Йәшәйешебеҙ йәмле балалар һәм ғаиләләр менән!

Һәр миҙгел үҙенсә матур. Ҡышҡыһын йылға-күлдәрҙең боҙ менән ҡапланыуы, ап-аҡ ҡар яуыуы сана, саңғы һәм коньки кеүек спорт ҡорамалдарының уйлап сығарылыуына, һөҙөмтәлә бары ошо миҙгелгә генә хас спорт төрҙәренең барлыҡҡа килеүенә сәбәпсе булған. Өҫтәүенә, ҡышҡы спорт төрҙәренең күпселеге асыҡ һауала уйнау өсөн тәғәйенләнгән. Хоккей, конькиҙа йүгереү спорты, саңғы шыуыу кеүек ҡышҡы спорт төрҙәре ғаилә менән бергәләп ял итеү өсөн дә отошло. Яңы йыл байрамдарын иһә тотош ғаилә менән саф һауала физик күнекмәләр эшләп үткәрергә мөмкин. Әйткәндәй, “Берҙәм Рәсәй” партияһының төбәк бүлексәһе һәм Башҡортостан Башлығы Радий Хәбировтың башланғысы менән республика халҡының Яңы йыл байрамдарын әүҙем, сәләмәт үткәреү, физкультура һәм спортты пропагандалау маҡсатында барлыҡҡа килгән “Яңы йыл ғаилә уйындары” фестивалендә быйыл да әллә күпме кеше ихлас ҡатнашты. “Сәләмәт төбәк – көслө төбәк” проекты ярашлы ойошторолған сарала Башҡортостаныбыҙҙың төрлө төбәктәренән ғаиләләр башта үҙ район-ҡалаһында – муниципаль этапта – үҙ көсөн һынап ҡараны. Был спорт сараларында беренсе урындар яулағандар аҙаҡ Өфөлә үткәрелгән республика бәйгеһендә ҡатнашты. Шуныһы һөйөнөслө: Яңы йыл ғаилә уйындарын үткәреү матур йолаға әүерелде. Быйыл ул алтынсы тапҡыр рәттән ойошторолдо. Шулай итеп, Яңы йыл үтеп китһә лә, Яңы йыл ғаилә уйындары дауам итте. Ярыштарҙа иһә тотош яратҡан республикабыҙ географияһы һынландырыла. Әйткәндәй, был матур сара йыл һайын республика Хөкүмәте, “Берҙәм Рәсәй” партияһының Башҡортостан төбәк бүлексәһе, республиканың Спорт, Мәғариф һәм фән министрлыҡтары ярҙамында ойошторола. Республиканың төрлө ҡалаларынан һәм райондарынан килгән ғаиләләр был матур спорт сараһынан ситтә ҡалмай. Бөгөн Өфөләге “Динамо” стадионында балалар ата-әсәләре менән берлектә йүгерҙе, һикерҙе, туп уйнаны һәм үҙенең етеҙлеген, отҡорлоғон күрһәтте. Спорт объекты бөгөн ғәҙәттәгесә булмағанса ғаиләләр тауышына күмелде. “Яңы йыл ғаилә уйындары-2025” фестивалендә быйыл да әллә күпме кеше ихлас ҡатнашты. Ошо ҙур, мөһим сараның төп өлөшө – финал уйындары бөгөн булды. “Сәләмәт төбәк – көслө төбәк” проектына ярашлы ойошторолған сарала ҡатнашҡандарҙың барыһы ла тыуған район-ҡалаһында беренсе урын яулаған. - Башҡортостан Башлығы, “Берҙәм Рәсәй” партияһының төбәк бүлексәһе етәксеһе Радий Хәбиров исеменән барығыҙҙы ла сәләмләйем, - тине “Берҙәм Рәсәй” партияһының төбәк башҡарма комитеты етәксеһе Руслан Насретдинов, сарала ҡатнашыусыларға мөрәжәғәт итеп. – Һеҙ әле үк еңеүселәр, афариндар! Йылдан-йыл был сарала ҡатнашыусылар артҡандан-арта. Барығыҙға ла изге теләктәр, иң мөһиме – ныҡлы сәләмәтлек теләйем. Артабан да алға барасаҡбыҙ. Барыбыҙ ҙа ҙур бер ғаилә. Фестиваль финалы уйындарын асыу тантанаһында республиканың мәғариф һәм фән министры урынбаҫары Инесса Косолапова, спорт министры урынбаҫары Эльза Ҡарамырҙина ла сарала ҡатнашыусыларға уңыштар теләне. Командала атай, әсәй һәм уларҙың балаһы — башланғыс класс уҡыусыһы ҡатнашты. Ярыштар программаһы “Клюшка менән туп йөрөтөү”, “Тачка”, “Обруч менән йүгереү” һәм “Бобслей” уйындарынан торҙо. Ғафури районынан Хәкимовтар, Шишмә районынан Мөхәмәтдиновтар, Әбйәлил районынан Мостафиндар һәм башҡалар сарала бик әүҙем көс һынашты. Беренсе урынды Балаҡатай районынан Каниповтар яуланы. Икенсе урынға – Миәкә районынан Хәсәновтар, өсөнсөгә Ҡалтасы районынан Миңлекәевтәр сыҡты. Быйыл барлыҡҡа килгән “Минең спорт ғаиләһе!” номинацияһында Учалы ҡалаһынан Зариповтар билдәләнде. Еңеүселәргә ҡиммәтле бүләктәр һәм тотош ғаилә менән Башҡортостан шифаханаһында ял итеү өсөн юллама бүләк ителде. Айрат Нурмөхәмәтов фотолары.