Служба Славней Владычице Нашей Пресвятей Богородице пред иконой Ея «Исааковская» И ОТДАНИЕ ПРАЗДНИКА Введения во храм Пресвятой Богородицы.
Месяца ноябрь в 25-й день
На велицей вечерни
Стихологису́ем Блаже́н муж: 1-й антифо́н.
На Го́споди, воззва́х: стихи́ры на 8, глас 1.
Подо́бен: О, ди́внаго чудесе́!
Днесь, ве́рнии, ликовству́им,/ во псалме́х и пе́снех Го́сподеви пою́ще/ и чту́ще Того́ свяще́нную Сень,/ одушевле́нный Киво́т, невмести́мое Сло́во вмести́вшую:/ приво́дится бо Го́сподеви,/ па́че естества́ пло́тию младе́нствующи,/ и святи́тель вели́кий Заха́рия/ прие́млет с весе́лием Сию́,/ я́ко Бо́жие Жили́ще.
Днесь храм одушевле́нный святы́я сла́вы/ Христа́ Бо́га на́шего,/ еди́на в жена́х Благослове́нна Чи́стая,/ приво́дится в храм зако́нный жи́ти во святы́х;/ и ра́дуются с Не́ю Иоаки́м и А́нна ду́хом,/ и де́вственнии ли́цы Го́сподеви пою́т,/ псало́мски воспева́юще и чту́ще Ма́терь Его́.
Ты проро́ков пропове́дание,/ апо́столов сла́ва, и му́чеников похвала́,/ и всех земноро́дных обновле́ние,/ Де́во Ма́ти Бо́жия:/ Тобо́ю бо Бо́гу примири́хомся./ Те́мже чтим Твое́ в храм Госпо́день вхожде́ние/ и со А́нгелом вси пе́сненно,/ ра́дуйся, Тебе́, Пречи́стая, вопие́м,/ Твои́ми моли́твами спаса́емии.
И́ны стихи́ры, глас 4.
Подо́бен: Я́ко до́бля:
Во святы́х свята́я, Свята́я и Непоро́чная, Святы́м Ду́хом вво́дится/ и святы́м А́нгелом пита́ется,/ су́щи святе́йший храм Свята́го Бо́га на́шего,/ вся́ческая освяти́вшаго вхо́дом Ея́/ и обожи́вшаго естество́ земны́х попо́лзшееся.
Отрокови́цы, ра́дующеся и свещи́ иму́ще,/ Свещи́ днесь предхо́дят разу́мней/ и вво́дят Сию́ во свята́я святы́х свяще́нно,/ проявля́юще хотя́щую Зарю́ неизрече́нно из Нея́ возсия́ти/ и просвети́ти во тьме седя́щия неве́дения Ду́хом.
Ины стихиры Богоро́дице, глас 1.
Подобен: О дивное чудо:
О ди́вное чу́до,/ исто́чник исцеле́ний,/ ико́на исаа́ковская в ве́си пошехо́нстей явля́ется,/ и благода́ть чуде́с оби́льно источа́ет./ Весели́тся Русь правосла́вная,/ Богоро́дичен святы́й до́ме / возопие́м ве́рнии, / Гаврии́ла иму́ще чинонача́льника: / Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.(дважды)
Дне́сь Боговмести́мый храм, Богоро́дица,/ в храм Госпо́день приво́дится/ и оби́тель исаа́ковская торжеству́ет,/ пра́зднующи обре́тение ико́ны Рождества́ Ея./ Ра́дуются земноро́днии,/ Твое́ к нам милосе́рдие воспомина́юще,/ и ра́достно взыва́ют/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.(дважды)
Да ликовству́ют Иоаки́м со А́нною,/ я́ко плод сла́вный из них произыде,/Мари́я Богоотрокови́ца,/ и ра́дуется входя́щи во свята́я святы́х./ Ю́же ико́ны днесь явле́ние воспомина́юще,/ весь пошехо́нская со Арха́нгелом во́пиет:/Обра́дованная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.
Слава, глас 8
Подо́бен: О преславного чудесе:
Собери́тесь в оби́тель исаа́ковскую вси боля́щии,/ Врач бо в ней пребыва́ет безме́здный,/ всеми́лостивая Цари́це Богоро́дице свои́м о́бразом честны́м./ Всем цельбы́ источа́ет,/ ско́рбные утеша́ет,/ рассла́бленые восставля́ет,/ очесе́м здра́вие да́рует, / всякую́ ту́гу и боле́знь отгоня́ет.
и ны́не, глас тойже:
По рождестве́ Твое́м, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х, я́ко освяще́нна;/ тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́./ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и Нескве́рная,/ я́же на Небеси́ и на земли́ сла́вима,/ Ма́ти Бо́жия, спаси́ род наш.
Вход. Прокимен дне и чтения три.
Бытия́ чте́ние (глава 28):
Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней,/ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву,и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.
Проро́чества Иезекии́лева чте́ние (главы 43 и 44):
Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му, и ви́дех,/ и се испо́лнь сла́вы храм Госпо́день.
При́тчей чте́ние (глава 9):
Прему́дрость созда́ Себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне,/ и тре́бующим ума́ рече́:/ прииди́те, яди́те Мой хлеб и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживе́те,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному,и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум:/ разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.
На Литии стихиры, глас 2:
Подобен: Егда от древа:
Да ра́дуются а́нгельскии собо́ри,/ да ликовству́ет челове́ческий род,/ весь пошехо́нская красу́ется,/ прославля́ющи ди́вное явле́ние о́браза Богороотрокови́цы./ На него́же с ве́рою и любовию взира́юще глаго́лем ра́достно:/ Де́во Пресвята́я,/ пода́ждь мир ми́рови, /стране́ на́шей на враги́ одоле́ние,/ власте́м прему́дрость,/ па́стырем благогове́ние,/ ча́дом Це́ркви Ру́сския огражде́ние,/ семе́йст благослове́ние,/ ю́ным наставле́ние,/ младе́нцем воспита́ние,/ си́рым и вдо́вам защище́ние,/ отше́дшим упокое́ние,/ и вся блага́я и поле́зная,/ у Сы́на Твоего́ испроси́./ Ничто же невозмо́жно хода́тайству Твоему́,/ вся ели́ка а́ще хо́щещи, мо́жеши.
Сла́ва, и ны́не, глас 5. праздника Лео́нта маи́стра:
Возсия́ день ра́достен/ и пра́здник всече́стен:/ днесь бо я́же пре́жде Рождества́ и по Рождестве́ Де́ва пребы́вши,/ в храм Госпо́день приво́дится,/ и ра́дуется Заха́рия ста́рец, роди́тель Предте́чев,/ и вопие́т ве́село:/ прибли́жися, Предста́тельница скорбя́щих,/ в храм святы́й, я́ко Свята́,/ освяти́тися во оби́телище Всецаря́./ Да весели́тся Иоаки́м пра́отец, и А́нна да ра́дуется,/ я́ко принесо́ша Бо́гу я́ко триле́тствующую Ю́ницу/ непоро́чную Влады́чицу./ Ма́тери, сра́дуйтеся, де́вы, взыгра́йте,/ и непло́ды, сликовству́йте,/ я́ко отве́рзе нам Небе́сное Ца́рство пронарече́нная Всецари́ца,/ ра́дуйтеся, лю́дие, и весели́теся.
На стихо́вне стихи́ры, глас 5:
Подо́бен: Ра́дуйся:
Ра́дуйся, Не́бо и земля́,/ Не́бо У́мное гряду́щее зря́ще,/ в Боже́ственный дом воспита́тися че́стно,/ Де́ву еди́ну и непоро́чную,/ к Не́йже, дивя́ся, Заха́рия вопия́ше:/ Две́ре Госпо́дня, хра́ма отверза́ю Тебе́ две́ри,/ ра́дующися, в нем ликовству́й,/ позна́х бо и ве́ровах,/ я́ко уже́ избавле́ние прии́дет проявле́нно Изра́илево/ и роди́тся из Тебе́ Бог Сло́во,/ да́руяй ми́рови ве́лию ми́лость.
Стих: Приведу́тся Царю́ де́вы в след Ея́,/ и́скренния Ея́ приведу́тся Тебе́.
А́нна Боже́ственная благода́ть я́ве,/ от благода́ти да́нную, чи́стую Присноде́ву/ приво́дит с весе́лием в храм Бо́жий,/ призва́вши ити́ пред Не́ю отрокови́цам,/ свещи́ нося́щим, и глаго́лющи:/ пойди́, Ча́до,/ Да́вшему Тя бу́ди возложе́ние и благово́нный фимиа́м./ Вни́ди в незаходи́мая, и уве́ждь та́йны,/ и угото́вися бы́ти Иису́сово вмести́лище, весе́лое и кра́сное,/ подаю́щаго ми́ру ве́лию ми́лость.
Стих:Приведу́тся в весе́лии и ра́довании,/ введу́тся в храм Царе́в.
Внутрь в храм Бо́жий/ Боговмести́мый храм возлага́ется, Де́ва Всесвята́я,/ и отрокови́цы Ей ны́не, свещи́ нося́ще, предхо́дят./ Игра́ет роди́телей сопряже́ние изря́дное,/ Иоаки́м же и А́нна, ликовству́юще,/ я́ко роди́ша Творца́ ро́ждшую,/ Я́же ликовству́ющи в Боже́ственных ски́ниих/ и пита́ема руко́ю А́нгеловою, Всенепоро́чная,/ Христа́ яви́ся Ма́ти,/ Подаю́щаго ми́ру ве́лию ми́лость.
Сла́ва Богоро́дице, глас 2:
Пое́м свято́е Твое́ рождество́,/ чтим е́же в храм вхожде́ние,/ явле́нней же ико́не исаа́ковской поклоня́емся./ Ты бо ра́дость на́ша и утвержде́ние.
и ны́не, глас 6. Се́ргия Агиополи́та:
Днесь собо́ри ве́рных, соше́дшеся,/ духо́вне да торжеству́им/ и Богоотрокови́цу Де́ву и Богоро́дицу,/ в храм Госпо́день приводи́му,/ благоче́стно восхва́лим,/ предъизбра́нну от всех родо́в,/ во оби́телище всех Царя́ Христа́ и Бо́га:/ де́вы, свещи́ нося́ще, предъиди́те,/ Присноде́вы чту́ще честно́е происхожде́ние,/ ма́тери, печа́ль всю отложи́вше,/ ра́достно спосле́дствуйте Ма́тери Бо́га быва́ющей/ и ра́дости ми́ра Хода́таице./ Вси у́бо ра́достно,/ е́же ра́дуйся, со А́нгелом возопии́м Обра́дованней,/ при́сно моля́щейся о душа́х на́ших.
На благослове́нии хле́бов, тропа́рь, глас 4:
Дне́сь све́тло лику́ет оби́тель исаа́ковская,/ иму́ще в себе сокро́вище пребога́тое,/ чудотво́рную ико́ну Рождества́ Твоего́, Пречи́стая,/к не́й же мы ны́не притека́ющи уми́ льно глаго́лем:/ ниспосли́ по́мощь рабо́м Твои́м,/ и изба́ви от вся́кого вреда́ душе́вного и теле́сного, да зове́м Ти,/ ра́дуйся, Де́во, христиа́н похвало́. (дважды)
Ин тропа́рь праздника , глас 4:
Днесь благоволе́ния Бо́жия предображе́ние/ и челове́ков спасе́ния пропове́дание/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния Зижди́телева исполне́ние.
НА У́ТРЕНИ
На Бог Госпо́дь:
тропа́рь: Днесь благоволе́ния Бо́жия: (Дважды), слава ныне: Богоро́дице.
По 1-м стихосло́вии седа́лен, глас 1.
Подо́бен: Лик А́нгельский:
Пра́ведных плод, Иоаки́ма и А́нны, прино́сится Бо́гу во святи́лище свято́е,/ пло́тию младе́нствующи, Пита́тельница Жи́зни на́шея,/ Ю́же благослови́ свяще́нный Заха́рия:/ Сию́ вси я́ко Ма́терь Бо́жию ве́рно да ублажи́м.
Сла́ва, и ны́не, то́йже.
По 2-м стихосло́вии седа́лен, глас 4.
Подо́бен: Удиви́ся Ио́сиф:
Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние:/ в Боже́ственнем же хра́ме, я́ко су́що Боже́ственный храм,/ от младе́нства чи́сте, со свеща́ми све́тлыми отдана́ бы́вши,/ яви́лася еси́ Прия́телище Непристу́пнаго и Боже́ственнаго Све́та./ Вели́ко вои́стинну предше́ствие Твое́,/ еди́на Богоневе́сто и Присноде́во.
Сла́ва, и ны́не, то́йже.
Велича́ние:
Велича́ем Тя, / Пресвята́я Де́во,/ Богои́збранная Отрокови́це,/ и чтим о́браз Твой святы́й,/ и́мже то́чиши исцеле́ния / всем, с ве́рою притека́ющим.
Псалом избранный: Помяни́, Господи́, Дави́да и всю́ кро́тость его́. Пресла́вная глаго́лашая о тебе́ гра́де Бо́жий. Освяти́л есть селе́ние свое́ вы́шний. Помяну́ и́мя твое́ во вся́ком ро́де и ро́де.
По полиеле́и седа́лен, глас 6.
Ра́дование благода́рственное Тебе́ прино́сим, Ма́ти Бо́жия:/ о явлении иконы Твоей исаа́ковской,/ и согла́сно зове́м Ти:/ ра́дуйся, Благода́тная, с Тобо́ю Госпо́дь/ и Тобо́ю с на́ми.
Сла́ва, и ны́не, глас 8.
Подо́бен: Повеле́нное та́йно:
Да ра́дуется Дави́д песнопи́сец,/ и да ликовству́ет Иоаки́м со А́нною,/ я́ко плод святы́й из них произы́де,/ Мари́я светоно́сная, Боже́ственная свеща́,/ и ра́дуется, входя́щи в храм,/ Ю́же и, зря, благослови́ Варахи́ин сын/ и, ра́дуяся, взыва́ше:/ ра́дуйся, Чу́до всеми́рное.
Та́же степе́нна, 1-й антифо́н 4-го гла́са. Проки́мен, глас 4:Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние/ да хва́лит Го́спода. Стих: Хвали́те Бо́га во святы́х Его́: Ева́нгелие от Луки́, зача́ло 4.
По 50-м псалме́, Сла́ва, Моли́твами Богоро́дицы:
Та́же, Поми́луй мя, Бо́же:
По 50-м псалме́ стихи́ра, глас 6:
Егда́ явле́ние чу́дного Твоего́ о́браза приспе́,/ тогда́ лю́ди ве́си пошехо́нстей,/ на дре́ве, пресве́тло сия́ющюю, ико́ну Рождества́ Твоего́ узре́вше,/ у́жасом одержи́ми бя́ху,/ свяще́нник же со тре́петом вопия́ху Ти:/ о Де́во, / недоуме́ю и удивля́юся Твоему́ милосе́рдию,/ е́же на нас показа́ла еси́,/ ко́е благохвале́ние принесе́м Твоему́ явле́нию./ Но о Пресвята́я,/ моли́ся приле́жно Сы́ну и Бо́гу Твоему́,/ спасти́ся ста́ду Твоему́ невреди́му.
Каноны: праздника 1-й со ирмосом на 6 (ирмосы по дважды), и храма на 4, и канон праздника 2-й на 4.
Кано́на: пра́здника пе́рвый со ирмосо́м на 6. Ирмо́с по два́жды, тропари́ на 4. Творе́ние Гео́ргиево. Его́же краегране́сие: Ты благода́ть, Влады́чице, сло́ву даждь.Глас 4.
Песнь 1
Ирмо́с: Отве́рзу уста́ моя,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ вхожде́ние.
Прему́дрости, Пречи́стая, Тя сокро́вище ве́мы и благода́ти,/ точа́щую исто́чник приснотеку́щий ра́зума,/ про́сим: Твоя́ ка́пли одожди́, Влады́чице, е́же воспева́ти Тя при́сно.
Превы́шши, Пречи́стая, Небе́с бы́вши, храм и пала́та,/ в храм Бо́жий возложи́лася еси́/ Тому́ угото́ватися в Боже́ственное жили́ще прише́ствия Его́.
Свет возсия́вши Богоро́дица благода́ти,/ вся просвети́ и совокупи́ пресве́тлое Ея́ украси́ти торжество́ пе́сньми:/ прииди́те, к Ней стеце́мся.
Дверь сла́вная, по́мыслы непроходи́мая,/ две́ри отве́рзши хра́ма Бо́жия,/ ны́не повелева́ет нам, совше́дшим,/ Боже́ственных Ея́ чуде́с наслади́тися.
Други́й кано́н Богородице, на 4. глас тойже.
Песнь 1
Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я,/ и воспою́, ра́дуяся, Тоя́ чуде́са.
Отве́рзи уста́ моя́, Чи́стая,/ да возмогу́ досто́йно воспе́ти чудеса́ Твоя́,/ я́же в пошехо́нстей ве́си оби́льно яви́ла еси́.
Я́ко би́сер драгоце́нный,/ иму́щи ико́ну Твою́ оби́тель исаа́ковская,/ к не́й же со стра́хом и любо́вию прибега́ем,/ и благода́ть незави́стно почерпа́ем.
Да ликовству́ет вся тварь,/ да весели́тся пу́стынь исаа́ковская,/ я́ко на дре́ве ико́на Рождества́ Де́вы днесь нам явля́ется/ и лучи́ ми́лости испуща́ет.
Сра́дуемся, Пречи́стая, Боже́ственному Твоему́ Рождеству́ благоче́стно:/ ра́дость бо на́м источи́ла еси́ незави́стную/ явле́нием святы́я ико́ны Твоея́.
Други́й кано́н пра́здника, на 4. Творе́ние Васи́лиево,
глас 1.
Песнь 1
Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля, я́ко просла́вися.
Стеце́мся днесь, Богоро́дицу почита́юще пе́сньми,/ и торжеству́им духо́вный пра́здник:/ в храм бо Бо́гу дар прино́сится.
Пе́сньми да воспои́м Богоро́дицы сла́вное предше́ствие:/ к хра́му бо днесь, я́ко храм Бо́жий,/ прино́сится проро́чески дар многоце́нный.
Сла́ва: Тро́ице Единосу́щная,/ О́тче, и Сло́ве, и Ду́ше Святы́й,/ Тя ве́рно сла́вим, я́ко Творца́ всех,/ и Тебе́ вопие́м благоче́стно:/ спаси́ ны, Бо́же.
И ны́не : От ба́гра крове́й Твои́х, червлени́цею, Пречи́стая, оде́явся,/ проше́д, обнови́ Царь и Бог род весь челове́ческий благоутро́бием Свои́м.
Катава́сия (оба́ ли́ка вку́пе): Христо́с ражда́ется – сла́вите,/ Христо́с с Небе́с – сря́щите./ Христо́с на земли́ – возноси́теся./ По́йте Го́сподеви, вся земля́,/ и весе́лием воспо́йте, лю́дие,/ я́ко просла́вися.
Песнь 3
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в честне́м вхожде́нии Твое́м/ венце́в сла́вы сподо́би.
Невестокраси́тель днесь яви́ся кра́сный Де́вы храм и черто́г,/ прие́м одушевле́нный черто́г Бо́жий,/ Чи́стую, и Непоро́чную, и Светле́йшую всея́ тва́ри.
Дави́д, предначина́я ликова́ние, игра́ет, и ликовству́ет с на́ми,/ и Цари́цу зове́т Тя укра́шену, Пречи́стая,/ предстоя́щу, Всечи́стая, в хра́ме Царю́ и Бо́гу.
Из нея́же преступле́ние произы́де дре́вле ро́ду челове́ческому,/ из Тоя́ исправле́ние и нетле́ние процвете́:/ Богоро́дица днесь приводи́ма в дом Бо́жий.
Игра́ют А́нгельская во́инства и всех челове́к мно́жество,/ и пред лице́м, Пречи́стая, предтеку́т Твои́м днесь свещено́сицы,/ зову́ще вели́чествия Твоя́ в дому́ Бо́жии.
Ин
Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.
Пое́м, Пречи́стая, Тебе́ Всенепоро́чную,/ и́же тобо́ю спа́сшеся,/ на Твоя́ моли́твы наде́ющися,/ да непостыди́мся.
Покланя́емся вам Иоаки́ме блаже́нный и А́нна богому́драя,/ я́ко от чресл ва́ших процвете́ нам плод благосла́вен,/ Мариа́м Отрокови́ца.
Чу́до ди́вное зрим на ико́не Твое́й исаа́ковской:/ ра́достию непло́ды рожда́ют Богоро́дицу/ и Питате́льницу жи́зни на́шея.
Днесь слепы́е прозрева́ют,/ рассла́бленые восстаю́т,/ хроми́и прямоходи́ти начина́ют,/ прикоснове́нием к Твое́й ико́не Богоневе́сто.
Ин
Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.
Торжеству́им, празднолю́бцы, и сра́дуемся ду́хом/ во святе́м пра́зднице, учрежда́ющеся днесь, Дще́ре Царе́вы/ и Ма́тере Бо́га на́шего.
Иоаки́ме, ра́дуйся днесь,/ и весели́ся, А́нно, ду́хом,/ рожде́нную из вас Го́споду приводя́ще триле́тствующу,/ я́ко Ю́ницу Чи́сту Всенепоро́чную.
Сла́ва: Свет Оте́ц, Свет Сын Его́, Свет Дух Уте́шительный:/ я́ко от Со́лнца бо Еди́наго Тро́ицы, сия́юще,/ Боже́ственно озаря́ет и соблюда́ет ду́ши на́ша.
И ны́не:Тя проро́цы пропове́даша киво́т, Чи́стая, святы́ни,/ кади́льницу злату́ю, и све́щник, и трапе́зу,/ и мы, я́ко Боговмести́мую ски́нию, воспева́ем Тя.
Катава́сия: Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ свят еси́, Го́споди.
Кондак, глас 4:
Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день, благода́ть совводя́щи,/ Я́же в Ду́се Боже́ственном,/ Ю́же воспева́ют А́нгели Бо́жии:// Сия́ есть селе́ние Небе́сное.
И́кос:
Неизрече́нных Бо́жиих и Боже́ственных та́ин/ зря в Де́ве благода́ть явля́емую и исполня́емую я́вственно,/ ра́дуюся и о́браз разуме́ти недоуме́юся, стра́нный и неизрече́нный:/ ка́ко избра́нная, Чи́стая, Еди́на яви́ся па́че всея́ тва́ри ви́димыя и разумева́емыя?/ Те́мже восхвали́ти хотя́ Сию́, ужаса́юся зело́ умо́м же и сло́вом,/ оба́че дерза́я, пропове́даю и велича́ю:/ Сия́ есть селе́ние Небе́сное.
Седа́лен, глас 4.
Подо́бен: Удиви́ся Ио́сиф:
Возопи́й, Дави́де,/ что сей настоя́щий пра́здник,/ Ю́же воспе́л еси́ иногда́ в кни́зе псало́мстей,/ я́ко Дщерь Богоотрокови́цу и Де́ву./ Приведу́тся, рече́, Царю та́инственно де́вы во след Ея́ и бли́жния Ея́./ И ди́вен соде́лай и всеми́рен пра́здник зову́щим:/ Богоро́дица нам предста́, спасе́ния Хода́таица.
Сла́ва, глас 6.
А́нгели, Пречи́стая, Чи́стая, ны́не в честне́м Твое́м хра́ме слику́ют/ и объе́млют, Влады́чице, святы́й Твой Образ,/ ему́же любо́вию, и ра́достию, и весе́лием мно́гим покланя́емся,/ и Тя, Богородице, в пе́снях велича́ем.
и ны́не, глас 4:
Непоро́чная А́гница и нескве́рный черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно,/ и вси ве́рнии блажа́т при́сно/ и благода́рственно пою́т Ей непреста́нно ве́лиим гла́сом:/ на́ша сла́ва и спасе́ние Ты еси́, Всенепоро́чная.
Песнь 4
Ирмо́с: Неизсле́дный Бо́жий Сове́т/ е́же от Де́вы воплоще́ния/ Тебе́, Вы́шняго, проро́к Авваку́м, усмотря́я, зовя́ше:/ сла́ва си́ле Твое́й, Го́споди.
Дверь непрохо́дную Бо́жий дом прие́мля днесь,/ преста́ти сотвори́ вся́кой слу́жбе зако́нной,/ я́ко и́стинно яви́ся, зовы́й,/ су́щим на земли́ И́стина.
Гора́ присе́нная, ю́же прови́де дре́вле Авваку́м,/ предпропове́да внутрь вмести́вшуюся в нехо́дных хра́ма,/ доброде́тели процве́тши, и покрыва́ет концы́.
Ви́девши пресла́вная вся земли́ стра́нныя же и ди́вныя ве́щи,/ ка́ко Де́ва, от А́нгела пи́щу прие́млющи,/ о́бразы строе́ния но́сит.
Храм, и пала́та, и Не́бо одушевле́нное я́вльшися, Богоневе́сто Царе́ва,/ во храм зако́нный приводи́ма днесь,/ Тому́ соблюда́ема, Пречи́стая.
Ин
Ирмос: Седя́й в сла́ве на Престо́ле Божества́, / во о́блаце ле́гце / прии́де Иису́с Пребоже́ственный / Нетле́нною Дла́нию и спасе́ зову́щия: / сла́ва, Христе́, си́ле Твое́й.
Пе́снми почти́м Присноде́ву Отрокови́цу,/ днесь ико́ну свое́го Рождества́ нам яви́вшую/ и в залог спасе́ния дарова́вшую.
Скорбь обдержи́т мя, Де́во,/ к Твоему́ прибега́ю предста́тельству,/ не отри́ни мене́, Чи́стая,/ и ра́дость мне па́че ча́яния да́руй.
Душе́вныма очи́ма ослепле́н,/ к Тебе́ прибега́ю, Де́во,/ просвети́ мя све́том лица́ Твоего́ и поми́луй мя.
Иоаки́ме лику́й,/ А́нна весели́ся,/ днесь ико́на Дщи ва́шея нам явля́ется/ на ра́дость и утеше́ние.
Ин
Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди.
Проро́че Иса́ие, прорцы́ нам,/ Де́ва кто есть, иму́щая во чре́ве?/ Я́же из Иу́дина ко́рене прозя́бши/ и ро́ждшися из Дави́да царя́,/ се́мене свята́го плод благосла́вный.
Иоаки́ме и А́нно, весели́теся ны́не,/ во храм приводя́ще Госпо́день Чи́стую Бо́га Ма́терь Христа́ Всецаря́ бу́дущую,/ от вас же ро́ждшуюся, я́ко триле́тствующую Ю́ницу.
Сла́ва: Тро́ицу Ли́цы, Еди́ницу о́бразом,/ благоче́стно сла́вим Бо́га И́стинна,/ Его́же пою́т А́нгельская и Арха́нгельская чинонача́лия я́ко тва́ри Влады́ку,/ и челове́цы ве́рно, покланя́ющеся при́сно.
И ны́не:Моли́ непреста́нно, Пресвята́я Чи́стая,/ Его́же пло́тию родила́ еси́, Сы́на Твоего́ и Бо́га,/ от многообра́зных се́тей диа́волих и от вся́ких искуше́ний находя́щих вся изба́вити рабы́ Твоя.
Катава́сия: Жезл из ко́рене Иессе́ева/ и цвет от него́, Христе́,/ от Де́вы прозя́бл еси́,/ из горы́, Хва́льный, приосене́нныя ча́щи,/ прише́л еси́, вопло́щся от Неискусому́жныя,/ Невеще́ственный и Бо́же:/ сла́ва си́ле Твое́й, Го́споди.
Песнь 5
Ирмо́с: Ужасо́шася вся́ческая/ в честне́м вхожде́нии Твое́м:/ Ты бо, Неискусобра́чная Де́во,/ внутрь вошла́ еси́ в храм Бо́жий,/ я́коже чисте́йший храм,/ всем воспева́ющим Тя/ мир подава́ющая.
Свяще́ние сла́вное и свяще́нное возложе́ние,/ днесь Пречи́стая Де́ва, возложи́вшися в храм Бо́жий,/ Всецарю́ на́шему Бо́гу Еди́ному в жили́ще соблюда́ется,/ я́ко весть Сам.
Добро́ту, Пречи́стая, души́ Твоея́ зря не́когда,/ ве́рою Заха́рия возопи́:/ Ты еси́ избавле́ние, Ты еси́ всех ра́дость,/ Ты еси́ воззва́ние на́ше,/ Е́юже Невме́стный вмеще́н мне яви́тся.
О, па́че ума́ чуде́с Твои́х, Всечи́стая!/ Стра́нное Твое́ рождество́ есть,/ стра́нен о́браз возраще́ния Твоего́,/ стра́нна и пресла́вна Твоя́, Богоневе́сто, вся/ и челове́ки несказа́нна.
Све́щник многосве́тлый су́щи, Богоневе́сто,/ днесь возсия́ла еси́ в дому́ Госпо́дни/ и озаря́еши ны честны́ми дарова́нии, Чи́стая,/ чуде́с Твои́х, Богоро́дице всепе́тая.
Ин
Ирмос: Ужасо́шася вся́ческая / о Боже́ственней сла́ве Твое́й: / Ты бо, Неискусобра́чная Де́во,/ име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.
Душа́ моя́ стяне́т греха́ми погружа́ема,/ и кто возмо́жет исцели́ти ю,/ а́ще не ты восхо́щеши помощи́ ми.
Тле́ную мою́ плоть и сме́ртную,/ Всечи́стая Богома́ти,/ врачу́еши от неду́г тя́жких и лю́тых,/ да Тя прославля́ю во ве́ки.
Ра́дости несконча́емой пода́тельницу ве́мы Тя, Богоро́дице,/ ра́дость се́рдцу моему́ пода́ждь,/ ско́рби лю́тые утоля́ющи.
Слепы́м дарова́ла еси́ де́йствие очесе́м, Де́во, е́же ви́дети,/ но и на́ша зе́ницы души́ и телесе́ просвети́,/ да пое́м при́сно вели́чия Твоя́.
Ин
Ирмо́с: Све́тлый нам возсия́й Свет Присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.
Да веселя́тся пра́отцы днесь, Влады́чице,/ и да ра́дуется ро́ждшая Тя со отце́м Твои́м,/ я́ко плод их Го́споду прино́сится.
Уневе́щения напису́ются Боже́ственная зна́мения/ па́че ума́ рождества́ Твоего́, Чи́стая Де́во,/ днесь Ду́хом Святы́м в дому́ Бо́жии.
Сла́ва: Пренача́льное и Присносу́щное Еди́но Божество́ славосло́вяще, поклони́мся,/ Тре́ми Ли́цы естество́м неразде́льное/ и сла́вою равноче́стное.
И ны́не: Приста́нище благоути́шное и необори́мую сте́ну стяжа́хом,/ моли́тву Твою́ во обстоя́ниих, Богороди́тельнице,/ всегда́ избавля́еми бед и скорбе́й.
Катава́сия: Бог сый ми́ра, Оте́ц щедро́т,/ Вели́каго Сове́та Твоего́ А́нгела,/ мир подава́юща, посла́л еси́ нам:/ тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ о́т Нея ро́ждшагося Бо́га сла́вим.
Вся́ческая Нося́й глаго́лом,/ моли́тву пра́ведных услы́ша./ Те́мже непло́дныя разреши́л еси́ неду́г, я́ко Благоутро́бен,/ ра́дости Вино́вную сим дарова́.
Сказа́ти хотя́ Господь язы́ком Свое́ спасе́ние,/ Неискусобра́чную ны́не от челове́к прия́т,/ примире́ния зна́мение и обновле́ния.
Я́ко дом су́щи благода́ти,/ в не́мже сокро́вища лежа́т неизрече́ннаго Бо́жия строе́ния, Всечи́стая,/ в хра́ме причасти́лася еси́ нетле́нныя сла́дости.
Диади́му Тя ца́рскую прие́м,/ храм, Богоневе́сто, просвеща́шеся/ и подступа́ше лу́чшим,/ предрече́нных зря на Тебе́ сбытие́.
Ин
Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те рука́ми воспле́щим, / от Нея́ ро́ждшагося Бо́га сла́вим.
Многопло́дие щедро́т твои́х да́руй стране́ на́шей, Всепе́тая,/ от непло́дове ро́ждшаяся,/ и мир твой пода́жь, Богоневе́сто.
Очисти́лище естества́ Ты еси́ еди́на Всепе́тая,/ очи́сти се́рдце мое́,/ да узрю́ Сы́на Твоего́ Богоблаже́нная.
Сла́дкия Трапе́зы сподо́би мя, Всеблаже́нная,/ да просвещу́ся, да спасу́ся,/ да прича́стник Ца́рствия Бо́жия явлю́ся, Твои́м предста́тельством.
Златоза́рный све́щник,/ свет чуде́с испуща́ющ несказа́но,/ зрим ико́ну твою́ исаа́ковская,/ Ты нас просвети́,/ Те́мже Тя пое́м, Чи́стая, во ве́ки.
Ин
Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.
Пра́зднуим, ве́рнии, пра́здник духо́вный Ма́тере Бо́жия,/ воспева́юще благоче́стно:/ есть бо святе́йша Небе́сных умо́в.
Нескве́рная А́гница и Чи́стая Голуби́ца/ приведе́ся обита́ти в дом Бо́жий,/ я́ко Непоро́чная, пронарече́нная бы́ти Ма́ти Бо́жия.
Сла́ва: Оте́ц, и Сын, и Дух пра́вый,/ Триипоста́сная Еди́нице и Нераздели́мая Тро́ице,/ поми́луй покланя́ющияся Боже́ственней Держа́ве Твое́й.
И ны́не:Во чре́ве Твое́м вмеще́н Невмести́мый все́ми, Богома́ти, быв,/ из Тебе́ произы́де, Пречи́стая,/ сугу́б естество́м Бог и Челове́к.
Катава́сия: Из утро́бы Ио́ну младе́нца изблева́ морски́й зверь,/ якова́ прия́т,/ в Де́ву же все́льшееся Сло́во/ и плоть прие́мшее про́йде сохра́ншее нетле́нну./ Его́же бо не пострада́ истле́ния,/ Ро́ждшую сохрани́ неврежде́нну.
Кондак, глас 5
Сте́ну необори́мую/ и исто́чник чуде́с неисчерпа́емый,/ стяжа́вши ико́ну Твою́ оби́тель исаа́ковская. / К ней же мы притека́ющи уми́льно глаго́лем:/ О, пречу́дная Влады́чице Богоро́дице,/ ниспосли́ рабо́м Твои́м бога́тую ми́лость/ и изба́ви от вся́кого зла,/ моля́щи Сы́на Твоего,́ Христа́ Бо́га на́шего,/ спасти́ ду́ши на́ша.
Икос
Преиспещре́ну, позлаще́ну лампаду, еле́ем ми́лости испо́лнену,/ созерца́ем ико́ну Твою́ исаа́ковскую, Богома́ти,/ к не́й же притека́ющи,/ в пе́снях Тя прославля́ем и согла́сно зове́м:/ моли́ Сы́на Твоего,́ Христа́ Бо́га на́шего,/ спасти́ ду́ши на́ша.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог благослове́н еси́.
Се днесь возсия́ конце́м весна́ ра́достная,/ просвеща́ющи на́шу ду́шу, и помышле́ние, и ум благода́тию,/ торжество́м Богоро́дицы днесь та́инственно да учреди́мся.
Да дароно́сят днесь вся́ческая Цари́це, Ма́тери Бо́жии/ Не́бо и земля́, и А́нгелов чи́ни, и челове́ков мно́жество/ и да вопию́т:/ во храм вво́дится Ра́дость и Избавле́ние.
Писа́ние мимотече́ и оскуде́ зако́н, я́коже сень,/ и благода́ти лучи́ возсия́ша в храм Бо́жий вше́дшей Тебе́, Де́во Ма́ти Чи́стая,/ в нем благослове́нная.
Повину́ся Рождеству́ Твоему́, Всечи́стая,/ я́ко Творцу́ и Бо́гу Не́бо, и земля́, и преиспо́дняя,/ и всяк язы́к земны́х испове́дает,/ я́ко Госпо́дь яви́ся, Спас душ на́ших.
Ин
Ирмос: Не послужи́ша тва́ри Богому́дрии / па́че Созда́вшаго,/ но, о́гненное преще́ние му́жески попра́вше,/ радовахуся, пою́ще: / препе́тый отце́в Госпо́дь и Бог, благослове́н еси́.
Блажа́т Тя вси концы́ земни́и, Всепе́тая Ма́ти,/ и поклоня́ются и ве́рно зову́т:/ благослове́н еси́ Бо́же оте́ц на́ших.
Уме́ршим участь облегча́еши,/ Твои́м Ма́терним предста́тельством, Богоневе́сто,/ тем Тя прославля́ем во ве́ки.
Грехо́в мои́х мно́жество и стру́пы душе́вные кто испове́сть возмо́жет, Всепе́тая,/ к тебе́ прибега́ю, отча́янный,/ Влады́чице, помози́ ми.
Хлеб насу́щный подава́й нам на всяк день,/ Спори́тельнице Всеблаже́нная,/ и гла́да душе́вного и теле́сного изба́ви рабы́ Твоя.
Ин
Ирмо́с: Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.
Ликовству́им, празднолю́бцы, днесь,/ воспои́м Чи́стую Влады́чицу,/ Иоаки́ма и А́нну досто́йно чту́ще.
Ра́довахуся А́нгелов чи́ни,/ веселя́хуся пра́ведных ду́си,/ я́ко Бо́жия Ма́терь во свята́я приво́дится.
Сла́ва: Просла́вим Тро́ицу Неразде́льную,/ воспои́м Еди́но Божество́/ со Отце́м Сло́во и Ду́ха Всесвята́го.
И ны́не:Моли́, Его́же родила́ еси́, Го́спода,/ я́ко благоутро́бна естество́м су́ща, Богороди́тельнице,/ спаси́ ду́ши воспева́ющих Тя.
Катава́сия: О́троцы, благоче́стию совоспита́ни,/ злочести́ваго веле́ния небре́гше,/ о́гненнаго преще́ния не убоя́шася,/ но, посреде́ пла́мени стоя́ще, поя́ху:/ отце́в Бо́же, благослове́н еси́.
Песнь 8
Ирмо́с: Слы́ши, Отрокови́це, Де́во Чи́стая,/ да рече́т у́бо Гаврии́л/ Сове́т Вы́шняго, дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и ра́дуяся, вопию́:/ благослови́те, вся дела́ Госпо́дня, Го́спода.
Пречи́стый храм в дом Бо́жий приводя́щи А́нна иногда́,/ вопию́щи, с ве́рою рече́ свяще́ннику:/ ча́до, от Бо́га да́нное мне, прии́м ны́не,/ введи́ во храм Зижди́теля твоего́/ и, ра́дуяся, пой Ему́:/ благослови́те, вся дела́ Госпо́дня, Го́спода.
Рече́, ви́дев, А́нне иногда́ Ду́хом Заха́рия:/ Жи́зни Ма́терь вво́диши и́стинную,/ Ю́же све́тло проро́цы Бо́жии Богоро́дицу пропове́даша,/ и ка́ко храм вмести́т Ю?/ Тем чудя́ся, вопию́:/ благослови́те, вся дела́ Госпо́дня, Го́спода.
Раба́ Бо́жия бых аз,– отвеща́ А́нна ему́,–/ призыва́ющи Сего́ ве́рою и моли́твою, прия́ти моея́ боле́зни плод,/ по прия́тии же рожде́нную привести́ Да́вшему Ю./ Тем, зовя́, вопию́:/ благослови́те, вся дела́ Госпо́дня, Го́спода.
Зако́нное вои́стинну де́ло есть,– свяще́нник рече́ ей,–/ стра́нну же весьма́ вещь поразумева́ю,/ зря Приводи́мую в дом Бо́жий,/ пресла́вно превосходя́щую свята́я благода́тию./ Тем и ра́дуяся, вопию́:/ благослови́те, вся дела́ Го́спо́дня, Го́спода.
Ин
Ирмос: Отроки благочести́выя в пещи́ / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет Пе́ти Тебе́: / Го́спода по́йте, дела́, / и превозноси́те Его́ во вся ве́ки.
Суда́ Сы́на Твоего́ бою́ся и ужаса́юся,/ грехи́ ду́шу оскверни́х, лю́тыми,/ но к кому́ прибе́гну,/ а́ще не ты сама́ поми́луеши мя.
Даждь ми по́мощь моли́твами Твои́ми, Богоро́дице,/ да возмогу́ вся стре́лы лука́вого на мя дви́жимые угаси́ти,/ и сла́влю Тя Влады́чице.
Кре́пость моя еси́ и похвала́, Богоро́дице,/ Тобо́ю Ца́рствие вход улучи́ти ча́ю,/ Марие́ Богоневе́сто.
Днесь Сын Твой, Де́во,/ на Трапе́зу Жи́зни нас призыва́ет,/ к Не́й же неосужде́нно сподо́би нас приступи́ти.
Ин
Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.
Весели́тся днесь све́тло Иоаки́м,/ и А́нна непоро́чная Го́споду Бо́гу прино́сит же́ртву,/ да́нную ей от обеща́ния Святу́ю Дщерь.
Хва́лятся святи́и Дави́д и Иессе́й,/ и Иу́да чти́тся,/ из ко́рене бо их израсте́ плод – Де́ва Чи́стая,/ из Нея́же роди́ся Бог Преве́чный.
Благослови́м Отца́, и Сы́на, и Свята́го Ду́ха – Го́спода.
Да пое́тся Трисвяты́й Оте́ц, и Сын, и Дух Святы́й,/ Неразде́льная Еди́ница, Еди́но Божество́,/ держа́щее дла́нию всю тварь во вся ве́ки.
И ны́не:Безнача́льное начина́ется Сло́во пло́тию,/ роди́вся, я́ко благоволи́,/ Бог же и Челове́к из Отрокови́цы Де́вы,/ возсозида́я ны, пре́жде па́дшия,/ ра́ди кра́йняго благоутро́бия.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катава́сия: Чу́да преесте́ственнаго/ росода́тельная изобрази́ пещь о́браз:/ не бо, я́же прия́т, пали́т ю́ныя,/ я́ко ниже́ огнь Божества́ Де́вы,/ в Ню́же вни́де утро́бу./ Тем, воспева́юще, воспое́м:/ да благослови́т тварь вся Го́спода/ и превозно́сит во вся ве́ки.
На девя́той пе́сни Честне́йшую: не пое́м, но пое́м припе́вы пра́здника: А́нгели, вхожде́ние Пречи́стыя зря́ще, удиви́шася:/ ка́ко Де́ва вни́де во свята́я святы́х? И посе́м ирмо́с: Я́ко одушевле́нному Бо́жию киво́ту:
Та́же вторы́й лик пое́т то́йже припе́в пра́здника и ирмо́с. И на ки́йждо тропа́рь пою́т припе́вы пра́здника, на о́ба ли́ка.
Песнь 9
Ирмо́с: Я́ко одушевле́нному Бо́жию киво́ту/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ и́стинно вы́шши всех еси́, Де́во Чи́стая. Два́жды.
А́нгели, вхожде́ние Всечи́стыя зря́ще, удиви́шася,/ ка́ко со сла́вою вни́де во свята́я святы́х?
Я́ко пресве́тлую, Богоро́дице Чи́стая, душе́вныя чистоты́ иму́щи добро́ту,/ благода́тию же Бо́жиею исполня́ема с Небесе́,/ Све́том Присносу́щным просвеща́еши всегда́ с весе́лием вопию́щия:/ и́стинно вы́шши всех еси́, Де́во Чи́стая.
А́нгели, вхожде́ние Де́вы зря́ще, удиви́шася,/ ка́ко пресла́вно вни́де во свята́я святы́х?
Прелета́ет, Богоро́дице, Чи́стая, чу́до Твое́ си́лу слове́с:/ те́ло бо в Тебе́ поразумева́ю па́че сло́ва,/ тече́ния грехо́внаго неприя́тно./ Те́мже благода́рственно вопию́ Ти:/ и́стинно вы́шши всех еси́, Де́во Чи́стая.
А́нгели, взыгра́йте со святы́ми, де́вы, сликовству́йте:/ Богоотрокови́ца бо вни́де во свята́я святы́х.
Богоприя́тну предзря́, Соломо́н пропове́да Тя одр Царе́в,/ живы́й исто́чник запеча́тствован,/ из него́же нему́тная нам произы́де вода́, ве́рою вопию́щим:/ и́стинно вы́шши всех еси́, Де́во Чи́стая.
А́нгели и челове́цы, Де́ву пе́сньми да возвели́чим:/ Боголе́пно бо вни́де во свята́я святы́х.
Подае́ши дарова́ний Твою́ тишину́, Богоро́дице, души́ мое́й,/ точа́щи жизнь Тебе́ чту́щим по до́лгу,/ Сама́ защища́ющи, и покрыва́ющи, и соблюда́ющи вопи́ти Тебе́:/ и́стинно вы́шши всех еси́, Де́во Чи́стая.
Ин
Ирмос: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́, / почита́ющее свяще́нное торжество́ Богома́тере,/ и да вопие́т: / ра́дуйся, Всеблаже́нная Богоро́дице, / Чи́стая Приноде́во.
Припе́в:Велича́й, Земле́ Ру́сская,/ пресла́вное явле́ние ико́ны Рожде́ства Бо́жия Ма́тери.
Пречи́стое Твое́ Рождество́, /Де́во Непоро́чная,/ зрим на ико́не Твое́й исаа́ковской,/ и ве́рно поклоня́емся и лобыза́ем,/ Тя Богоневе́сто велича́ющи.
Припе́в:Велича́й, Земле́ пошехо́нская,/ пресла́вное явле́ние ико́ны Рождества́ Божия́ Ма́тери.
Оскуде́ша до́брых дел,/ ко́е Ти благодар́ение принесу́ за неисче́тные ми́лости Твоя́,/ но приими́ мое́ ма́лое благохвале́ние/ и поми́луй мя.
Припе́в:Велича́й, оби́тель исаа́ковская,/ пресла́вное явле́ние ико́ны Рождества́ Божия́ Ма́тери.
Нескве́рная, небла́зная,Чи́стая Де́во,/ егда́ дух мой исчеза́ти на́чнет,/ тогда приста́ни ми , Богоневе́сто,/ и изми́ мя руки льсти́вого мироде́ржца.
Припе́в:Велича́й, душе́ моя́,/ Изво́лившую яви́ти нам ико́ну свою́.
О, сла́дкая Ма́ти, Христа́ моего́,/ Тебе́ песнь усе́рдно от се́рдца возложи́х,/укре́плься си́лою Твое́ю и благода́тию,/ не возгнуша́йся мои́х недовле́ющих похва́л,/ но приими́ сия́, Чи́стая, и спаси́ мя.
Та́же пе́рвый лик пое́т втора́го кано́на припе́в пра́здника:
Ин
Ирмо́с: Светоно́сный о́блак, в о́ньже всех Влады́ка,/ я́ко дождь с небесе́ на руно́, сни́де/ и воплоти́ся нас ра́ди,/ быв Челове́к, Безнача́льный./ Велича́ем вси я́ко Ма́терь Бо́га на́шего Чи́стую.
Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.
Из пра́ведных произы́де Иоаки́ма и А́нны/ обеща́ния плод – Богоотрокови́ца Мари́я/ и, я́ко кади́ло прия́тно, пло́тию младе́нствующи,/ приво́дится во святи́лище свято́е/ я́ко Свята́я во святы́х обита́ти.
Велича́й, душе́ моя́,/ приведе́нную во храм Госпо́день и благослове́нную рука́ми иере́евыми.
Младе́нствующую естество́м и па́че естества́ я́вльшуюся Ма́терь Бо́жию восхва́лим пе́сньми:/ в храм бо зако́нный Го́споду днесь приво́дится в воню́ благово́ния,/ пра́ведных я́ко плод духо́вный.
Велича́й, душе́ моя́,/ Триипоста́снаго и Неразде́льнаго Божества́ Держа́ву.
Триипоста́сное естество́, и Неразде́льную сла́ву,/ и в Божестве́ Еди́ном пое́мую непреста́нно на Небеси́ и на земли́/ Тро́ицу Неразлу́чную просла́вим,/ с Сы́ном Отцу́ и Ду́ху покланя́ющеся благоче́стно.
Велича́й, душе́ моя́,/ Честне́йшую и Сла́внейшую Го́рних во́инств, Де́ву Пречи́стую, Богоро́дицу.
Под Твое́ благоутро́бие прибега́ющия ве́рно/ и покланя́ющияся благоче́стно Сы́ну Твоему́, Де́во Богороди́тельнице,/ я́ко Бо́гу и Го́споду ми́ра,/ моли́ся от тли и бед изба́вити и вся́ческих искуше́ний.
Та́же о́ба ли́ка, вку́пе соше́дшеся, пою́т припе́в 1-го кано́на: А́нгели, вхожде́ние Пречи́стыя зря́ще:
И посе́м ирмо́с: Та́инство стра́нное ви́жу и пресла́вное:/ Не́бо – верте́п, Престо́л Херуви́мский – Де́ву,/ я́сли – вмести́лище,/ в ни́хже возлеже́ Невмести́мый – Христо́с Бог,/ Его́же, воспева́юще, велича́ем.
Свети́лен:
Подо́бен: Жены́, услы́шите:
Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.
Слава: Богоро́дице:
Богора́дованная Неве́сто,/ святы́х святе́йшая,/ Арха́нгелов и А́нгелов сла́внейшая,/ похвала́ и ра́дование всех земноро́дных,/ лю́бящих Тя спаса́й./ На Тя бо упова́ние по Бо́зе возложи́хом,/ я́ко Творца́ и Зижди́теля всех ро́ждшая.
И ныне:
Ю́же дре́вле предвозвести́ проро́ческое сосло́вие,/ ста́мну, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно да восхва́лим:/ днесь бо вво́дится во свята́я святы́х воспита́тися Го́споду.
На хвали́тех стихи́ры на 4, глас 1.
Подо́бен: Небе́сных чино́в:
Свещено́сицы де́вы,/ Присноде́ву све́тло провожда́юще,/ проро́чествуют и́стинно Ду́хом бу́дущее:/ храм бо Бо́жий Богоро́дица су́щи,/ в храм со сла́вою де́вственною,/ младе́нствующи, вво́дится.
Обеща́ния свята́го и плод благосла́вный/ Богоро́дица вои́стинну яви́ся ми́ру,/ я́ко всех превы́шшая:/ Я́же благоче́стно приводи́ма в храм Бо́жий,/ моли́тву ро́ждших исполня́ет,/ соблюда́ема Боже́ственным Ду́хом.
Небе́сным воспита́на, Де́во, хле́бом/ ве́рно в хра́ме Госпо́дни,/ родила́ еси́ ми́ру Жи́зни Хлеб, Сло́во,/ Ему́же, я́ко храм избра́нный и всенепоро́чный,/ предобручи́лася еси́ Ду́хом та́инственно,/ обручена́ Бо́гу и Отцу́.
Ины Богоро́дице: глас 8.
Подобен: О преславного чудесе:
Боже́ственная и светоно́сная наста́ память/ явле́ния ико́ны Богоро́дицы исаа́ковской,/ ду́шу и те́ло веселя́щая./ Те́мже прииди́те, празднолю́бцы,/ я́ко да наслади́мся ны́нешняго торжества́./ всея́ вели́кия Росси́йския земли́ удобре́ние,/ исаа́ковской оби́тели похвала́ и утвержде́ние,/ беспло́тных ра́дование/ ико́на Твоя́ Влады́чице.
Ра́дуйся весь поше́хонская,/ лику́й оби́тель исаа́ковская,/ се бо гряде́т к тебе́ Де́во Богоро́дице о́бразом свои́м Честны́м,/ ря́сны златы́ми оде́яна /и предукраше́на Боже́ственными благоле́потами./ Сию́ я́ко до́брую и кра́сную в жена́х,/ сла́вяще почи́таем,/ и достодо́лжно в пе́снех велича́ем.
Твои́ благодея́ния и чудеса́, Влады́чице,/ ни ки́йже язык воспе́ти возмо́жет,/ по всей бо вселе́нней ико́ны в зало́г ми́лости Твоея́ к нам являя́еши,/ опу́хлые исцеля́еши,/ младе́нцы ми́луеши,/ и стра́сти укроща́еши/ Твои́ми благоприя́тными к Бо́гу моли́твами.
Слава, глас 6
Предста́тельница на́ша те́плая,/ моли́твеница на́ша неусы́пная,/ ра́дость А́нгелов,/ челове́ков Покро́ве./ Моли́ся за ны ко Госпо́ду в дне́шний день торжества́ Твоего́,/ со священому́чениками Климентом и Петро́м/ во е́же спасти́ся душа́м на́шим.
И ны́не, глас 2.
Лео́нта маи́стора:
Днесь в храм приво́дится Всенепоро́чная Де́ва,/ во оби́телище Всецаря́ Бо́га/ и всея́ жи́зни на́шея Пита́теля;/ днесь Честне́йшая Святы́ня,/ я́ко триле́тствующая Ю́ница,/ во свята́я святы́х вво́дится;/ Той возопии́м, я́ко А́нгел:/ ра́дуйся, Еди́на в жена́х Благослове́нная.
НА ЛИТУРГИИ
Блаже́нны от кано́на, песнь 9-я 4-го гла́са на 4 и Богородице песнь 6-я, 4-го гла́са на 4.
По вхо́де тропа́рь пра́здника, тропа́рь Богоро́дице. Сла́ва, кондак Богоро́дице, и ны́не, конда́к праздника. Проки́мен, глас 3. Песнь Богоро́дицы: Вели́чит душа́ моя́ Го́спода: Стих: Я́ко призре́ на смире́ние Рабы́ Своея́: Апо́стол ко Евре́ем, зача́ло 320. Аллилу́ия, глас 8: Слы́ши, Дщи, и виждь,/ и приклони́ у́хо Твое́. Стих: Лицу́ Твоему́ помо́лятся бога́тии лю́дстии. Ева́нгелие от Луки́, зача́ло 54. Прича́стен: Ча́шу спасе́ния прииму́: