Кредит алыуға тыйыу ҡуйып буласаҡ

2025 йылдың 1 мартынан граждандар был хоҡуғынан файҙалана аласаҡ. “Хәҙер күптәрҙең, бигерәк тә өлкән йәштәгеләрҙең аҡсаһын алдап алыу осраҡтары йышайҙы. Өҫтәүенә, башҡа кеше исеменә кредит рәсмиләштереү осраҡтары күбәйҙе. Беҙҙе, пенсионерҙарҙы, мутлашыусылар ҡулына юлыҡтырмау өсөн берәй саралар күрелмәйме икән?.. З. ИБРАЕВА. Өфө ҡалаһы”. – Ысынлап та, хәҙер, ҡыҙғанысҡа ҡаршы, күптәрҙең, шул иҫәптән өлкән йәштәгеләрҙең, заман “остап бендер”ҙарының тоҙағына эләгеп, аҡсаһын биреү осраҡтары күбәйҙе. Ошондай аяныслы хәлдәрҙе кәметеү өсөн дәүләт бер алым уйлап сығарған – 2025 йылдың 1 мартынан граждандар үҙҙәрен кредит алыуға тыйыу ҡуя аласаҡ. Был хаҡта Рәсәй Хөкүмәтенең матбуғат хеҙмәте хәбәр итте. Әлеге ваҡытта Рәсәй Федерацияһы властары ғаризаны биреү һәм яуап алыу процедураһын раҫлаған. Кредит алыуға тыйыу тураһындағы ғаризаны ике юл менән тапшырып буласаҡ. Беренсеһе – “Дәүләт хеҙмәттәре” порталы аша – унан Кредит тарихтары бюроһына мәғлүмәт ебәреләсәк һәм шәхси кабинетҡа ҡабул ителгән ҡарар тураһында хәбәр киләсәк. Икенсеһе – үҙеңә Күп функциялы үҙәккә барып ғариза яҙыу. Был осраҡта ҡарар граждандың кредит тарихтары бюроһындағы шәхси архивында күренәсәк. Бынан тыш, яуапты Күп функциялы үҙәктә лә алып буласаҡ. Ошондай уҡ ике юл менән – “Дәүләт хеҙмәттәре” порталы аша һәм Күп функциялы үҙәктә – үҙеңә кредит алыуға тыйыуҙы юҡ итергә мөмкин буласаҡ. Мутлашыусыларҙың кешеләргә алдап кредит юллатыуы, унан был аҡсаны үҙләштереүе осраҡтарының күбәйеүе сәбәпле ҡабул ителгән был сара ҡулланыу займдарына һәм микрофинанс ойошмаларына ҡағыласаҡ. Кредит һәм микрофинанс ойошмалары кемгәлер кредит бирер алдынан мотлаҡ тыйыу бармы-юҡмы икәнлеге тураһында белергә тейеш. Әйткәндәй, хәҙер күптәр бурысҡа батып бөткән инде. Шуға күрә түләй алмаған осраҡта ҡурҡып, ҡасып ятмайынса, банкка барып, проблеманы хәл итеү юлдарын эҙләү зарур. Ошо осраҡта ғына “неустойка”, йәғни штраф күләмен кәметеп була. Нәсих Хәлисов фотоһы.