32 төбәктән спортсылар килде

16 февралгә тиклем Башҡортостанда инвалидтар һәм һаулыҡ мөмкинлектәре сикләнгән кешеләр араһында һаңғырауҙар спортының ҡышҡы төрҙәре буйынса I Бөтә Рәсәй спартакиадаһы була. Бөгөн Өфөләге Көрәш һарайында сараны асыу тантанаһы булды. Башҡортостандың баш ҡалаһына илебеҙҙең төрлө төбәктәренән 800-ҙән күберәк көслө спортсы килде. Сарала ҡатнашыусыларҙы сәләмләргә Башҡортостан Хөкүмәте Премьер-министры урынбаҫары – спорт министры Руслан Хәбибов, Бөтә Рәсәй һаңғырауҙар спорты федерацияһы президенты Дмитрий Ребров һәм башҡа маҡтаулы ҡунаҡтар килде. Башҡортостан Башлығы Радий Хәбиров сарала ҡатнашыусыларға ым-ишара телендә мөрәжәғәт итте. “Рәхим итегеҙ! Башҡортостанда сәләмләйем. Барығыҙға ла уңыштар теләйем!” Сарала һәм ярыштарҙа ҡатнашыусыларға Рәсәйҙең спорт министры Михаил Дегтярев сәләмләү ебәрҙе. Унда: “Ҡәҙерле дуҫтар! Сарала ҡатнашыусыларҙы, ойоштороусыларҙы һәм Бөтә Рәсәй ҡышҡы спартакиада ҡунаҡтарын сәләмләйем. Рәсәй Президенты Владимир Владимирович Путиндың билдәләүенсә, нәҡ һаулыҡ мөмкинлектәре сикләнгән кешеләр көслө ихтыяр, ныҡлыҡ һәм сикһеҙ оптимизм күрһәтә. Улар, ауырлыҡтарға ҡарамай, хыялдарын тормошҡа ашыра. Ярыштарҙы үткәргән Башҡортостан үҙенең ҡунаҡсыллығы һәм сараларҙы юғары кимәлдә үткәреүе менән билдәле. 2023 йылда бында - йәйге Сурдлимпия уйындары, 2024 йылда “Рәсәй – спорт державаһы” халыҡ-ара форумы уңышлы үтте. Һаңғырауҙар спорты буйынса спартакиада ла сағыу булыр һәм ыңғай хис-тойғолар, дуҫлыҡлы мөхит булыр, тип ышанам. Дөйөм маҡсатыбыҙ – барыһы өсөн дә физик культура һәм спорт менән тигеҙ шарттар булдырыу. Сарала ҡатнашыусыларҙың барыһына ла уңыштар, тағы ышаныс, өмөт һәм мөхәббәт теләйем. Сөнки Рәсәйгә һәм спортҡа һөйөү – беҙҙе берләштергән әйберҙәр!” Спартакиаданы тантаналы асыу күп кеше ҡатнашҡан хореография тамаһынан башланды. Унда сараны асыуҙың төп уй-мәғәнәһе һалынған: һәләттең бәләкәй генә тамсыһы ла, теләк, холоҡ, күнекмәләр, ышаныс менән берләшеп, ҙур спорт ҡаҙаныштар ағымына әүерелә һәм мөмкинлектәрҙең сикһеҙ диңгеҙенә әйләнә. Ҡунаҡтар алдында Башҡортостандың ижади коллективтары, Мәскәү мимика һәм ым-ишара театры артистары һәм башҡалар сығыш яһаны. - Башҡортостандың баш ҡалаһын - Өфөнө - Бөтә Рәсәй “Беҙ бергә. Спорт” ҡышҡы спартакиаданы үткәреү өсөн һайлап алыуҙы республикалағы спорт ҡаҙаныштарын һәм ватан Сурдлимпия спортына ҙур өлөш индереүҙе таныу тип ҡабул итәбеҙ. Әлеге ҡышҡы спартакиада Рәсәй адаптив спорты үҫешенә һәм Рәсәйҙең Сурдлимпия хәрәкәтенең артабанғы үҫешенә ҙур импульс буласаҡ, Рәсәйҙең спорт ҡеүәтенең артабан да нығыныуына булышлыҡ итәсәк, - тине Башҡортостан Хөкүмәте Премьер-министры урынбаҫары – спорт министры Руслан Хәбибов. Тантананың рәсми өлөшө төбәктәр – Спартакиада ҡатнашыусылары - әләмдәр парады, ым-ишара телендә Гимнды башҡарыу менән башланды. Барыһы 32 төбәк – Калининградтан Камчаткаға тиклем спортсылар ҡатнаша. - Бөгөн һаңғырауҙар спортының көслө спортсыларының беренсе ҡышҡы Спартакиадаһына старт бирәбеҙ. 11 көнгә Башҡортостан Бөтә Рәсәй физик культура һәм ишетеү һәләте боҙолған кешеләр спорты, илебеҙҙең ишетмәгән граждандарҙы йәлеп итеү үҙәгенә, Рәсәйҙең Сурдлимпия хәрәкәте флагманына әүерелә. “Беҙ бергә. Спорт” спартакиадаһы ҡатнашыусыларға Сурдлимпия хыялына аҙым яһауҙа мөһим аҙым буласаҡ тип ышанам, - тине Бөтә Рәсәй Һаңғырыуҙар спорты федерацияһы президенты Дмитрий Ребров. Спартакиада ҡатнашыусылары өсөн ҙур мәҙәни программа ла әҙерләнгән. Өфөләге Ҡунаҡһарайҙа фан-зона эшләй. Унда ым-ишара белгестәре Өфө буйлап үҙаллы сәйәхәт өсөн видеогидлы карта күрһәтә. Унда шулай уҡ кино, театр, автобус экскурсияларына бушлай билет алырға була. Уларҙың теҙмәһе менән Спартакиаданың рәсми ресурстарында танышырға ммкин: (https://t.me/myvmestesport_ufa, https://vk.com/ufa_spartakiada2025). Бөтә Рәсәй “Беҙ бергә. Спорт” һаңғырауҙар спорты спартакиадаһы 16 февралгә тиклем бара. Сараны ябыу тантанаһы 14 февралдә баш ҡаланың Спорт һарайында була. Видео: БР Спорт министрлығы.