Рәсәй-Ҡытай индустриаль паркының башҡарма етәксеһе Хао Лянюань менән осрашыу

Башҡортостан Башлығы Ҡытай Халыҡ Республикаһы менән мөнәсәбәттәрҙең әһәмиәтен һыҙыҡ өҫтөнә алды, был илде төбәктең төп тышҡы иҡтисади партнерҙарының береһе тип атаны. – Әйтергә кәрәк, беҙ тауар әйләнеше күләмен арттырыға ғына түгел, ә хеҙмәттәшлектең тәрәнерәк формаларын үҫтерергә лә тырышабыҙ, - тип билдәләне Радий Хәбиров. – Беҙ Ҡытай партнерҙары менән бәйләнеште һаҡлайбыҙ һәм бергәләп эшләүҙең төрлө варианттарын тикшерергә әҙербеҙ. Үҙ сиратында, Хао Лянюань ханым Рәсәй-Ҡытай индустриаль паркының берлектәге проекттарҙы тормошҡа ашырыуҙағы ҡаҙаныштарын билдәләне һәм Рәсәй Федерацияһы субъекттары менән иҡтисади бәйләнештәрҙе артабан киңәйтеүҙең мөһимлеген һыҙыҡ өҫтөнә алды. Ул шулай уҡ Ҡытай индустриаль паркында Рәсәйҙең төрлө төбәктәренән продукция менән павильондар төҙөү пландары тураһында һөйләне, был сауҙа һәм мәҙәни алмашыуҙар үҫешендә мөһим аҙым буласаҡ. – Башҡортостан менән хеҙмәттәшлегебеҙ тотороҡло алға китеш күрһәтә, һәм берлектәге тырышлыҡ менән иҡтисади хеҙмәттәшлек өсөн яңы офоҡтар аса алырбыҙ, тип ышанабыҙ, - тип һығымта яһаны Хао Лянюань. Яҡтар шулай уҡ «Өфө» транспорт-агро-логистика паркы һәм Ляочжун индустриаль паркы резиденттарын берләштергән трансграница сауҙаһы өсөн Халыҡ-ара B2B-платформаһын эшләтеп ебәреүҙе тикшерҙе. Халыҡ-ара төбәктәр иҡтисади хеҙмәттәшлек советының генераль директоры Ринат Голда хәбәр итеүенсә, уны төҙөү өҫтөндә эш башланған. Ул халыҡ-ара сауҙалағы кәртәләрҙе бөтөрөүҙең мөһим ҡоралына әүереләсәк, коммерция операцияларын үткәреү өсөн төрлө илдәрҙән һатыусыларҙы һәм һатып алыусыларҙы бәйләйәсәк, партнерҙар эҙләүҙе, килешеүҙәр төҙөүҙе һәм тәьмин итеүҙе идара итеүҙе еңеләйтәсәк һәм автоматлаштырыу һәм заманса технологиялар ярҙамында бизнестың һөҙөмтәлелеген арттырасаҡ. Осрашыу аҙағында индустриаль парк етәксеһе Башҡортостан вәкилдәрен май айында Шэньчжэнь ҡалаһында үтәсәк сауҙа-иҡтисади хеҙмәттәшлек буйынса икенсе Рәсәй-Ҡытай конференцияһына саҡырҙы. Был сара инвестициялар йәлеп итеү һәм ике яҡлы иҡтисади бәйләнештәрҙе нығытыу мөмкинлектәрен тикшереү өсөн майҙансыҡ буласаҡ. Республика Башлығы төбәктәр араһында хеҙмәттәшлекте артабан уңышлы үҫтереүгә ышаныс белдерҙе. Радий Хәбиров Башҡортостан делегацияһының Ҡытай Халыҡ Республикаһына барыу пландары тураһында һөйләне. Атап әйткәндә, Харбин йәрминкәһе сиктәрендә төбәк компаниялары үҙ тауарҙарын тәҡдим итәсәк. - Беҙ ысынлап та Ҡытай Халыҡ Республикаһының бизнесы, корпорациялары һәм дәүләт структуралары менән хеҙмәттәшлек итеү менән ҡыҙыҡһынабыҙ. Бөгөнгө осрашыу беренсе аҙым ғына, һәм мин ышанам, алда беҙҙе бик күп мөһим фекер алышыуҙар көтә. Әйҙәгеҙ, бөгөн беҙ хеҙмәттәшлектең яңы этабына нигеҙ һалдыҡ тип иҫәпләйек. Барыбыҙға ла был эштә уңыштар теләйем! – тип йомғаҡ яһаны Радий Хәбиров. Белешмә: Ҡытай Халыҡ Республикаһы - Башҡортостандың төп партнерҙарының береһе. Ул республиканың тышҡы сауҙа әйләнешендә 24,6 процент өлөш менән беренсе урынды биләй. Башҡортостан Ҡытай Халыҡ Республикаһына машиналар эшләү продукцияһын һәм минераль ресурстарҙы экспортлай. Ә Ҡытай Халыҡ Республикаһы Башҡортостанға машиналар эшләү техникаһын һәм химия сәнәғәте продукцияһын оҙата. 2025 йыл башына Башҡортостанда Ҡытай капиталы ҡатнашлығында 17 предприятие эшләй. 2022 йылдан Пекинда Рәсәй Федерацияһының Ҡытай Халыҡ Республикаһындағы Сауҙа вәкиллеге ҡарамағындағы Башҡортостан вәкиллеге эшләй. https://glavarb.ru/ru/news/event/vstrecha-s-ispolnitelnym-rukovoditelem-rossiysko-kitayskogo-industrialnogo-parka-hao-lyanyuan-74410/