Уҡытыусыларҙың конкурстары башланды

Бөгөн Өфө ҡалаһындағы Колонналы залда “Башҡортостандың йыл уҡытыусыһы-2025” республика конкурсына һәм “Башҡорт теле һәм әҙәбиәте йыл уҡытыусыһы-2025” төбәк-ара конкурсына тантаналы шарттарҙа старт бирелде. Уларҙың тәүгеһе быйыл – 35-се тапҡыр, икенсеһе 30-сы тапҡыр үткәрелә. Быйылғы конкурстар 200-ҙән ашыу педагогты тупланы. Уларҙың 148-е – “Йыл уҡытыусыһы”, тағы ла 55—е “Башҡорт теле һәм әҙәбиәте йыл уҡытыусыһы” бәйгеһендә ҡатнаша. Әйткәндәй, быйыл тәүге тапҡыр туған телдәр, йәғни башҡорт, рус, татар, мари, удмурт һәм сыуаш телдәре уҡытыусылары үҙҙәрен һынап ҡараясаҡ. Шулай уҡ “Башҡорт теле һәм әҙәбиәте йыл уҡытыусыһы” конкурсында ҡатнашыусылар араһында Силәбе өлкәһенән ике милләттәшебеҙ бар. – Бөгөн, республикабыҙҙың бер символы булып торған Башҡортостан Республикаһының дәүләт флагы көнөндә, беҙҙең матур традицияға әйләнгән конкурстарыбыҙҙың асылыуы айырыуса мәртәбәле. Ә инде бәйгелә ҡатнашҡан уҡытыусыларға ҙур рәхмәт! Республика һәм төбәк-ара кимәлдә үткән конкурстарҙа үҙегеҙҙе лайыҡлы танытырһығыҙ, район-ҡалаларығыҙҙың данын намыҫлы яҡларһығыҙ, тип ышанам. Һеҙгә бөтә республика ҙур өмөт менән баға, сөнки беренсе урынды яулаған уҡытыусылар бөтә Рәсәй кимәлендә Башҡортостаныбыҙҙы танытасаҡ, – тип билдәләне БР мәғариф һәм фән министры урынбаҫары Әлфиә Ғәлиева. – Быйыл тәүге тапҡыр конкурсҡа сығырға йөрьәт иткән туған телдәр уҡытыусыларына айырыуса уңыштар теләйем. Республикабыҙ мәктәптәрендә 10 туған тел өйрәнелә, төбәгебеҙҙең күп милләтле халҡына үҙенең телен, традицияларын, тамырҙарын өйрәнеү өсөн бөтә шарттар булдырыла. Бер нисә көн дауам иткән бәйгеләр барышында уҡытыусылар асыҡ дәрестәр, оҫталыҡ кластары күрһәтәсәк, министр менән диалогта ҡатнашасаҡ. Конкурс этаптары Өфө ҡалаһы һәм М. Аҡмулла исемендәге Башҡорт дәүләт педагогия университеты майҙансыҡтарында үтәсәк. Әйткәндәй, конкурста ҡатнашыусыларҙы БР мәғариф һәм фән министрының беренсе урынбаҫары Светлана Антипина, Аҡмулла университеты ректоры, БР Дәүләт Йыйылышы – Ҡоролтай депутаты Салауат Сәғитов сәләмләп, уңыштар теләне. Тантаналы сара барышында конкурста ҡатнашҡан һәр уҡытыусы менән шәхсән таныштырҙылар. – Мин “Башҡорт теле һәм әҙәбиәте йыл уҡытыусыһы-2025” конкурсында ҡатнашам. Төбәк-ара кимәлгә сығыуыма бик шатмын. Туған телгә һөйөү ғаиләлә һәм бер үк ваҡытта тел һәм әҙәбиәт уҡытыусыһы аша ла һалына, шуға күрә эшмәкәрлегемдә халҡыбыҙҙың бай рухи мираҫын, традицияларын ҡулланырға тырышам, – тине Бәләбәй ҡалаһындағы 15-се мәктәптең башҡорт теле һәм әҙәбиәте уҡытыусыһы Яҙгөл Мөхәмәтова. 26 февралдән 12 мартҡа тиклем бәйгелә ҡатнашыусыларға үҙҙәрен асыҡ дәрестән башлап министр менән һөйләшеүгә тиклем төрлө конкурс һынауҙарында күрһәтергә тура киләсәк. Бәйгеләргә 14 мартта “Торатау” конгресс-холында тантаналы шарттарҙа йомғаҡ яһаласаҡ. Автор фотолары.