“Салауатым бына-бына ҡайтып инер кеүек...”

Бәрәкәтле Стәрлебаш еренә эш сәфәре буйынса беренсе тапҡыр ғына барыуыбыҙ түгел, тик бөгөн был тарафтарға ғүмерҙә булмағанса тулҡынланыу менән юлға сыҡтым, күңелемде төрлө уй-хис биләне: махсус хәрби операцияла ҡатнашҡан, ғүмерен Тыуған иле өсөн аямаған яугирҙең ҡатыны менән осрашыу көтә ине беҙҙе. Әммә төндә эргә-тирәгә ап-аҡ балаҫ кеүек түшәлгән, иртә таңда инде һирәкләп яуған ҡар уй-ниәтебеҙҙе ҡеүәтләгән, Тәбиғәт-Әсә үҙе терәк булған кеүек тойолдо... Стәрлебаш районының Иҫке Ҡалҡаш ауылында фотохәбәрсебеҙ Айрат Нурмөхәмәтов менән беҙҙе Сәриә Ғүмәр ҡыҙы Ғәлимова ҡапҡа тышына сығып уҡ ҡаршы алды һәм, күптән белгән кешеләреләй, ихласлап беҙҙе ҙур, иркен һәм матур йортҡа әйҙүкләне. “2000 йылда Салауат ошо йортто һала башланы, уға бер туған ағаһы Флүр, минең бер туған ағайым Илдар ныҡ ярҙам итте. Бураны Бөрйән районының Собханғол ауылынан килтергәйнеләр, - тип башланы һүҙен күҙҙәре моң-һағыш менән тулы ҡатын. – Ана эргәлә генә икенсе улыбыҙ ҙа өй күтәрҙе. Ике ул үҫтергәйнек Салауатым менән...” Ошо уҡ райондың Ибраҡай ауылында тыуып үҫкән Сәриә Ғүмәр ҡыҙы буласаҡ тормош иптәше менән 4-се класҡа, Иҫке Ҡалҡаш ауылына уҡырға килгәс, таныша: бер үк класта белем алалар, оҙаҡ йылдар дуҫ булалар. Артабан Салауат 8-се кластан һуң Стәрлебаш ауыл һөнәрселек училищеһына уҡырға инә һәм унда өс йыл белем ала. Тракторсы, шофер һөнәренә эйә була ул һәм урындағы Киров исемендәге хужалыҡта эшләй. Ике йәш йөрәк 1987 йылда ғаилә ҡорорға ҡарар итә һәм йәш ғаилә башлығы Салауатты ошо уҡ йылдың ноябрендә әрме хеҙмәтенә алалар. Тыуған ил алдындағы бурысын ул Монголияла үтәй. Ә йәш килен ҡәйнәһе менән тормош көтөп ҡала. Ғаилә архивында һалдаттың яҡшы водитель булғанлығын раҫлаған яҙма ла бар. 1989 йылда Салауат әрме хеҙмәтенән ҡайтҡанда кәләше уны тыуған йортонда бер йәш тә ете айлыҡ улы Алмас менән ҡаршылай. 1992 йылда, йәш ғаиләгә йәм өҫтәп, икенсе улдары Эдуард донъяға килә. Хәҙер улар буй еткергән инде. Ҡыҙғанысҡа ҡаршы, Алмастың ҡатынының ғүмере өҙөлгәс, ейәнен өләсәй һәм олатай ҡарауына алалар. Хәҙер Динислам Иҫке Ҡалҡаш урта мәктәбендә 7-се класта уҡый. Ә Ғәлимовтарҙың кесе улдары Эдуард әлегә өйләнмәгән. Сәриә Ғүмәр ҡыҙы хаҡлы ялда. Уға тиклем балалар баҡсаһында, почтала эшләгән. Әйткәндәй, килен ҡәйнәһе менән 19 йыл бергә йәшәгән... 2024 йылда ғаилә башлығы Салауат Ғәлимов Рәсәйҙең Оборона министрлығы менән хәрби контракт төҙөгән һәм махсус хәрби операцияға юлланған. “Былтыр 11 февралдә Салауат Себер яҡтарынан ҡайтты ла ошондай ҡарарға килде һәм ҡул ҡуйҙы”, - ти Сәриә Ғүмәр ҡыҙы. Былтыр 1 июндә Салауат Ғәлимов булған һөжүм итеү төркөмө, беренселәрҙән булып, дошмандың ныҡлы оборонаһын ҡыйрата алған. Ошо ваҡытта ул үлемесле яраланған. “Салауат бик ҡыйыу ине. 2005 йылдан Себер яҡтарында нефть тармағында эшләгәйне, аҙаҡ һаҡсы булғайны. Үҙе һәр ваҡыт спорт менән дуҫ булды. Хәҙер ейәне лә үҙе кеүек көн һайын физик күнекмәләр эшләй, төрлө ярыштарҙа үҙ көсөн һынай”, - ти Сәриә Ғүмәр ҡыҙы. Күптән түгел Стәрлебаш военкоматында яугирҙең тол ҡатынына Ҡаһарманлыҡ ордены тапшырылған. Ул Салауат Ғәлимовҡа үлгәндән һуң бирелгән. Мәңгелек йоҡоһо тыныс булһын батырҙың. Уның быуындар сылбырын дауам иткән улдары Алмас менән Эдуард, ейәне Динислам ғына түгел, һәммәбеҙ өсөн дә ошондай яугирҙәребеҙ ҡыйыулыҡ, батырлыҡ, Тыуған илгә һөйөү өлгөһө булып тора. Фотолар: Ғәлимовтарҙың ғаилә архивынан; Айрат Нурмөхәмәтов.