Радий Хәбиров менән Беларусь Президенты Александр Лукашенко осрашты

7 февралдә Минскиҙа Башҡортостан Башлығы Радий Хәбиров Беларусь Республикаһы Президенты Александр Лукашенко менән осрашты. Яҡтар сауҙа-иҡтисади һәм гуманитар хеҙмәттәшлекте артабан үҫтереү һәм нығытыу мөмкинлектәрен тикшерҙе. Александр Лукашенко билдәләүенсә, Беларусь менән Башҡортостан араһында яҡшы мөнәсәбәттәр булдырылған, берлектәге технологик проекттар ҙа бар. – Ләкин, дөрөҫөн әйткәндә, былтыр беҙ бер аҙ әйләнеште кәметтек (бәлки, статистика дөрөҫ мәғлүмәт бирмәйҙер). Тауар әйләнешендә беҙ 5-6 процентҡа кәметтек, - тине Александр Лукашенко. - Быйыл тауар әйләнешен үҫтерергә һәм беҙ эшләгән 315-320 миллион долларҙы уҙып китергә бурыслыбыҙ. Беларусь Президенты билдәләүенсә, Башҡортостан менән берлектәге проекттарҙы тормошҡа ашырыу сиктәрендә эшләүе уңайлы. Улар иҫәбендә – берлектә тракторҙар, троллейбустар, трамвайҙар һәм башҡа техника етештереү. Александр Лукашенко шулай уҡ тауар әйләнешен, атап әйткәндә, аҙыҡ-түлек тауарҙары һәм еңел сәнәғәт изделиелары өлөшөндә артабан үҫтереү потенциалын юғары баһаланы. – Башҡортостан беҙҙең өсөн Рәсәйҙең хеҙмәттәшлек итергә теләгән бик мөһим төбәге. Беренсенән, ул бик үҫешкән, алға киткән. Икенсенән, был Рәсәйҙең Европа территорияһы үҙәге, һеҙҙә эшләп, күрше төбәктәрҙә лә эшләйәсәкбеҙ. Әгәр ниндәйҙер мәсьәләләр буйынса һөйләшеп килешһәк, шикләнмәгеҙ, бурыстарыбыҙҙы мотлаҡ үтәрбеҙ, – тине Александр Лукашенко. Башҡортостан Башлығы Радий Хәбиров Беларусь Президентына делегацияны йылы ҡабул иткәндәре өсөн рәхмәт белдерҙе, шулай уҡ дәүләт етәксеһен 2025 йылдың ғинуарында уҙған һайлауҙарҙа еңеүе менән ҡотланы. – Был Белоруссия өсөн генә түгел, ике дәүләт өсөн дә бик мөһим ваҡиға, - тине Радий Хәбиров. Төбәк етәксеһе төрлө йүнәлештәр буйынса ике яҡлы мөнәсәбәттәрҙе үҫтереүҙең юғары әһәмиәтен билдәләне. – Беҙҙең өсөн Беларусь – тышҡы иҡтисади партнер ғына түгел. Был беҙҙең өсөн туғандаш республика. Беҙ быны һәр ваҡыт әйтәбеҙ, – тип билдәләне Радий Хәбиров. – Һеҙҙең менән 2021 йылдың ҡышында осраштыҡ. Уҙған ваҡыт эсендә ныҡлап эшләнек, Беларусь идара итеү командаһы менән таныштыҡ. Бер-беребеҙҙе аңлайбыҙ. Йыл һайын Башҡортостан Белоруссиянан импортты арттыра, был эште дауам итәсәкбеҙ. Республикала Белоруссия тауарҙары, шул иҫәптән транспорт һәм коммуналь техника, аҙыҡ-түлек тауарҙары һәм еңел сәнәғәт изделиелары ҙур һорау менән ҡуллана, тип өҫтәне төбәк Башлығы. – 2022 йылда Беларусь Премьер-министры Роман Александрович Головченко менән Өфөлә Минск автомобиль заводының дилер үҙәген астыҡ. Хәҙер компания вәкилдәре беҙҙә ҙур сервис үҙәге төҙөргә теләй. “АМКОДОР” буйынса ла шул уҡ хәл - төрлө техника етештереү буйынса холдинг заводы төҙөлөштө тамамлау стадияһында, – тип билдәләне Радий Хәбиров. – Аҙыҡ-түлек секторы хаҡында һүҙ йөрөткәндә, Белоруссия тауарҙары беҙҙең халыҡтың һөйөүен яулаған. 80-гә яҡын предприятие уларҙы Башҡортостанда һата. Шуға күрә берлектәге эште дауам итәбеҙ, яңы үҫеш нөктәләрен булдырасаҡбыҙ. Осрашыуҙа шулай уҡ берлектәге инвестиция кластерын булдырыу, пилотһыҙ осоу аппараттары производствоһын үҫтереү һәм туристик алмашыуҙы киңәйтеү мәсьәләләре тикшерелде. Фото: Башҡортостан Башлығы сайты.