Գյումրիում փետրվարի 21-ին բռնության ենթարկված բուժաշխատողը տեղափոխվել է հիվանդանոց, հայտնում է ՀՀ ՆԳՆ ոստիկանությունը։
Գերատեսչությունից մանրամասնում են, որ դեպքի մասին ահազանգն ստացվել է 06․40-ի սահմաններում։ Շիրակի մարզի օպերատիվ կառավարման կենտրոն շտապօգնությունից հաղորդում է ստացվել, որ գանգուղեղային վնասվածքով Ազատան բնակավայրից «Գյումրի» բժշկական կենտրոն բուժօգնության է տեղափոխվել 31-ամյա բուժակը։
Ըստ ոստիկանության՝ երիտասարդը հայտնել է, որ ժամը 05․10-ի սահմաններում կանչով մեկնել է Ազատան բնակավարի 28-րդ փողոցի տներից մեկը, որտեղ 75-ամյա քաղաքացուն օգնություն ցուցաբերելու ընթացքում նրա որդին՝ 44-ամյա տղամարդը, մոխրամանով հարվածել է դեմքին՝ պատճառելով մարմնական վնասվածքներ։
Տուժողից ընդունվել է հաղորդում։ 44-ամյա տղամարդը ձերբակալվել և տեղափոխվել է Համայնքային ոստիկանության Ախուրյանի բաժին։ Կազմված փաստաթղթերը ներկայացվել են Շիրակի մարզային քննչական վարչություն։
Դեպքին անդրադարձել է ԵՊԲՀ ռեկտոր Արմեն Մուրադյանը՝ բուժաշխատողի հանդեպ բռնությունն անընդունելի և անմարդկային որակելով։
«Անընդունելի է ու անմարդկային, երբ մարդը ձեռք է բարձրացնում բուժաշխատողի վրա` իր մասնագիտական առաքելությունն իրականացնելու պահին։
Ամենախիստ պատժի ու պարսավանքի պետք է ենթարկվեն նմանատիպ դեպքերը։ Արարքի պատճառած բարոյական վնասը ոչ միայն բուժաշխատողին է, այլև մեր ողջ հասարակությանը։ Նմանատիպ երևույթներն անառողջ, փոխադարձ անվստահության մթնոլորտ են ստեղծում»,- գրել է ռեկտորը։
Նա հավելել է, որ բուժաշխատողի հանդեպ կատարված ցանկացած ոտնձգություն դատապարտելի է, և այն պետք է հասարակության կողմից համապատասխան արձագանքի արժանանա։
Ինչպես հայտնում է Shamshyan.com-ը, բռնության ենթարկված բուժակը Մհեր Քոլոյանն է, իսկ նրա նկատմամբ ոտնձգություն կատարողը՝ Ախուրյանի նախկին ոստիկանապետերից մեկի ազգականը: Կայքի տեղեկություններով՝ բուժակը 44-օրյա պատերազմի մասնակից է, պատերազմի օրերին վիրավորվել է և երբեք ոչ մի բացասական կարծիք նրա աշխատանքային գործունեության վերաբերյալ բուժանձնակազմը չի ստացել:
Նորություններին հետևեք մեր կայքում, ինչպես նաև Telegram-ում և YouTube-ում