Бөгөн Хөкүмәт кәңәшмәһе башланыр алдынан Башҡортостан Башлығы Радий Хәбиров матур йола буйынса алдығы хәрбиҙәрҙе генерал Шайморатов миҙалы менән бүләкләне. Дәүләт наградаһы менән “Башҡортостан” мотоуҡсылар полкы хәрби хеҙмәткәре Радмир Байегетов һәм Доставалов исемендәге батальондың медицина взводы командиры Арыҫлан Мырҙағолов билдәләнде. “Радмир Урал улы махсус хәрби операцияға тиклем милли китапханала эшләне. Үҙ теләге менән фронтҡа китергә ҡарар итә. Арыҫлан Фәнил улы Доставалов исемендәге батальонда хеҙмәт итә, дәүләт наградалары менән бүләкләнгән. Хеҙмәтегеҙ өсөн рәхмәт”, - тине Радий Хәбиров. Радмир Байегетов Зәки Вәлиди исемендәге милли китапханала директор урынбаҫары булып, Арыҫлан Мырҙағолов Иглин үҙәк район дауаханаһында эшләгән. – Республика Башлығы Радий Фәрит улы Хәбировҡа, Хөкүмәткә, Дәүләт Йыйылышы – Ҡоролтайға һәм барлыҡ Башҡортостан халҡына даими ярҙамдары өсөн рәхмәт белдерәм. Тылыбыҙҙың ныҡ булыуын тоябыҙ. Ғаиләләребеҙ ҙә ярҙам ала. Тыл менән фронт берҙәм булғанда, беҙ еңелмәҫбеҙ. Еңеү беҙҙең яҡта, – тине Радмир Байегетов. “Һәйбәт хеҙмәт итегеҙ, өйөгөҙгә иҫән-һау әйләнеп ҡайтығыҙ”, – тине республика етәксеһе. Фото: "Башинформ".