сиратта күреү һәләтенә тәьҫир итә. С витамины инфекцияларға ҡаршы тороуҙа ҙур роль уйнай. Уның етешмәүе иммунитеттың күҙәнәктәр звеноһын боҙоуға килтерә. Антибиотиктар ҡулланыу, физик һәм аҡыл көсөргәнеше, инфекциялар, паразиттар, дисбактериоз да иммунитетты көсһөҙләндерә. Шулай уҡ йыл миҙгелдәре һәм климаттың иммунитетҡа йоғонтоһо ҙур. Иммун системаһы үҙенең бурысын үтәмәгәндә кеше йыш һалҡын тейҙерә, сирҙәрҙе ауыр үткәрә, онкология патологияларына юлығыу хәүефе лә арта. Һаулыҡ һаҡлау министрлығының штаттан тыш баш иммунологы Диләрә Пролыгина әйтеүенсә, балаларҙың йыш сирләүен норма тип ҡарарға кәрәк. Бала организмы төрлө инфекциялар менән осраша һәм аҡрынлап уларға ҡаршы көрәшергә өйрәнә. ”Балалар гиподинамиянан, режим булмауҙан, дөрөҫ туҡланмауҙан, сыныҡмауҙан яфалана. Әгәр бала спорт менән шөғөлләнһә, күп ваҡытын саф һауала үткәрһә, хроник сирҙәре булмаһа, ул ауырыуҙарҙы еңел формала һәм өҙлөгөүҙәрһеҙ үткәрәсәк”, – тип аңлатты балалар иммунологы. Фото: Һаулыҡ һаҡлау министрлығының матбуғат хеҙмәте.